SETERI 3 - Sura Magali Nuntu Ngkatuwu

I Hamani mantinako ndaya da maʼopisaka to Yahudi 3:1-15

¹ Bara sangkuja ngkasae ungka njairia i Datu Ahasiwero malanti tau sambaʼa i Hamani toʼonya mewali ampu lemba. I Hamani seʼi ana i Hamedata ungka ri muli i Agagi.

² Nasongka i datu da naka waʼa mpegawainya da mantubunaka i Hamani pai da mombukotu ri suaranya. Pura-pura pegawai setu mawianaka songka setu, podo i Modekai anu bareʼe napokono mawianaka.

³ Waʼa mpegawai ntaninya ri langkanae meoasi ri Modekai, wenu painaka siʼa maewa songka i datu,

⁴ sandeme-sandeme tau seʼe mangkanarasi siʼa da naka nalulu songka setu, paikanya bareʼe napokono mangalulu. Natoʼo i Modekai, “Yaku seʼi to Yahudi; yaku bareʼe da manyomba ri tolino.” Inceʼe painaka napetumbu ntau seʼe pau i Modekai setu ri Hamani, maka da raya ntau seʼe mangkita ewambeʼi pewalinya da ndapampowia i Modekai.

⁵ Maʼai kojo kajaʼa ndaya i Hamani butu naincani i Modekai bareʼe mombukotu manyomba ri siʼa.

⁶ Pai butu naincani kaʼi Modekainya seʼi sambaʼa to Yahudi, napakanotomo da napahuku i Modekai, pai banya podo siʼa paikanya da naʼopisaka pura-pura to Yahudi anu reʼe ri raya mparenta Parisia.

⁷ Ri taʼu kasampuyu pai radua poparenta i Datu Ahasiwero, kono ri wuya kaʼisa inceʼe wuya Nisani, napokau i Hamani tau mantende dadu anu ndapapotoʼo “purimi” da mampakanoto eo pai wuyanya anu singkono da napawianaka tinako ndayanya anu majaʼa setu. Napakanotomo ri sampuyu pai tatogo eo mbuya kasampuyu pai radua inceʼemo wuya Adari.

⁸ Mompau i Hamani ri datu, natoʼo, “Datu, reʼe sambaʼa banca anu ntani-ntaninya tepujaamo ri samalele poropinci ri ara mparentami. Waʼa adanya mosisala kojo pai ada waʼa banca ntaninya. Tau seʼe bareʼe mepoʼinaya ri waʼa unda-unda ngkamokolemi. Mewali da kadagonya Datu, neʼe ndipapaliuka tau seʼe mowia gori mpepokono ndayanya.

⁹ Ane ndisintuwunaka Datu, mbolimo ndipareʼe songka anu da maʼopisaka waʼa ntau setu. Pai ane nditarima parata ndayaku seʼi, sangaya-ngaya da kukoto mampapesua meruu 340.000 kilo salaka ri peti mpadika doimi Datu.”

¹⁰ Madonge pompau i Hamani setu ndayali i Datu sincia anu ndapake mentandai waʼa ncongka, ndawaika i Hamani, iwali bangke nto Yahudi setu.

¹¹ Ndatoʼo i Datu ri siʼa, “Banca setu sangkani pai waʼa doinya kupepombaika ri siko. Powiamo nunjaa anu nuepe madago ri waʼa ntau seʼe.”

^12-13 Inceʼe painaka ri sampuyu pai tatogo wuya kaʼisa, napeboo i Hamani waʼa sekeretarisi i datu. Tau seʼe nasongka da mampowia sura silulu pai anu natotorakaka tau seʼe pai sura setu da ndapalimba ri mpengaya-ngaya basa pai da ndapalimba ri mpengaya-ngaya urupu anu ndapake ri pura-pura lemba. Sura setu da ndaʼuki ri toʼo i Datu Ahasiwero pai da ndatandaika sincia, nepa da ndapakatu maliga-liga ri pura-pura tau anu makuasa, petoro pai waʼa ntau bangke ri pura-pura poropinci. Bangani ncura setu inceʼemo, ri sampuyu pai tatogo eo mbuya Adari pura-pura to Yahudi, tuʼa mangura, weʼa pai waʼa ananggodi sangaya-ngaya da ndapepate neʼe boi ndapepurungi, pai waʼa aga-aga ntau seʼe da ndatima.

¹⁴ Songka setu sangaya-ngaya da ndaparata ri pura-pura poropinci da naka pura-pura tau da tikali ri eo anu roo ndapakanoto setu.

¹⁵ Waʼa ntau anu ndapokau mangkeni sura setu maliga kojo palainya ri samalele lemba pai poropinci ri ara mparenta i Ahasiwero. Ua songka i Datu, songka setu woʼu ndapetumbu ri Susani kota kanjau mpotunda i Datu Parisia. Roo setu i datu pai i Hamani motunda-tunda manginu anggoro. Paikanya tau ri kota Susana guagamo ua songka setu.