SETERI 8 - Sura Magali Nuntu Ngkatuwu

To Yahudi ndasongka da naka tikali maewa iwali 8:1-17

¹ Ri eo setu seʼe i Datu Ahasiwero mampepombaika ri Datu Weʼa Seteri pura-pura aga-aga i Hamani, iwali bangke nto Yahudi setu. Nepa napetumbu i Seteri ri datu, kono i Modekai setu inceʼe kasangkomponya sauncu, inceʼe painaka montepuʼu ungka ri tempo setu i Modekai ndawaika kuasa maya mancuara i datu mau bareʼe ndapeboo.

² Nayali i datu sinci anu roo ndawali ntima ungka ri Hamani, ndawaika i Modekai. Pai i Seteri mampakanoto i Modekai mangkuasai pura-pura aga-aga i Hamani.

³ Roo setu njoʼu i Seteri mancuara i datu. Mombukotu siʼa seʼi motumangi mamperapi da naka ndabalisaka tinako ndaya i Hamani anu majaʼa setu da mampepate to Yahudi.

⁴ Ndatunju i datu toko wuyawaa ri Seteri, nepa meoko i Seteri natoʼo,

⁵ “Ane mabuya rayami pai mapuru rayami ri yaku Datu, mbolimo da ndipapesuwu sura ncongka anu da mabalisaka waʼa ncura i Hamani setu, anu mantoʼo da ndapaʼopisaka pura-pura to Yahudi ri lemba mpoparentami.

⁶ Maka mau bara ewambeʼi Datu bareʼe da loʼu rayaku mangkita bancaku pai waʼa ntinaku pura ndalebatusaka?”

⁷ Mompau i Datu Ahasiwero ri Datu Weʼa Seteri pai i Modekai ndatoʼo, “Lawi roomo kuloeka i Hamani ua tinako ndayanya anu majaʼa da maʼopisaka to Yahudi setu, pai aga-aganya roomo kupepombaika ri Seteri.

⁸ Paikanya sura anu roomo ndaʼuki ri toʼo i datu pai tanda mpale i datu bareʼemo maya da ndabalisaka. Paikanya reʼe ri komi kuasa da maʼuki sura kono banca Yahudi ewambeʼi ntano anu ndiepe madago. Ndiʼukimo sura setu ri toʼoku pai ndidikaka tanda ngkamokole.”

⁹ Ri eo setu seʼe inceʼe kono 23 mbuya katatogo wuya Siwa, napeboo i Modekai waʼa sekeretarisi i datu, nepa nasongka tau seʼe mangaʼuki sura rata ri waʼa petoro, waʼa bupati pai waʼa ntau bangke ri 127 poropinci ungka ri India rata ri Sudani. Waʼa ncura setu ndaʼuki ri uki pai ri basa anu ndapake ri poropinci setu sambaʼa pai sambaʼa. Sura setu ndapakatu woʼu ri waʼa nto Yahudi, ri uki pai ri basa nto Yahudi.

¹⁰ Waʼa ncura setu nabate mpale i Modekai ri toʼo i Datu Ahasiwero pai ndadikaka tanda ngkamokole. Roo setu napokau i Modekai waʼa ntau anu mangkeni sura setu njoʼu ri waʼa poropinci, melamba ri waʼa nyara i datu anu makaliki.

¹¹ Sura setu mantotoraka, ndasintuwunakamo i Datu waʼa nto Yahudi ri sambaʼa-sambaʼa kota seʼe da mampasintuwu raya da mompatikali moʼiwali. Ane tau seʼe naungku waʼa ntau anu moparewa ri poʼiwali ungka ri banca pai poropinci mbeʼi ntano, tau seʼe maya maewa pai mampepate waʼa ntau anu mampoʼiwalika setu, da napepate sangkani rongo pai ananya, da nalebatusaka waʼa iwalinya setu rantani pura nepa da napamuru pura-pura aga-aganya.

¹² Songka setu sangaya-ngaya da ndawianaka ri samalele lemba mpoparenta Parisia ri eo anu roo napakanoto i Hamani da mampepate to Yahudi ri sampuyu pai tatogo eo mbuya kasampuyu pai radua inceʼe ri wuya Adari.

¹³ Sura ndapaʼuki songka setu sangaya-ngaya da ndapapesua ewa sambaʼa unda-unda anu da ndaparata ri pura-pura poropinci da naka waʼa nto Yahudi tikali pura-pura da maewa iwali ane ratamo ri eo anu ndapakanoto setu.

¹⁴ Malaimo kojo waʼa ntau anu mangkeni sura setu melamba ri waʼa nyara i datu. Ewanceʼe seʼe ri kota Susani potunda mpoparenta i datu, sura setu ndabasaka waʼa ntau.

¹⁵ Roo setu mesuwu i Modekai ungka ri langkanae, mampake rengko ngkamokole anu mayawuyu pai mabuya nepa napake juba anu makodara ungka ri lena anu maʼalusu pai makota wuyawa anu madolidi kojo ri woʼonya. Manggora-nggora tau ri kota Susani ua mawongko rayanya.

¹⁶ Waʼa nto Yahudi liu sasoo poʼinosaya pai mawongko rayanya, rodo rayanya pai madago naepe.

¹⁷ Ewanceʼe seʼe ri pura-pura kota pai poropinci, ri mbeʼi ntano sura ncongka i datu setu ndabasa mawongko raya nto Yahudi, mawongko-wongko raya ntau seʼe painaka mosusa. Pai maria woʼu banca ntaninya anu mesuamo mewali tina banca Yahudi, maka napokaekamo ntau banca setu.