TOPOTUNTU 2 - Sura Magali Nuntu Ngkatuwu

¹ Kubotusi da mampakawongko rayaku da mangaincani nunjaa anu mangkeni kalindo ndaya. Paikanya tongawa inceʼe seʼe soa.

² Nepa kurata ndaya ntano gele inceʼe katongawa ngkatengo pai wongko ndaya bereʼe yowenya.

³ Ua nakeni kadarayaku mewali tau loʼe, kupari-pari da mampakawongko rayaku pai posusa manginu-nginu anggoro. Kusarumaka inceʼemo da sangkadagonya ri tolino da maepe kadago ngkatuwu anu podo sarai ri lino seʼi.

^4-5 Waʼa ntetala anu bangke roomo kuwianaka. Kuwangu waʼa banuaku, kupowia waʼa bonde anu madolidi, waʼa bonde anu kupomuyaka anggoro pai mpengaya-ngaya pinamuya anu mowua.

⁶ Kukae waʼa ntibubu anu da mangauesi waʼa bonde au madolidi pai waʼa bonde anggoro setu.

⁷ Maria anamayunu anu kuoli pai anu ndapoana ri raya banuaku. Waʼa mpinatuwuku maʼai ngkarianya, bereʼe tau ri Yerusale anu manganangi kamarianya.

⁸ Kupasambaka wuyawa pai salaka, asele ungka ri waʼa mokole ungka ri waʼa lemba anu meʼuru ri yaku. Waʼa ntopongayu tuama pai weʼa mampakawongko rayaku pai waʼa ngayu-ngayu ntau seʼe. Kupotumpu waʼa rongo piara malulu pepokonoku.

⁹ Monco kojo, yaku meruu ungka ri waʼa ntau anu reʼemo pearinya ri Yerusale, pai kaloʼeku bereʼe manganangi.

¹⁰ Nunjaa anu kupodaraya, kupowia. Bereʼe kupantaʼamaka rayaku ane reʼe anu da mampakawongko rayaku. Kupokawongko pura-pura sili lengeku, pai inceʼemo saroku.

¹¹ Paikanya ripurinya kuparesa mpengaya-ngaya powiaku setu, pai pura-pura titi iniku da mamparoo waʼa ntetalaku setu, nepa kurata ndaya pura-pura setu bereʼe poyowenya. Pompari-mpariku setu soa-soa podo ewa maduduki ngoyu.

¹² Mau ewambeʼi ntano sambaʼa mokole podo nakoto da mangawianaka nunjaa anu roomo nawianaka waʼa mokole anu mampesindiukamo siʼa. Nepa kutepuʼu monawa-nawa: Nunjaa posokinya mewali tau loʼe, bara maʼai ngkatengo, bara tengo?

¹³ Lawi kuincani, “Kaloʼe sangkadagonya pai katengo, ewa kareme sangkadagonya pai kawani.

¹⁴ Tau anu loʼe nakoto mangkita ri mbeʼi da poara ngkanjoʼunya; tau anu tengo podo pelinja ntau anu moama-ama.” Paikanya kuincani woʼu were ngkatuwu anu siwia da mampere tau seʼe pura-pura.

¹⁵ Kunawa-nawa, “Were ngkatuwu anu mampere tau tengo inceʼe seʼe woʼu anu da mangampere yaku. Mewali, nunjaa yowenya mpengaya-ngaya loʼeku?” Inceʼe painaka kutima botusinya, kamonconya kaloʼe setu beliu-liu reʼe poyowenya.

¹⁶ Tau anu tengo sarai ndapangkalingani pai tau anu loʼe seʼe bareʼe bara da ndaendo woʼu. Kakomasae-sae kita pura-pura da ndakalingani. Kita pura-pura sangaya-ngaya da mate, madago anu loʼe ewanceʼe seʼe anu maʼai ngkatengo.

¹⁷ Inceʼe painaka katuwu seʼi bareʼemo reʼe yowenya ri yaku, bereʼe basa ntaninya. Pura-pura podo soʼa-soa; yaku podo mangaduduki ngoyu.

¹⁸ Mpengaya-ngaya wua ntetalaku pai pandataku bereʼe yowenya ri yaku maka pura-pura setu da kupalaika ri tau anu mangancawani yaku.

¹⁹ Pai isema maincani siʼa loʼe bara tengo? Paikanya manoto siʼa da mampotumpu wua ntetalaku anu kapereʼemo sangkarate ngkatuwuku ri lino seʼi ua titi iniku pai kaloʼeku. Mewali, inceʼe seʼe podo ngkabongo.

²⁰ Seʼi-seʼi kusosoi maka yaku roo mompari-mpari ri tetalaku.

²¹ Maka tolino mompari-mpari motetala ri kaloʼe ndaya, pangaincani pai katimama da naparata sangaya seʼe. Paikanya ripurinya sangaya-ngaya da napalaika waʼa sili lengenya tila ntau anu bereʼe titi ininya ri aga-aga setu. Mewali, inceʼe seʼe podo ngkabongo, pai inceʼe monco kojo bareʼe mayoa!

²² Sangkasae ngkatuwunya tolino motetala manee pai mompari-mpari; mbeʼimo sili lengenya anu da napokawongko?

²³ Nunjaa ntano anu nawianaka sangkasae ngkatuwunya, podo mampareʼe pari pai kodi ndaya ri siʼa. Ri ntongo mbengi mapari rayanya. Mewali pura-pura setu podo soa ngkabongo.

²⁴ Bereʼe anu meruu ngkadago ri tolino inceʼemo mangkoni, manginu mangampokawongko sili lengenya. Kurata ndaya pura-pura setu pombai i mPue Ala.

²⁵ Ara isema anu mangkoto pai da mawongko-wongko raya ane banya i Pue Ala?

²⁶ Maka i Pue Ala anu mangawai kaloʼe, pangaincani pai kalindo ndaya ri tau anu mampakawongko raya-A. Paikanya tau masala Ndapokau motetala mampepali katuwunya, mampasambaka wua mpotetalanya anu da napepombaika ri tau anu mampakawongko raya i mPue Ala. Mewali, pura-pura setu podo soa-soa ngkabongo, podo ewa tetala mangaduduki ngoyu.