Sakharia 5 - Sura Magali Nuntu Ngkatuwu

Pepatongawa kono yuyu ngkaratasa anu moyoko 5:1-4

¹ Kukomatasi woʼu, pai sangkani seʼi kukita sambaʼa sura ndakoyuyu moyoko ri raoa.

² Meoasi malaʼeka setu ri yaku ndatoʼo, “Nunjaa anu kukita?” Kutoʼo, “Sambaʼa yuyu ncura moyoko ri raoa. Karatenya sasio meteri pai kabininya aopo santongo meteri.”

³ Nepa ndatoʼoka yaku, “Ri raya ncura ndayuyu setu, lau ndaʼuki tadeasi tila samallele ntana seʼi. Ri anu santake lau ndaʼuki, waʼa ntopangangka da ndapapesuwu ungka ri tana seʼi.Pai ri take anu ntaninya lau ndaʼuki anu mosabi mbamba woʼu da ndapapesuwu.

⁴ Ndatoʼo i mPue Anu Makuasa tadeasi setu da ndapakonoka ri banua waʼa ntopangangka pai banua waʼa ntau anu mancabi mbamba. Waʼa banua setu bareʼe bali-bali da kono ntadeasi rantani mewali awu.”

Pepatongawa kono weʼa ri raya ngkaranji 5:5-11

⁵ Ratamo woʼu malaʼeka setu ri yaku ndatoʼo, “Peole! Reʼe woʼu anu rata!”

⁶ Meoasi yaku kutoʼa, “Nunjaa setu?” Mesono sira ndatoʼo, “Sambaʼa karanji. Inceʼe lambangi ncalaa samalele ntana seʼi.”

⁷ Karanji setu reʼe tutunya tamoro. Ntongo kupatomata, teʼokota tutunya, tongawa bangani ngkaranji setu inceʼe sambaʼa weʼa motunda ri rayanya.

⁸ Ndatoʼo malaʼeka setu, “Weʼa seʼi inceʼe lambangi njaʼa.” Nepa narukubaka weʼa setu ri raya ngkaranji, nepa natutuwi muni karanji setu.

⁹ Metingara yaku kukita reʼe weʼa radua moyoko maʼi ri yaku. Tau seʼe mampotumpu pani anu makogangi ewa pani ntonci kando. Natima ntau seʼe karanji ngena nepa nakeni mpoyoko.

¹⁰ Meoasi yaku ri malaʼeka setu kutoʼo, “Ri mbeʼi da napangkeni ntau seʼe karanji setu?”

¹¹ Mesono sira ndatoʼo, “Ndeku ri Babeli, njairia da ndawanguka siʼa banua lamoa galanya. Ane roomo banua lamoa setu, karanji setu da ndadika njairia da ndapanyomba.”