TOPOTUNTU 10 - Sura Magali Nuntu Ngkatuwu

¹ Yale mate mampakaʼoso lana wongi sabutolo, mau podo sakodi katengo da mampapaya kaloʼe anu bangke.

² Sintinaja ane tau loʼe mawianaka powia anu madago pai tau anu tengo mapowia anu jaʼa.

³ Katengonya da tongawa ri mpengaya-ngaya polengkonya. Pai ri tau pura-pura napetujuka kaʼai ngkatengonya.

⁴ Ane siko napokarau ntau anu makuasa neʼe boi merapi meʼonto ungka ri tetalamu. Mau bara maʼai kasalamu, siko da napokapuru ane todo pai manondo.

⁵ Reʼe jaʼa ntaninya anu kukita ri lino seʼi, inceʼe kajaʼa mpowia waʼa ntau anu makuasa.

⁶ Tau anu tengo ndapapotunda ri peawanya, pai tau anu tetoʼo bereʼe naleʼo bara nunjaa-njaa.

⁷ Reʼe kupangkita waʼa mbatua melamba ri nyara, pai waʼa ngkabosenya malinja ntana ewa anamayunu.

⁸ Isema anu mangkae tilombu da manawu ri rayanya; isema anu maruasi kota bente da natungku jalimoʼo.

⁹ Isema anu motetala ri pangkae watu, da napere mbatu pai mawela. Isema anu maweso kaju ane bareʼe naendo-endoka da marata rugi.

¹⁰ Ane rapanya labumu makuyu pai bareʼe nuasa, da maʼai ngkapari potetalamu. Da nupakemo ponawa-nawamu, pai da nudedewaka mpodago tangara ndayamu riunya.

¹¹ Ane ule metungku ri kabareʼepanya ndapakanaya pai doʼa-doʼa, bareʼemo reʼe yowenya topompanaya ule.

¹² Pau ntau anu loʼe painaka siʼa ndatubunaka, paikanya tau tengo magero ua waʼa mpaunya ngkalionya.

¹³ Siʼa montepuʼu pai waʼa mpau anu soʼa anu napobiasa, paikanya ripurinya waʼa mpaunya ewa tau wando.

¹⁴ Lawi tau tengo maria pau. Eo tetaliku tesambuni ri kita pura-pura. Bereʼe anu ndakoto mantonaa waʼa anu mewali ri tempo bemoreʼe kita.

¹⁵ Podo tau anu tengo bareʼe maincani jaya da njoʼu ri banuanya, siʼa mampari-mpari tetala bereʼe peosanya.

¹⁶ Marugimo sambaʼa lemba ane mokolenya mangurapa gaga, pai waʼa ntadulakonya mosusa sateke reme.

¹⁷ Morasimo lemba anu mokolenya ndatubunaka, pai waʼa ntadulakonya podo mangkoni, bareʼe napokono mayangu pai loʼe majaga koronya.

¹⁸ Ata banua da matiti ane bareʼe ndapakoroka, pai ripurinya banua setu da maru ua kalosenya.

¹⁹ Posusa mampareʼe pogele, pai anggoro mampakadoro. Paikanya da reʼe-reʼenya doi da ndabayarika.

²⁰ Neʼe mantusaki i mokole, mau podo ri raya. Neʼe mampepepara tau koreʼe, mau podo ri lincu ngkayoremu ngkaliomu. Boi reʼe sambaʼa tonci anu madonge nunjaa anu nutoʼo, nepa naparata ri tau anu nutinako ndaya.