SETERI 2 - Sura Magali Nuntu Ngkatuwu

I Seteri mewali datu weʼa 2:1-18

¹ Bareʼe masae ungka njairia, mandamo karau ndaya i datu, paikanya ntongo nanawa-nawa powia i Datu Weʼa Wasati pai botusi huku anu napapakoyoka siʼa.

² Inceʼe painaka waʼa nto pontotoraka anu mosu kojo pai Datu, mamparataka sira parata ndaya ntau seʼe, ewaseʼi, “Moruana da ndapepalika i Datu waʼa anaweʼa anu madolidi.

³ Da ndituju Datu waʼa mpegawai ri pura-pura poropinci anu ndiparenta seʼi da mapepali anaweʼa anu madolidi da nakeni ntau seʼe pura-pura ri langkanae mbeʼa ri Susani seʼi; i Hegai sambaʼa tau anu ndasarumaka da mewali tadulako ncombori langkanae waʼa mbeʼa, siʼa anu da mampasilolongani waʼa mbeʼa setu pai da mampakadolidi waʼa mbeʼa setu.

⁴ Roo setu komi ngkaliomi Datu anu da mampilisi anaweʼa mbeʼi anu maʼai pampokonomi, inceʼe anu da ndalanti mewali datu weʼa mancawani i Datu Weʼa Wasati.” Nasintuwunaka i datu totoraka setu liu-liu ndawianaka.

⁵ Ri kota Susani, reʼe sambaʼa to Yahudi i Modekai toʼonya ana i Yairi. Siʼa muli i ngKisi pai Simei ungka ri lemba i Benyami.

⁶ I Modekai ndatawani ungka ri Yerusale, montepuʼu ungka ri panangi i Nabukanesa mokole nto Babeli kota Yerusale. I Modekai ndatawani ri Yerusale sangkani-ngkani pai i Yoyaki mokole nto Yahuda setu, simpoyunu pai tawani anu sondo.

⁷ Reʼe sambaʼa kasangkomponya sauncu anu magaya lionya pai potari ngkoronya, pai lawi madolidi kojo taʼanya i Seteri toʼonya, ane toʼonya ri basa Ibarani i Hadasa. I Seteri seʼi ilu pusamo, siʼa mewali ana anu napatuwu i Modekai, napokapuru ewa ana ngkoronya ngkalionya.

⁸ Butu ndaparatamo songka ri datu setu, maria kojo anaweʼa anu ndapasambaka ri Susani, ri oyo waʼaanaweʼa setu njaumo i Seteri. Siʼa woʼu ndakeni ri langkanae i Datu ndapepombaika ri Hegai tadulako ncombori waʼa mbeʼa.

⁹ Tengiri raya i Hegai mangkita i Seteri pai tenoʼo rayanya ri siʼa. Inceʼe painaka i Seteri naporewu mpodago, napakadolidi pai nawaika pangkoni anu ndapilisi. I Seteri nadika ri lincu anu meawa kojo ri langkanae waʼa mbeʼa setu. nadika njairia papitu anaweʼa anu loʼe kojo ri langkanae setu anu da mamporiokoi siʼa.

¹⁰ Roomo natotoraka i Modekai i Seteri, da naka neʼe boi natoʼoka tau kasiʼanya sambaʼa to Yahudi.

¹¹ Sandeme-sandeme i Modekai melinja-linja ri suara langkanae mbeʼa setu da mampeoasi ewambeʼi katedikanaka i Seteri pai ewambeʼi da pewalinya kono siʼa.

¹² Malulu ada, waʼa mbeʼa setu da ndaporewu ri raya anu santaʼu kasaenya da ndapakadolidi; aono mbuya da ndariuka lana ndagaloka dupa, roo setu aono mbuya woʼu da ndariuka lana anu ndagaloka anu mawongi. Roo inceʼe nepa sambaʼa-sambaʼa anaweʼa setu da marata gilira mancuara i Datu Ahasiwero.

¹³ Ri da kanjoʼu mancuara i datu sambaʼa-sambaʼa anaweʼa setu maya mampake parewa pompakadolidi malulu pepokononya.

¹⁴ Siʼa da ndakeni mawengi ri langkanae i datu, bangke reme da ndakeni ri langkanae ntaninya, njairia siʼa da napasilolongani i Saasigasi, siʼa sambaʼa tau anu ndadika da mamporewu waʼa rongo piara i datu. Anaweʼa setu bareʼemo maya mancuara i datu, sangadi ndatinako ndaya i datu mampeboo pai ndatoʼo toʼonya.

¹⁵ Ratamo gilira i Seteri da njoʼu mancuara i datu. – I Seteri setu ana i Abihai, kasangkompo sauncu pai Modekai anu mampatuwumo siʼa ewa ana ngkoronya; i Seteri naunde ntau ungka anu mangkita siʼa. Ri kanjoʼunya mancuara i datu siʼa mampake rengko malulu totoraka i Hegai tadulako langkanae waʼa mbeʼa setu.

¹⁶ Ewanceʼemo ri taʼu kapapitu poparenta i Ahasiwero ri wuya kasampuyu inceʼemo wuya Tebeti, i Seteri ndakeni mancuara i Datu Ahasiwero ri langkanae i datu.

¹⁷ Tongawa kojo, siʼa mampakawongko pai mampakalindo raya i datu meruu pai waʼa anaweʼa anu ntaninya. Inceʼe painaka siʼa maʼai ndapampomawo i datu. Ndapataka i datu makota ngkamokole ri woʼo i Seteri tanda kasiʼanya mewali Datu Weʼa mancawani i Datu Weʼa Wasati.

¹⁸ Roo setu napareʼe i datu posusa bangke mantubunaka i Seteri, ndapeboo pura-pura waʼa mpegawai pai waʼa ntau bangke. Napoparentaka eo mpeosa ri samalele poparentanya pai mampotilaka pombai anu gana-gana.

I Modekai mantuwuri i datu 2:19-23

¹⁹ Ri tempo setu i Modekai nalanti i datu mewali pegawai negara.

²⁰ Rantani rata ri tempo setu bareʼepa natoʼo-toʼo i Seteri ri datu kasiʼanya sambaʼa to Yahudi, maka napetangani i Modekai. Mepoʼinaya kojo i Seteri ri Modekai ewa ntongo kaʼananggodinya ri napampatuwu kasangkomponya sauncu setu siʼa.

²¹ Ri anu sandeme sindara i Modekai motetala ri langkanae, reʼe radua topotetala anu ndapatani i datu i nceʼemo: i Bigitani pai i Teresi, mogombo da mampepate i Datu Ahasiwero, maka maʼai napampobanciika sira.

²² Tinako ndaya ntau radua setu naincani i Modekai, painaka maliga-liga njoʼu napetumbuka i Seteri. Bareʼemo nalantu i Seteri liu-liu napauka i datu nunjaa anu napetumbu i Modekai setu.

²³ Ndaparesa tau radua setu, tongawa nunjaa anu natoʼo i Modekai setu monco kojo. Tau radua setu ndahuku mate ndaloeka. Silulu pai songka i datu, anu mewali setu ndaʼuki ri raya ncura tuntuka negara.