Sakharia 6 - Sura Magali Nuntu Ngkatuwu

Pepatongawa kono aopo kareta mpoʼiwali 6:1-8

¹ Kurata woʼu pepatongawa anu ntaninya. Sangkani seʼi kukita aopo kareta mpoʼiwali mesuwu ungka ri oyo radua buyu tambaga.

² Waʼa ngkareta setu nanoʼo teradua nyara, anu kaʼisa radua nyara mawaa, anu karadua radua nyara maeta,

³ anu katatogo radua nyara mabuya pai anu kaʼaopo nanoʼo radua nyara loba.

⁴ Meoasi yaku ri malaʼeka setu kutoʼo, “Tua, nunjaa posokinya waʼa ngkareta mpoʼiwali setu?”

⁵ Mesono sira ndatoʼo, “Tau seʼe da njoʼu ri aopo payompo yangi, ane roomo njoʼu mancuara i Pue tumpu ntana pai yangi.

⁶ Kareta mpoʼiwali anu nanoʼo nyara maeta da njoʼu ri Babeli utara. Nyara buya da njoʼu ri kasoyoa pai nyara loba da njoʼu ri negara selata.”

⁷ Butu mesuwu nyara anu loba setu, ndakita bareʼemo rodo tau seʼe da malaimo mamparesa lino! Malaimo kojo tau seʼe.

⁸ Roo setu meboo malaʼeka ri yaku ndatoʼo, “Nyara anu njoʼu ri Babeli setu mampakamandamo karau ndaya i mPue.”

Songka da mampatokaka i Yosua makota 6:9-15

⁹ I Pue mawai nuntu seʼi ri yaku,

¹⁰ Ndatoʼo, “Timamo panyomba anu nawai i Heledai, Tobia pai Yedaya, waʼa ntau anu nepa mewalili ungka ri kareʼe mpantawani ri Babeli. Ganggaramo nakeni panyomba ntau seʼe setu ri banua i Yosia ana i Sepanya.

¹¹ Ungka ri wuyawa pai salaka anu nawai ntau seʼe setu, powiamo sambaʼa makota pai patakamo ri woʼo i nTadu mPanyomba Bangke Yosua ana i Yosada.

¹² Toʼoka siʼa Yaku Pue Anu Makuasa mantoʼo, ‘Tau anu ndatoʼo I Wayonya da mowua tetalanya ri kareʼenya pai siʼa da mangawangu Banua i mPue.

¹³ Siʼamo anu mangawangunaka Banua-Ku pai da mangarata pebangkei ewa sambaʼa mokole, pai siʼa da mamparenta palilinya. Sambaʼa tadu mpanyomba da maawei siʼa pai tau seʼe da motetala mpodago sangkani-ngkani.’

¹⁴ Makota setu da ndidika ri Banua-Ku da ndapampatiendo i Heledai, i Tobia, Yedaya, pai i Yosia.

¹⁵ Waʼa ntau da rata ungka ri kalwanya da mantulungi pawangunaka Banua-Ku. Ane roomo pombangunaka setu, nepa da naincani ntau seʼe ka-Yakunya Pue Anu Makuasa mampokaumo siko njoʼu ri tau seʼe. Pura-pura setu da tepewali anu monco kojo tau seʼe mawianaka waʼa ncongka-Ku, Pue Ala pue ntau seʼe.”