Sakharia 9 - Sura Magali Nuntu Ngkatuwu

Pobotusi ri waʼa negara samposori Isaraeli 9:1-8

¹ Ewaseʼi nuntu i mPue. Sira mangabotusimo da mangahuku tana Hadara pai kota Damasi. Banya podo waʼa lemba nto Isaraeli, paikanya ibukotanya Siria i Pue tumpunya.

² Hamati anu motida pai Hadara Sira seʼe tumpunya, ewanceʼe seʼe kota Tiru pai Sidoni sangkani pai kaloʼe waʼa ntaunya.

³ Tiru mangawangumo waʼa bentenya pai mampasambaka wuyawa anu sondo pai salaka, painaka jamo ewa aga-aga anu biasa ewa rangiʼi pai loge ri jaya.

⁴ Paikanya i Pue da mampapewali siʼa kaasi-asi. Pura-pura kakoreʼe ngkota setu da ndatajika ri tasi pai kota setu da pura nakoni apu.

⁵ Kota Asikelo pai Gasa da mangkita pai da maeka. Ekero da mangangkita woʼu painaka paya pura-pura pampomata-matanya. Gasa da tetaji mokolenya pai Asikelo da mewali njii bemoreʼe tau mampeari.

⁶ Asido da napeari banca anu sigalo. Ndatoʼo i mPue, “To Pelisiti anu mekiunde setu da Kuropu.

⁷ Tau seʼe bareʼe da mangangkoni wayawo anu ntongo madaa-daa bara pangkoni ntaninya anu kamonconya bemaya ndakoni. Pura-pura tau anu ntongo totaʼapa da mewali tau-Ku pai da ndareke ewa santila ungka ri lemba Yahuda. Ekero da mewali anggota waʼa ntauku da ewa Yebusi owi.

⁸ Yaku da mangajagai tana-Ku pai da mangayawati wʼa ncurodado ntau mencua anu da malempo. Bareʼe da kuwai waʼa ntopojeani mampowatua waʼa ntau-Ku. Maka Kukitamo kapari ntau seʼe.”

Mokole anu da rata 9:9-10

⁹ Ee bangani Sioni, pakawongkomo rayamu! Ee bangani Yerusale, ponggoramo! Peolemo! Mokole rata mangkeni penangi! Siʼa Mokole anu mayoa anu mangkeni katesorepaka. Paikanya Sira lauka raya, Sira rata mampelamba kalide, sambaʼa kalide anu mangurapa.

¹⁰ Ndatoʼo i mPue, “Waʼa ngkareta mpoʼiwali ungka ri Eparai da kutajika, pura-pura nyara ri Yerusale da Kupapaya pai pura-pura pana da Kulesaki. Mokolemu da mamposongkaka kasimadago ri oyo waʼa banca. Ungka ri tasi sambaka njoʼu ri tasi sambaka siʼa da makuasa, ungka ri Koro Eparata rata ri tando lino.”

Pawali wangu muni katedikanaka ntau i mPue Ala 9:11-17

¹¹ Ndatoʼo i mPue ri waʼa ntaua, “Ua pojanji anu kupareʼe pai komi pojanji anu ndaraasika daa mpanyomba anu ndapanyombaka, da kulapasaka waʼa mpalilimu anu maepe pari ri pantawani ewa tau anu manawu ri raya ntibubu anu mangau.

¹² Pewalilimo ee waʼa ntau anu ndataji, seʼi-seʼi komi reʼemo pampomata-mata. Pewalilimo ri kareʼe mpetatondomu, Yaku bareʼe bali-bali mangadonco komi. Pedongeka, komi da kudonco ruangkani karianya ua waʼa ngkapari ua ndiepemo.

¹³ Yahuda da kupake ewa pomakoje, pai Isaraeli ewa mata mpana anu jamo da ndapepanaka. Bangani Siono da kupake ewa penai; pai penai setu da kuungku waʼa nto Yunani.”

¹⁴ I Pue da mampapamara koroa ri waʼa ntau-A ewa pesindi ngkila da pesupalaka waʼa mata mpanaa. I Pue Anu Ndate ri Peawanya da mantawuisi surupeta petondoni mpopaungku, nepa melinja ri raya lompiu ungka ri selata.

¹⁵ Waʼa ntau-A manoto da ndapangkariani, inceʼe painaka waʼa iwali da nanangi ntau seʼe. Da ewa pekiu ntau anu mayangu ua manginu, ewanceʼe seʼe pekiu ntau seʼe ri pombetoto. Ewa daa mpanyomba anu ndabubu ri wawo lampaʼani ewanceʼe seʼe da katebubu daa iwali ntau seʼe.

¹⁶ Ane ratamo eo setu, i Pue da mancorepaka waʼa ntaua, da ewa topongkambi mancorepaka bimbanya ungka ri karugi. Tau seʼe da merara ri tana i mPue, da ewa paramata makota anu mengkido-ngkido.

¹⁷ Da maʼai ngkalese tana i mPue setu raneonya. Maʼai ngkalese pai meawa! Njairia anggoro pai gandu da tuwu malimbokori, mampopuʼu waʼa mpemuda terangani karosonya.