TADUMPANYOMBA 3 - Sura Magali Nuntu Ngkatuwu

Panyomba ngkasimadago 3:1-17

¹ Ane sambaʼa tau da mampanyombaka sambaʼa japi ua panyomba ngkasimadago, japi setu maya anu laki bara anu tina, paikanya neʼe reʼe posarinya.

² Tau anu mampanyombaka setu da madika palenya ri wawo mboʼo mpinatuwu setu nepa da nasambale ri suara dampo ngKema i mPue. Daa mpinatuwu setu sangaya-ngaya da ndabubusika aopo nculapa sudipi lampaʼani, anu da nawianaka waʼa ntadu panyomba muli muli i Haruni.

³ Ri panyomba ngkasimadago setu, i tadu mpanyomba sangaya-ngaya da mpanyombaka: lorinya anu mantonge rambu ndayanya,

⁴ taganya sangkani pai lorinya, pai anu lese ri atenya.

⁵ Pura-puranya sangkani-ngkani pai waʼa panyomba anu ntaninya da ndaʼombasi ri wawo lampaʼani. Wau mpasoa pangkoni anu ndaʼombasi setu mampakawongko raya i mPue.

⁶ Ane anu ndapanyombaka tila ngkasimadago setu bimba bara mbula, pinatuwu setu maya anu laki bara anu tina, podoia bereʼe posarinya.

⁷ Tau anu mampanyombaka sambaʼa bimba, bimba setu da nakeni ri Kema i mPue.

⁸ Jela njairia da nadika palenya ri wawo mboʼo bimba setu nepa nasambale ri suara ngKema. Daanya da nabubusika i ntadu mpanyomba ri aopo nculapa sudipi lampaʼani.

⁹ Tila mpanyomba ngkasimadago pai Pue, i tadu mpanyomba sangaya-ngaya da mampanyombaka ungka ri pinatuwu anu ndapanyombaka setu: lorinya, pura-pura ikunya anu mobayuya setu dan ndapole ungka ri tawu ikunya, lori anu mantonge rambu ndayanya,

¹⁰ taganya pai lorinya pai anu lese ri atenya.

¹¹ Tadu mpanyomba anu motetala ri tempo setu sangaya-ngaya da maʼombasi pura-puranya setu ri wawo lampaʼani ndapampanyombaka panyomba pangkoni tila i mPue.

¹² Ane anu ndapanyombaka setu sambaʼa mbula, tau anu mampanyombaka setu sangaya-ngaya da mangkeni mbula setu ri Kema i mPue.

¹³ Jela njairia da nadika palenya ri wawo mboʼo mbula setu nepa da nasambale ri suara ngKema. I tadu mpanyomba anu da mabubusika daa mpinatuwu setu ri aopo nculapa sudipi lampaʼani.

¹⁴ Tila mpanyomba pangkoni gala i mPue, tadu mpanyomba sangaya-ngaya da mampanyombaka mbula anu ndasampa setu, inceʼemo lorinya anu mantonge rambu ndayanya,

¹⁵ taganya pai lorinya pai anu lese ri atenya.

¹⁶ Tadu mpanyomba anu motetala ri tempo setu sangaya-ngaya da maʼombasi pura-puranya setu ri wawo lampaʼani. Wau mpasoa pangkoni anu ndapanyombaka setu setu mampakawongko raya i mPue. Pura-pura lori mpinatuwu setu gala i mPue.

¹⁷ To Isaraeli bareʼe kojo maya da mangkoni lori pai daa. Padika seʼi da nakekeni ntau seʼe rantani masae-sae pai da nalulu nto Isaraeli pura-pura ri mbeʼi-mbeʼi kareʼenya.