TOPOTUNTU 11 - Sura Magali Nuntu Ngkatuwu

Powia ntau anu moua raya 11:1-8

¹ Dikamo doimu ri topobalu-balu anu negara ntaninya. Manoto da nuparata rasi ripurinya.

² Dikamo doimu ri mpengaya-ngaya pobalu-balu; pepalimo gori ngkarianya. Maka tau madago moncoro-ncoro ri kabareʼepanya napere ngkapari.

³ Tondo ri mbeʼi ntano kadungka mpuʼu ngkaju, sangaya-ngaya da tepapauli ri tampa ngkatudunya. Ane mariamo ue ri raya limu, da tudumo uja marombo ri lino.

⁴ Isema anu malantu-lantu da naka manda ngoyu, pai tekaresimo tongo ndaoa, bareʼe da momuya pai bareʼe woʼu da mampota wuanya.

⁵ I Pue Ala mampareʼe mpengaya-ngaya pai tolino bareʼe nakoto marata ndaya powiaa seʼe; ewanceʼe bareʼe narata ndaya ntau kareʼenya katuwu dawoʼu, sindara ri raya ngkompo inenya.

⁶ Sawumo iniimu ri tempo mpowuro pai neʼe meʼonto ritempo mawengi. Maka bareʼe taincani poncawuta anu mbeʼi madago katuwunya. Bara raduamo seʼe paka madago katuwunya.

⁷ Sindi ndeme mampapenaa raya; maʼai ngkalese ane taleʼo mangaepe.

⁸ Mbolimo siko da montarimakase, ane terangani tinuwumu. Paikanya neʼe nukalingani, mau masae katuwumu ri lino, tempomu anu masae ri kareʼe ntau mate anu meruu ngkasae woʼu. Mewali, nunjaa woʼu anu da ndapomata-mata? Pura-pura podo ngkabongo pai soa-soa.

Patuju tila ntau mangura 11:9–12:8

⁹ Pokawongkomo tempo ngkanguramu, ee tau mangura! Pakawongkomo raya ntongo mangurapa mpodago siko. Pareʼemo mpengaya-ngaya pepokonop ndayamu, wianakamo pura-pura tangara ndayamu. Paikanya endo-endo, Pue Ala anu ndate ri suruga, ripurinya da mangantimba pai da mangabotusi powiamu pura-pura.

¹⁰ Tajikamo kaʼipu ndaya pai pari ndaya ungka ri rayamu, maka tempo ngkamanguramu ganggara da liu.