TOPOTUNTU 4 - Sura Magali Nuntu Ngkatuwu

¹ Ungka lairia kupatomata woʼu mpengaya-ngaya anu bareʼe mayoa anu mewali ri lino seʼi. Waʼa ntau anu ndajeani motumangi pai bereʼe tau anu mampokono mantulungi. Bereʼe mau sambaʼa tau anu mampokono mampelae, maka waʼa ntopejeani setu paka waʼa ntau bangke kuasanya.

² Manyau rayaku ane kuendo waʼa ntau anu masaemo kamatenya, maka tau seʼe sangkadagonya naepe painaka waʼa ntau anu ntongo tuwupa.

³ Paikanya anu maʼai mpodago kadagonya naepe inceʼemo waʼa ntau anu bareʼepa ndapoana, maka tau seʼe bareʼepa nakita jaʼa anu tewianaka ri lino seʼi.

⁴ Kuincani woʼu katolinonya seʼe motetala manee, podo ua manyau rayanya mangkita pandata ntau samposori banuanya. Pura-pura setu podo ngkabongo ewa pompari-mpari maduduki ngoyu.

⁵ Tuntuka mantoʼo, podo tau anu tengo anu da motunda moncoko koro da mampapaliuka koronya da mate yoga.

⁶ Bara monco kojo anu ewanceʼe, paikanya moruana podo sakodi aga-aga paikanya rodo raya painaka radua mbiramo seʼe pale paka motetala manee mamponggaleka tetala pai maduduki ngoyu.

⁷ Ntongo reʼepa woʼu anu podo ngkabongo ri katuwu seʼi.

⁸ Reʼe tau anu tuwu ngkangkalionya bereʼe ananya bara kasangkomponya. Paikanya mau ewanceʼe siʼa mompari-mpari mpaliu motetala manee, pai bereʼe kaʼosa ndayanya mangkita aga-aganya. Ara da tila incemamo titi ininya pai bareʼe napokono mampakawongko rayanya? Incetu seʼe podo ngkabongo, sangaya katedikanaka ngkatuwu anu mapari.

⁹ Moruana tuwu tearadua painaka tuwu podo ngkangkalio. Ane motetala tau seʼe, da maria wuanya.

¹⁰ Ane sambaʼa manawu reʼe sambaʼa da mampelae. Paikanya ane sambaʼaja pai manawu siʼa bereʼe yununya, marugimo siʼa maka bereʼe anu da mantulungi.

¹¹ Ri wengi anu maranindi, radua tau merou da simbete maramu, paikanya ewambeʼi da karamunya anu podo ngkalionya?

¹² Radua tau simpoyunu ri pelinja, ane nabungke ntau majaʼa da mombepelae, paikanya tau anu podo ngkalionya saru-saru da panangi. Tatogo wayaa anu ndakayoro bareʼe da saru-saru ndabutusi.

^13-14 Tau kaasi-asi nakoto mewali mokole, pai sambaʼa tau anu ndatarunggu nakoto melimba ri kadera mpoparenta. Paikanya i mokole ri tempo ngkamatuʼanya maʼai ngkatengo mantarima patuju, were ngkatuwunya meruu ngkajaʼa painaka tau mangura anu kaasi-asi paikanya loʼe.

¹⁵ Kunawa-nawa kono tau pura-pura ri lino seʼi, kurata ndayamo ri oyo waʼa ntau setu manoto reʼe sambaʼa ngalitau anu da mancawani mokole.

¹⁶ Waʼa mpalili anu da naparenta bara bareʼe ndaincani kasondo imbanya, paikanya bemoreʼe siʼa, bereʼe anu da montarima kase maendo kadago mpowianya. Monco, lawi pura-pura podo ngkabongo ewa tetala mangaduduki ngoyu.

Neʼe ganggara mojanji 4:17–5:6

¹⁷ Da ndipakadago kojo ane njoʼu ri Banua i mPue. Moruana da njoʼu meguru njairia painaka da njoʼu mangkeni panyomba, ewa anu nawianaka waʼa ntau tengo. Tau seʼe setu bareʼe naincani mampaposisala mbeʼi anu monco pai mbeʼi anu sala.