TOPOTUNTU 3 - Sura Magali Nuntu Ngkatuwu

Pura-pura reʼe temponya 3:1-15

¹ Pura-pura anu reʼe ri lino seʼi tepewali ri tempo anu ndapakanoto i mPue Ala.

² I Pue Ala anu mampakanoto tempo da poana pai tempo da kamate, tempo da pomuya pai tempo da pawuka,

³ tempo da pampepate pai tempo da pampakaʼosa, tempo da parongkasi pai tempo da pawangu.

⁴ I Pue Ala mampakanoto tempo da potumangi pai tempo da pogele, tempo da pokukuou pai tempo da poende,

⁵ tempo da perou ntau samboko pai tempo ntau samboko bareʼe maya merou, tempo da pombesokowaka api tempo bareʼe maya mombesokowaka.

⁶ I Pue Ala mampakanoto tempo da pangarata pai tempo bareʼe da ndarata, tempo da pampasambaka pai tempo da ndapabolontanaka,

⁷ tempo da ndapasempa pai tempo da ndapajauti, tempo da ponjii-njii pai tempo da pompau-mpau.

⁸ I Pue Ala mampakanoto tempo da pombepotowe pai tempo pampobanciika, tempo da poʼiwali pai tempo kasimadago.

⁹ Nunjaamo silinya waʼa pompari-mparita?

¹⁰ Kuincani kaʼi Pue Alanya anu mampapakoyoka kita kinoyo anu manee.

¹¹ Sira anu mampakanoto tempo singkono ri pura-puranya. Sira anu mawai ri kita pampodaraya mangaincani nunjaa anu da mewali ri reme-reme anu nepa da rata, paikanya bareʼe takoto marata ndaya powia mPue Ala ungka ri tepuʼnya rata ri kapusanya.

¹² Kuincani bereʼe anu meruu ngkadagonya ri kita inceʼemo mawongko-wongko raya pai mampolese katuwu sangkarate ntinuwuta.

¹³ Moruana kita pura-pura mangkoni pai manginu mampokawongko sili lengeta. Inceʼe pombai i mPue Ala.

¹⁴ Kuincani pura-pura powia mPue Ala da reʼe rantani masae-sae. Tolino bareʼe da nakoto mangarangani bara mangangkurangi. Pai ndapampowia i mPue Ala ewanceʼe da naka kita mampokaeka Sira.

¹⁵ Nunjaa anu mewali wawaseʼi lawi mewalimo iowi. Anu nepa da reʼe lawi masaemo kareʼenya. I Pue Ala anu mampakanoto da naka anu tepewalimo, da tepewali woʼu.

Kareʼenya powia anu bareʼe mayoa ri lino seʼi 3:16–4:16

¹⁶ Reʼe woʼu anu kukita ri lino seʼi: anu kamonconya da mampatongawa kayoa pai kadago, paikanya njairiamo kanjau ngkajaʼa.

¹⁷ Kunawa-nawa, i Pue anu da mangabotusi tau madago bara tau anu majaʼa ntano, maka sangaya-sangaya seʼe pai pura-pura powia da mewali ri tempo anu ndapakanoto i mPue Ala.

¹⁸ Kabotunya ri rayaku ewanceʼemo: i Pue Ala mangaʼuji kita pai mangantujuka kita jaya ngkatuwu, bereʼe posisalanya pai were ngkatuwu mpinatuwu.

¹⁹ Maka mau ewambeʼi ntano, were ngkatuwu ntolino pai pinatuwu siwia. Anu sambaʼa da mate ewanceʼe seʼe anu ntaninya. Radua-duamo seʼe siwia-wia paka anu ndapareʼe i mPue Ala. Mewali, tolino bereʼe peruunya pai pinatuwu, maka ri radua-duamo seʼe katuwu seʼi podo ngkabongo.

²⁰ Tau seʼe tepatotoka ri kareʼe anu siwia. Tau seʼe ungka ri awu ntana pai da mewalili ri awu ntana.

²¹ Bareʼe taincani inosa ntolino bara da mepone waindeku pai inosa mpinatuwu bara da mencili ri raya ntana.

²² Inceʼe painaka kurata ndayamo bereʼe anu meruu kadagonya ri tolino inceʼemo da mampokawongko sili lengenya. Podo inceʼe, bereʼe anu ntaninya anu nakoto mawianaka. Bereʼe jayanya da napaincani nunjaa anu da mewali ane matemo siʼa.