TADUMPANYOMBA 8 - Sura Magali Nuntu Ngkatuwu

I Musa mampatongko i Haruni pai waʼa ananya 8:1-36

¹ Ndatoʼo i mPue ri Musa,

² “Peboomo i Haruni pai waʼa ananya, pai kenimo rengko ntadu mpanyomba, lana upacara, sambaʼa ana japi laki anu mangurapa da mewali panyomba ngkabareʼenya ndakitanaka salaa, radua bimba laki pai sabingka roti anu bareʼe ndaragi.

³ Nepa da nusongka pura-pura to Isaraeli mompasambaka ri suara dampo Kema-Ku.”

⁴ Nawianaka i Musa pura-pura anu ndapesongkaka i mPue. Butu tepasambakamo pura-pura to Isaraeli njairia,

⁵ natoʼo i Musa ri tau seʼe, “Anu kuwianaka seʼi inceʼe malulu songka i mPue.”

⁶ Nepa napokau i Haruni pai waʼa ananya, ndeku ri suara pai mawusoʼi koro ntau seʼe.

⁷ Roo setu, napaporengkoka rengko ntadu mpanyomba i Haruni, inceʼemo: kameja, soʼo ntongo pai juba. Ewanceʼe seʼe epo anu ndapesoʼoka ri lompenya pai wayaa ungka ri ayapa anu maʼalusu.

⁸ Nepa ndapataka ompo dada ri Haruni, ri raya ompo dada setu ndadika Uri pai Tumi.

⁹ Nepa ndapasuaka suruba ri woʼo i Haruni, ri suruba setu ndapepanetika ramba-ramba wuyawa, inceʼe mampatongawa kasiʼanya mewalimo tau i mPue. Pura-pura setu nawianaka i Musa silulu pai songka i mPue ri siʼa.

¹⁰ Nepa natima i Musa lana upacara nagereka Kema i mPue sangkani pai waʼa mparewanya. Ewanceʼemo pura-pura katewianaka anu ndapatani tila mpanyomba ri Pue.

¹¹ Lana setu da reʼe sakodi ndapurisikika lampaʼani papitu ngkani, ewanceʼe seʼe waʼa mparewa anu ri rayanya, pai dula pai potundanya. Ewanceʼe ndapampowia pura-pura anu ndapatani tila mpanyomba ri Pue.

¹² Roo setu nepa naʼurapi i Musa i Haruni, nabubuka sakodi lana pampatongko ri tanoananya.

¹³ Nepa napokau waʼa ana i Haruni ndeku ri suara. Nepa ndapaporengkoka tau seʼe kameja pai soʼo ntongo. Nepa napasuaka suruba ri woʼo ntau seʼe silulu pai songka i mPue ri siʼa.

¹⁴ Roo inceʼe natima i Musa sambaʼa japi laki anu mangurapa da ndapanyombaka tila ngkabareʼenya ndakitanaka salaa. I Haruni pai waʼa ananya da madika palenya ri wawo mboʼo mpinatuwu setu.

¹⁵ Nepa nasambale i Musa pinatuwu setu natima santila daanya. Naome karamanya ri daa setu nepa nagereka aopo tondu anu lau ri aopo ncuno wawo lampaʼani, da naka lampaʼani setu woʼu ndapanyombaka ri Pue Ala. Daa anu yabinya ndabubusika potunda lampaʼani setu. Ewanceʼemo ndapawianaka pompakagali lampaʼani setu ndapanyombaka tila i mPue.

¹⁶ Japi anu ndasambale setu, natima i Musa pura-pura lorinya anu mantonge wayaa ngkomponya, taganya pai lorinya pai anu madago mpodago ungka ri atenya. Pura-pura naʼombasi ri wawo lampaʼani.

¹⁷ Paikanya sanga pai pela japi setu sangkani pai rambu ndayanya pai wayaa ngkomponya, mewali japi anu ndapanyombaka setu banya mantoʼo anu roo ndapatani, da ndapanowa ri sambaliku mpokema silulu pai anu ndapesongkaka i mPue.

¹⁸ Ungka lairia natima i Musa bimba laki tila mpanyomba anu ndaʼombasi, nepa i Haruni pai waʼa ananya madika pale ntau seʼe ri wawo mboʼo bimba setu.

¹⁹ Nasambale i Musa bimba setu nepa daanya nabubusika aopo nculapa lampaʼani.

^20-21 Nepa nasampa pinatuwu setu pai rambu ndayanya pai witinya ndawusoʼi ri ue. Woʼonya, lorinya, pai anu ntaninya ungka ri sanga bimba laki setu ndapanowa ri wawo lampaʼani mewali panyomba anu ndaʼombasi silulu pai anu ndapesongkaka i mPue ri siʼa. Wau mpasoa panyomba mpangkoni setu mampakawongko raya i mPue.

²² Nepa natima i Musa bimba laki anu ntaninya anu da ndapanyombaka woʼu tila mpaʼurapi tadu mpanyomba. I Haruni pai waʼa ananya madika palenya ri wawo mboʼo bimba setu,

²³ nepa nasambale i Musa. Roo setu natima sakodi daa mpinatuwu setu nagereka ira ntalinga mokana i Haruni, ri katumpu ngkaramanya mokana, pai ri katumpu ngkarama mbitinya mokana.

²⁴ Roo setu napeboo waʼa ana metimosuki, nepa nagereka daa sakodi ira ntalinga mokana ntau seʼe, ri katumpu ngkarama mpale mokana ntau seʼe pai ri katumpu ngkarama mbiti mokana ntau seʼe. Yabi daa setu nabubusika aopo nculapa lampaʼani.

²⁵ Natima i Musa lori bimba, ikunya anu molori, pura-pura lori anu mantonge rambu ndayanya, pai anu madago mpodago ungka ri atenya, taganya pai lorinya pai witinya mokana.

²⁶ Ungka ri bingka kalau roti anu bareʼe ndaragi anu roo ndapanyombaka ri Pue, natima i Musa saogu roti anu makumba anu ndalanai mampowia pai saogu woʼu roti anu manipi. Roti setu nadika ri wawo lori pai paʼa mokana bimba setu.

²⁷ Pura-puranya nadika ri dodo mpale i Haruni pai waʼa ananya nepa napanyombaka ntau seʼe tila mpanyomba ngkabuya ndaya ri Pue.

²⁸ Roo setu natima i Musa pangkoni setu ungka ri tau seʼe nepa napanyombaka ri wawo lampaʼani sangkani-ngkani pai panyomba anu ndaʼombasi tila mpanyomba mpoʼurapi. Wau mpasoa panyomba mpangkoni setu mampakawongko raya i mPue.

²⁹ Nepa natima i Musa dada bimba setu napanyombaka tila mpanyomba ngkabuya ndaya ri Pue. Inceʼemo tila i Musa ungka ri bimba laki anu ndapanyombaka ri upacara mpoʼurapi tadu mpanyomba. Pura-pura nawianaka i Musa silulu pai anu ndapesongkaka i mPue ri siʼa.

³⁰ Roo setu natima i Musa santila ungka ri lana upacara pai santila daa anu ndate ri wawo lampaʼani nepa nawebuka i Haruni pai waʼa ananya pai ri rengko ntau seʼe. Ewanceʼemo pawianaka i Musa ri tau seʼe pai ri rengkonya mewali tanda katauseʼenya ndapatani tila i mPue.

³¹ Ungka lairia natoʼo i Musa ri Haruni pai waʼa ananya, “Ndipoapumo sanga mpinatuwu anu ndapanyombaka setu ri suara wombo Kema i mPue. Silulu pai songka i mPue, inceʼe sangaya-ngaya da ndikoni njairia pai roti mpanyomba mpoʼurapi anu njau ri raya bingka.

³² Yabi mbayawo pai roti anu ndikoni setu sangaya-ngaya da ndipanowa pura-pura.

³³ Ri raya anu papitu ndeme komi bareʼe maya mampalaika Kema i mPue rantani roo upacara mpaʼurapi komi.

³⁴ Silulu pai songka i mPue, da naka nunjaa anu tewianaka ri sandeme seʼi, inceʼe da ndawianaka ri reme-reme anu darata. Katewianakanya ewanceʼe waʼa ncalaami bareʼemo ndakitanaka i mPue.

³⁵ Papitu ndeme papitu mbengi komi da njau mpaliu ri suara mbombo Kema da mawianaka nunjaa anu ndapesongkaka i mPue ri komi. Maka ane bareʼe ndiwianaka komi da mate. Inceʼemo anu ndaparata i mPue ri yaku.”

³⁶ Nawianaka i Haruni pai waʼa ananya pura-pura anu ndapesongkaka i mPue mampoliu i Musa.