SETERI 5 - Sura Magali Nuntu Ngkatuwu

I Seteri maʼundangi i datu pai i Hamani 5:1-7

¹ Ri eo anu katatogo popuasanya, napakemo i Seteri rengko ngkamokolenya nepa njoʼu siʼa ri tambale ri raya langkanae, mekakore siʼa ri suara dampo kareʼe poncongka i datu. Sindara setu i datu njau ri gadera mpoparenta mosuara tondo ri dampo setu.

² Pangkita i datu i Datu Weʼa Seteri mekakore ri sambalikunya, merata puru ndayanya ri siʼa, inceʼe painaka natunju toko wuyawa ri siʼa. Njoʼumo i Seteri maisu tando ntoko wuyawa setu.

³ Meoasi i datu ndatoʼo, “Nunjaa anu mewali ee datu weʼa? Nunjaa anu nupodaraya? Toʼomo! Mau rapanya nuperapi santongo lemba anu kuparenta da kuwaika siko!”

⁴ Mesono i Seteri, natoʼo, “Ane mabuya rayami Datu, sambengi seʼi, komi pai Hamani da njoʼu mangkoni ri banuaku maka reʼe pangkoni anu kupatokaka komi Datu.”

⁵ Napokau i datu da naka ronga rata i Hamani, da naka nabangani ntau peʼundangi i Seteri setu. Ratamo kojo tau seʼe ri polimbu mangkoni anu napareʼe i Seteri setu.

⁶ Ri tempo mpanginu anggoro, meoasi i datu ri Seteri, ndatoʼo, “Seʼi-seʼi toʼomo nunjaa anu nupodaraya. Nunjaa ntano anu nuperapi sangaya-ngaya da kuwaika siko, mau rapanya santongo ri lemba anu kuparenta!”

⁷ Mesono i Seteri natoʼo,

⁸ “Ane mabuya rayami Datu da mampoʼioka perapiku, mbolimo komi Datu pai i Hamani da maʼi woʼu ri polimbu mangkoni anu da kuwianaka i raneo mawengi. Nepa ri polimbu setu da kupamparata ri komi anu da kuperapi.”

I Hamani mantunggai da mampepate i Modekai 5:9-14

⁹ Maʼai kojo kawongko ndaya i Hamani ri pelwalilinya ungka ri polimbu mangkoni anu napareʼe i Datu Weʼa Seteri setu. Paikanya karatanya ri baa-baa langkanae, nakita i Modekai bareʼe sako molengko mantubunaka siʼa, maʼai kojo kaleke atenya.

¹⁰ Paikanya napolipa mantodosaka kasengke ndayanya, mewalili siʼa ri banuanya. Karatanya njairia napekitima waʼa yununya pai rongonya i Seresi da motunda-tunda mompasimbaju pai siʼa.

¹¹ Nepa mompau i Hamani ri tau seʼe mampetoʼoka waʼa ngkakoreʼenya, karia ananya tuama, kabangke lantinya anu ndawai i datu, siʼa anu ri wawo ngkabangke lantinya ungka ri pura-pura pegawai ntaninya.

¹² Natoʼo woʼu, ndipeole, “Podo yaku pai datu anu naʼundangi i Datu Weʼa Seteri, njoʼu molimbu mangkoni anu napareʼeka kami, pai i raneo mawengi kami ndaʼundangi woʼu.

¹³ Paikanya kuepe pura-pura setu bereʼe yowenya, ane ntongo kukitapa i Modekai to Yahudi setu motunda-tunda ri baa-baa langkanae.”

¹⁴ Madonge pompaunya setu, mompaumo rongonya pai waʼa yununya natoʼo ntau seʼe ewaseʼi, “Pokaumo ndapatinja nono da ndapaloeka tau setu, nono setu ruampuyu pai radua meteri kalangkatinya. Bangke reme mowuro-wuro petompakamo ri datu da ndapaloeka i Modekai ri nono setu. Ane ewanceʼe da nuleʼomo njoʼu ri polimbu setu ri karodo ndayamu.” Totoraka setu madago kojo malulu parata ndaya i Hamani, inceʼe painaka napokaumo tau mantinja nono da ndapaloeka i Modekai.