TOPOTUNTU 12 - Sura Magali Nuntu Ngkatuwu

¹ Neʼe nukalingani anu mampapewali siko ntongo mangurapa siko, ri kabareʼepanya rata waʼa ntaʼu anu buke pai kapari. Sindara setu da mangantoʼo, “Bereʼe kadago ngkatuwu.”

² Ane ratamo tempo setu mataku bareʼemo da yosa, painaka tekaramaʼumo perara ndeme, wuya pai betuʼe. Limu makumba anu mangkeni uja, mangkulamuti siko ewa meekati.

³ Kandende-ndende takiemu pai bareʼe da ndasarumaka. Witimu anu makogangi bareʼemo maroso. Ngisimu bemogana da manganyangi pangkoni. Matamu bularu painaka mampakawuanga peolemu.

⁴ Waʼa ngkadoro ri jaya bangke jamo nudonge tewao-wao. Oni musiki pai powotu gilinga jamo nudonge paya-paya. Bareʼemo lintu kayoremu. Sako powotu ntonci mampaka tekalumbangu siko.

⁵ Maeka rayaku mandake ri kandatekanya, painaka melinja mpodago. Keuwamo pai witimu jamo nunoʼo-noʼo melinja. Payamo waʼa ntangara pai sawoyo ndaya. Kita da njoʼumo ri kareʼeta anu kapusanya, waʼa ntau anu mangkabalusi pai mangkuousi santuntu njaya.

⁶ Rante salaka da mabutu pai da tebureka; silo wuyawa da manawu pai da malesa; Wayaa mponombu mabutu pai majaʼamo; gumba maposo pai tepujaa.

⁷ Wata ngkorota da mewalili ri wakanya, mewali awu ri lino. Inosa ngkatuwuta da mewalili ri Pue Ala. Siramo anu mangawai ewa sambaʼa pombaia.

⁸ Kutoʼo, lawi pura-pura setu podo ngkabongo, pura-pura bereʼe yowenya

Kapusanya 12:9-14

⁹ I To Ponawa-nawa loʼe pai moua raya. Inceʼe painaka napaguruka banca waʼa pangaincaninya. Maria patada napeguru nepa naʼuji kamonconya.

¹⁰ Napari-pari da naparata waʼa mpau pompalindo, pai waʼa mpau anu naʼuki paka mayoa.

¹¹ Pau ntau loʼe ewa toko i ntopongkambi anu malolo, toko anu napake da mampelae bimbanya. Waʼa mpatada pai totoraka, da ewa paku anu tepaso maroso. Pura-pura setu pombai mPue Ala woʼu, maka Sira topongkambita anu sambaʼa-mbaʼa.

¹² Anaku, reʼe sangaya anu neʼe kojo boi nukalingani. Pangaʼuki sura bereʼe da kapusanya, pai sondo gaga peguru mampakalenge nawa-nawa pai koro.

¹³ Ri karoonya pura-pura kutimba-timba, seʼimo potandonya anu kurata. Pokaekamo i Pue Ala pai pepoʼinayamo ri waʼa ncongka-A, maka ua podo kaʼinceʼenya ndapapewali tolino.

¹⁴ I Pue Ala da mangabotusi waʼa mpowiata; anu madago pai anu majaʼa, pai sako anu tesambuni woʼu.