SETERI 4 - Sura Magali Nuntu Ngkatuwu

I Modekai mekipelae ri Seteri 4:1-17

¹ Butu nadonge i Modekai nunjaa anu mewali setu, nasiati rengkonya, napake karu tanda ngkapari ndayanya. Nadika awu ri tanoananya, nepa malinja siʼa ri raya ngkota seʼi moenta-enta tumangi ua kasusa ndayanya.

² Nepa meʼonto siʼa ri suara baa-baa langkanae, maka tau anu morengko karu bareʼe maya mesua.

³ Ewanceʼe seʼe waʼa nto Yahudi ri pura-pura poropinci mokukuou butu nadonge songka i datu setu. Tau seʼe mopuasa pai motumangi meʼode-ode, maria ri oyo ntau seʼe anu mamporengko karu nepa moturu ri awu.

⁴ Butu napetumbu waʼa anaweʼa waʼa mpegawai anu lawi ndapatani da mamporiokoi i Datu Weʼa Seteri kono nunjaa anu napowia i Modekai, maʼai kojo kasusa ndaya i Seteri. Napakatu rengko ri Modekai da nasawanika rengko karunya, paikanya bareʼe napokono mantarima.

⁵ Ungka lairia napeboo i Seteri i Hata, siʼa sambaʼa pegawai anu ndadika i datu da mamporiokoi i Seteri. Napokau i Hata da mampeoasi ri Modekai nunjaa anu ntongo mewali pai i wenu painaka siʼa mowia ewancetu.

⁶ Njoʼumo kojo i Hata madadu i Modekai ri tana lapa ngkota ri suara baa-baa langkanae.

⁷ Napaumo i Modekai nunjaa anu da mewali pai sangkuja imba doi salaka anu najanji i Hamani da nawaika i datu, ane puramo naʼopisaka waʼa nto Yahudi.

⁸ Nawai woʼu i Modekai ri Hata sura pampalimba bangani ncura i Datu anu ndaparatamo ri kota Susani anu banganinya inceʼemo songka da maʼopisaka to Yahudi. Napokau i Hata da mawaika i Seteri sura setu pai da mantotorakaka siʼa wuwunya anu mewali setu, pai mamperapi woʼu i Seteri da naka njoʼu mancuara i datu, merapi kapuru ndaya i Datu tila bancanya.

⁹ Njoʼumo kojo Hata madadu i Seteri mampetumbu patuu i Modekai.

¹⁰ Paikanya napokau muni i Hata njoʼu mampetumbuka i Modekai patuu anu ewaseʼi,

¹¹ “Pura-pura tuama bara weʼa anu bareʼe ndapeboo pai njoʼu mancuara i Datu ri langkanae, sangaya-ngaya da ndahuku mate. Inceʼe sambaʼa unda-unda kono tau pura-pura, montepuʼu ungka waʼa ntau topontotoraka i datu nakarataka ri waʼa ntau sondo ri poropinci paka maincani unda-unda setu. Podo sangaya jaya da kalapa ungka ri unda-unda setu, inceʼemo: ane ri kanjoʼu ntau setu ndatonju i datu toko wuyawa ri tau setu. Ane ewanceʼe pewalinya tau setu da ndatuwuri. Paikanya sambuyamo seʼi, yaku bareʼe ndapeboo i datu.”

¹² Njoʼu woʼu i Hata mampetumbuka i Modekai patuu i Seteri setu.

¹³ Inceʼe napakatu i Modekai patiendo anu ewaseʼi ri Seteri, “Neʼe nusarumaka siko da madago katuwumu painaka waʼa nto Yahudi ntaninya, maka siko maroo-roo ri langkanae!

¹⁴ Waʼa nto Yahudi sangaya-ngaya da mangarata petulungi, bara ewambeʼi ntano jayanya tau seʼe da tesorepaka. Paikanya ane siko podo monjii-njii ri tempo anu ewanceʼi, siko ngkaliomu da mate pai waʼa ntina mpapamu da posamo. Bareʼe taincani bara ua katedinaka anu ewanceʼi painaka siko ndapilisi mewali datu weʼa!”

¹⁵ Karata mpatiendo i Modekai setu, napakatu i Seteri patuu ri Modekai ewaseʼi:

¹⁶ “Pasambakamo pura-pura to Yahudi anu reʼe ri kota Susani seʼi mampekakaika yaku. Tau seʼe neʼe mangkoni bara manginu togo ndeme togo mbengi. Yaku woʼu pai waʼa anaweʼa anu mamporiokoi yaku da mopuasa. Roo setu yaku da njoʼu mancuara i datu, mau powiaku setu malumpaʼi unda-unda. Ane inceʼemo wereku mbolimo yaku mate.”

¹⁷ Malaimo i Modekai nawianaka kojo anu napepatuuka i Seteri ri siʼa.