TADUMPANYOMBA 4 - Sura Magali Nuntu Ngkatuwu

Panyomba ua waʼa ncalaa anu bareʼe ndaʼoamo 4:1-35

¹ I Pue mampokau i Musa

² da naka naparata ri waʼa nto Isaraeli, bara isema ntano anu bareʼe naʼoamo mampowia salaa maewamo sangaya songka i mPue, sangaya-ngaya da nalulu songka seʼi.

³ Ane i Tadu mPanyomba Bangke anu mampowia salaa painaka natoalemo pura-pura to Isaraeli, sangaya-ngaya da napanyombaka sambaʼa japi laki anu mangurapa anu bereʼe posarinya ri Pue da naka bareʼemo ndakitanaka salaanya.

⁴ Japi setu da nakeni ri suara ampo ngKema i mPue. I Tadu mPanyomba Bangke sangaya-ngaya da madika palenya ri wawo mboʼo mpinatuwu setu, nepa nasambale ri suara ngKema.

⁵ Santila daanya sangaya-ngaya da nakeni mpesua ri raya ngKema.

⁶ Nepa da naome karamanya ri daa setu pai da nawebusika papitu ngkani ri suara layari anu maoyoti Lincu Magali.

⁷ Santila daa setu da naleroka waʼa ntondu anu njau ri suno-suno lampaʼani dupa mawongi ri raya Kema, pai yabinya sangaya-ngaya da ndabubusika potunda lampaʼani mpanyomba ndaʼombasi anu njau ri suara wombo Kema.

⁸ Tadu mpanyomba sangaya-ngaya da mantima pura-pura lori japi laki setu, inceʼemo lori anu mantonge rambu ndayanya,

⁹ taganya pai lorinya pai anu lese ri atenya.

¹⁰ Pura-pura setu da naʼombasi ri wawo lampaʼani ewa ri panyomba ngkasimadago.

¹¹ Paikanya sanganya, pelanya, woʼonya, witinya, rambu ndayanya tesua pai wayaa ngkomponya,

¹² mewali pura-puranya, ndasangadika anu lawi roo ndapatani, sangaya-ngaya da ndakeni mpesuwu ungka ri kareʼe mpokema. Njairia japi setu sangaya-ngaya da ndaʼombasi ri wawo ngkaju apu ri kareʼe mpantajika awu, ri tampa anu lawi ndapatokamo.

¹³ Paikanya ane anu mowia salaa setu pura-pura to Isaraeli, ua kabareʼenya naʼoamo malewa sangaya songka i mPue,

¹⁴ ane ndaincanimo salaa setu ganggara to Isaraeli mangkeni sambaʼa japi laki anu mangurapa ri suara ngKema i mPue. Pinatuwu setu sangaya-ngaya da ndapanyombaka mewali panyomba kabareʼenya ndakitanaka salaa.

¹⁵ Waʼa ntadulako nto Isaraeli da madika palenya ri wawo mboʼo mpinatuwu setu, nepa ndasambale njairia.

¹⁶ Tadu mPanyomba Bangke sangaya-ngaya da mangkeni santila daa mpinatuwu setu ri raya ngKema.

¹⁷ Njairia, siʼa da maome karamanya ri daa setu, nepa da nawebusika layari anu maoyoti Lincu Magali papitu ngkani.

¹⁸ Santila woʼu daa setu da leroka waʼa ntondu anu njau ri waʼa suno lampaʼani pantunju dupa ri raya ngKema, pai yabinya sangaya-ngaya da nabubusika potunda lampaʼani mpanyomba anu njau ri suara dampo ngKema.

¹⁹ Pura-pura lori mpinatuwu setu sangaya-ngaya da ndatima pai da ndaʼombasi ri wawo lampaʼani mpaʼombasi panyomba.

²⁰ Katewianakanya da ewa katewianaka pampanyombaka japi laki anu ndapanyombaka tila ngkabareʼenya ndakitanaka salaa. Ewanceʼemoda napawianaka i nTadu mPanyomba Bangke pampanyombaka panyomba ua kasalaa ntau sondo; ua katewianakanya ewanceʼe painaka bareʼemo da ndakitanaka i mPue salaa ntau seʼe.

²¹ Ungka lairia, japi laki setu sangaya-ngaya da ndakeni ri sambalikunya pai da ndaʼombasi ri sambaliku mpokema, ewa napampanyombaka i nTadu mPanyomba Bangke japi laki, tila ngkabareʼenya ndakitanaka salaanya. Ewanceʼemo da napampanyombaka panyomba ngkabareʼenya ndakitanaka salaa ntau sondo.

²² Ane anu mowia salaa setu sambaʼa topombawanaka, ri kabareʼenya naʼoamo malewa sangaya songka i mPue,

²³ ane naepa ndayamo salaanya, ganggara napanyombaka sambaʼa mbula laki anu bereʼe posarinya da naka neʼe ndakitanaka salaanya.

²⁴ Siʼa da madika palenya ri wawo mboʼo mpinatuwu setu, nepa nasambale ri tondo utara lampaʼani, ri tampa mpasambale pinatuwu tila mpanyomba anu ndaʼombasi.

²⁵ Tadu mpanyomba da maome karamanya ri daa mpinatuwu setu da naleroka waʼa ntondu anu njau ri waʼa suno lampaʼani, yabi daa setu da nabubusika potunda lampaʼani.

²⁶ Ungka lairia, waʼa lori mpinatuwu setu da ndaʼombasi ri wawo lampaʼani, ewa pawianaka pampanyombaka panyomba ua kasalaa sambaʼa topombawanaka, painaka bareʼemo ndakitanaka i mPue salaa ntau setu.

²⁷ Ane sambaʼa ri oyo ntau sondo anu mowia salaa ua bareʼe naʼoamo malewa sangaya songka i mPue,

²⁸ ane naepe ndayamo kasala mpowianya, ganggara da napanyombaka sambaʼa mbula tina anu bereʼe posarinya.

²⁹ Siʼa sangaya-ngaya da madika palenya ri wawo mboʼo mpinatuwu setu nepa da nasambale ri tondo utara lampaʼani ri tampa mpasambale pinatuwu tila mpanyomba anu da ndaʼombasi.

³⁰ Tadu mpanyomba da maome karamanya ridaa mpinatuwu setu nepa naleroka waʼa ntondu anu njau ri aopo suno lampaʼani pai yabinya da nabubusika potunda lampaʼani.

³¹ Pura-pura lori mpinatuwu setu da ndatima ewa pawianaka panyomba ngkasimadago. Lori setu da naʼombasi i ntadu mpanyomba ri wawo lampaʼani, da naka wau mpasoanya mampakawongko raya i mPue. Ewanceʼe da napampanyombaka i ntadu mpanyomba panyomba ua salaa sambaʼa tau ri oyo ntau sondo, painaka bareʼemo ndakitanaka i mPue salaa ntau setu.

³² Ane sambaʼa tau anu mampanyombaka sambaʼa bimba da naka neʼemo ndakitanaka salaanya, bimba setu sangaya-ngaya anu tina pai bereʼe posarinya.

³³ Siʼa sangaya-ngaya da madika palenya ri wawo mboʼo mpinatuwu setu nepada nasambale ri tondo utara lampaʼani, ri tampa mpasambale pinatuwu anu da ndaʼombasi.

³⁴ Tadu mpanyomba da maome karamanya ri daa mpinatuwu setu, nepa naleroka waʼa ntondu anu njau ri aopo suno lampaʼani, pai yabinya da nabubusika potunda lampaʼani.

³⁵ Ungka lairia, pura-pura lorinya da natima i ntadu mpanyomba ewa pawianaka ri panyomba ngkasimadago. Lori setu da naʼombasi ri wawo lampaʼani, sangkani-ngkani pai waʼa mpangkoni anu ndapanyombaka ri Pue. Ewanceʼemo pawianaka i ntadu mpanyomba, panyomba ua kasalaa ntau setu, bareʼemo ndakitanaka i mPue salaanya.