Sakharia 8 - Sura Magali Nuntu Ngkatuwu

I Pue mojanji da mawali wangu muni Yerusale 8:1-23

¹ I Pue Anu Makuasa mawai nuntu ewaseʼi ri yaku,

² “Da rayaku kojo da mampelae Yerusale, maka Yaku maʼai kupampotowe waʼa ntaunya, pai ua towe-Ku setu, mapane rayaku ri waʼa iwali ngkota setu.

³ Yaku da mewalili ri Yerusale, kota-Ku anu magali setu. Yerusale da tetoʼo ewa sambaʼa kota anu todo. Pai pongkuntana i mPue Anu Makuasa da natoʼo Pongkuntana Magali.

⁴ Ri tana lapa ngkota Yerusale, da motunda-tunda muni waʼa ngkai pai tuʼa anu maʼaimo ngkatuʼa jamo da motoko.

⁵ Waʼa jaya ri raya ngkota da buke muni pai waʼa ananggodi anu molega.

⁶ Inceʼe da natoʼo waʼa ntau anu tuwupa wawaseʼi bareʼe da mewali, paikanya ri Yaku inceʼe sangaya-ngaya da mewali.

⁷ Yaku da mancorepaka waʼa ntauku ungka ri waʼa lemba pangkeni tau seʼe,

⁸ pai da mangkeni mpewalili tau seʼe ungka ri pebete pai ungka ri kasoyoa, da naka meari muni ri Yerusale tau seʼe, Yaku da mamparenta tau seʼe ri katodo pai ri kayoa.”

⁹ Ndatoʼo i mPue ri waʼa ntaua, “Ndipakaroso rayami! Seʼi-seʼi da ndidonge waʼa mpau anu roomo woʼu natoʼo waʼa nabi sindara mpadika pondasi ri da pawangu muni Banua-Ku.

¹⁰ Ri kabareʼepanya mewali inceʼa bareʼe anu mangkoto mancaro tau bara pinatuwu, pai bereʼe anu maepe kaʼunonya ungka ri iwali. Yaku roo mampapombeluku tau sambaʼa pai tau anu ntaninya.

¹¹ Paikanya seʼi-seʼi waʼa ntau anu tuwupa ungka ri banca seʼi Kupowia banyamo ewa iʼowi.

¹² Tau seʼe da mancawu inii ri kalindo ndaya. Waʼa mpuʼu anggoro ntau seʼe da mowua, tana mawai wuanya, pai da tudu uja gana-gana. Waʼa mpopadonco setu da Kuwai ri waʼa ntau anu tuwupa ungka ri banca seʼi.

¹³ Ee bangani ngkota Yerusale pai Isaraeli! Ri tempo anu ndaliunaka, ane waʼa ntau mencua mombetadeasi, natoʼo ntau seʼe, ‘Tuarapa rugi anu mamperemo Yahuda pai Isaraeli da mampere siko woʼu!’ Paikanya Yaku da mancorepaka komi, painaka waʼa ntau mencua, da mombetoʼo ngkalionya, ‘Mbolimo popadonco da tudu ri Yahuda pai Isaraeli, da tudu woʼu ri koromu!’ Inceʼe painaka pakarosomo rayamu pai neʼe maeka!”

¹⁴ Ndatoʼo i mPue Anu Makuasa, “Ri tempo waʼa ntau piamomi mangkelo karau ndaya-Ku, kubotusi da mangahuku tau seʼe ri kajaʼanya. Bareʼe Kuwalisaka botusiku setu, paikanya Kuwianaka.

¹⁵ Paikanya seʼi-seʼi Yaku da mangadonco bangani Yerusale pai bangani Yahuda. Mewali neʼe maeka.

¹⁶ Seʼimo waʼa ncongka anu sangaya-ngaya da ndiwianaka: Ane mompau toʼomo anu monco ri kasiyunumu. Waimo botusi anu mayoa ri pobotusi pai anu mangkeni kasimadago.

¹⁷ Neʼe marencana anu majaʼa ri kasiyunumu. Neʼe nupasowa posabi mbamba. Kupocanciika lopu pai podenggo pai pejeani.”

¹⁸ I Pue Anu Makuasa mawai nuntu seʼi ri yaku tila waʼa ntaua,

¹⁹ “Puasa anu ndawianaka ri wuya kaʼaopo, kaʼalima, kapapitu pai kasampuyu da mewali waʼa mposusa anu madoro kojo pai kawongko ndaya bangani Yerusale. Pomawomo kamonco pai kasimadago!”

²⁰ Ndatoʼo i mPue Anu Makuasa, “Da rata tempoya waʼa ntau ungka waʼa ngkota anu ntaninya da maʼai ri Yerusale.

²¹ Waʼa ntau ungka ri kota sambaʼa da mangantoʼoka waʼa ntau ungka ri kota ntaninya, ‘Maʼimo kita njoʼu manyomba ri Pue Anu Makuasa pai merapi popadoncoa. Ndikaligamo pai kami!’

²² Mewali maria tau pai maria banca anu maroso da rata ri Yerusale da mampanyomba i Pue Anu Makuasa pai merapi popadonco.

²³ Ri eo-eo setu sampuyu tau mencua da rata ri to Yahuda mantoʼo, ‘Kami seʼe daraya mami morasi ewa komi; maka kadonge Pue Ala mangadonco komi.’ ” I Pue Anu Makuasa mantoʼomo seʼi.