TOPOTUNTU 1 - Sura Magali Nuntu Ngkatuwu

¹ Waʼa mpau anu lau ri raya ncura seʼi inceʼe ungka ri Toponawa-nawa, ana i Daudi, anu mancawani siʼa mewali mokole ri Yerusale.

² I Toponawa-nawa mantoʼo: Pura-pura podo ngkabongo bereʼe yowenya! Katuwu seʼi podo ngkabongo, pura-puranya bereʼe posokinya.

³ Sangkarate ngkatuwu kita motetala tumbu oti ini, paikanya nunjaamo silinya anu tapokawongko?

⁴ Tau tuwu salapi-salapi mombesawa-sawani, paikanya lino seʼi gori-gorinya.

⁵ Reme ntongo metete pai ntongo soyo woʼu. Seʼi malengenya mewalili ri kareʼenya anu uyu-uyunya, nepa mebete woʼu.

⁶ Ngoyu mewui njoʼu ri tondo selata nepa wali mpewui ri tondo utara; meyoro-yoro nepa mewalili muni.

⁷ Pura-pura koro ue moili tudu ri tasi, paikanya bareʼe bara buke tasi. Uenya mewalili ri untu ngkoronya nepa moili woʼu.

⁸ Mpengaya-ngaya mampakalente raya pai kalente ndaya seʼe bereʼe kapuasanya. Bereʼe kaʼosa ndaya mampeole; bereʼe kaʼosa ndayata mampedongeka.

⁹ Wuwunya anu reʼemo pewalinya da mewali woʼu. Wuwunya anu reʼemo ndapampowia da tewianaka woʼu. Bereʼe mau sangaya anu dawoʼu ri lino.

¹⁰ Reʼe tau anu mangantoʼo, “Peolemo, inceʼi anu dawoʼu!” Paikanya incetu lawi reʼemo ri kabareʼepanya ndapoana kita.

¹¹ Bareʼe da naendo ntau anu mewalimo ri tempo anu ndaliunakamo. Ewanceʼe seʼe anu mewali wawaseʼi pai anu nepa da mewali, bareʼe bara da naendo ntau ri tempo anu nepa darata.

Nunjaa anu naepemo i nToponawa-nawa 1:12–2:26

¹² Yaku i Toponawa-nawa, moparenta ri Yerusale mewali mokole nto Isaraeli.

¹³ Tangara ndayaku da mamparesa pai da mempegurui ri katimamanya anu mewali ri lino seʼi. Were ngkatuwu anu ndapatokaka kita i mPue Ala podo mampakaondongi raya.

¹⁴ Kukitamo mpengaya-ngaya powia ntau ri lino seʼi. Monco kojo pura-puranya setu soa podo ewa powia mangaʼilawu ngoyu.

¹⁵ Anu modenggo bareʼe ndakoto mampakayoa pai anu bereʼe, bareʼe ndakoto mangaimba.

¹⁶ Kunawa-nawa, “Yaku seʼi tau bangke pai loʼe, maʼai peruu ngkaloʼeku ungka ri waʼa ntau anu moparentamo riunya ri Yerusale, yaku mampasambaka kaloʼe anu sondo pai mangaincani.”

¹⁷ Inceʼe painaka kupari-pari kojo da mangaincani posisalanya kaloʼe pai katengo, kaloʼe ndaya pai kaʼai ngkatengo. Pai tongawa yaku seʼi podo ewa maduduki ngoyu.

¹⁸ Maka kakomaria-ria kaloʼeta kakomaria-ria woʼu kasusa ndayata. Kakomaria-ria kaloʼeta, kakomaria-ria woʼu kasusata.