Sakharia 4 - Sura Magali Nuntu Ngkatuwu

Pepatongawa kono potunda ncilo 4:1-14

¹ Rata woʼu malaʼeka anu mompaumo pai yaku mangalike yaku, ewa mangalike tau anu yore.

² Meoasi ri yaku ndatoʼo, “Nunjaa anu nukita?” Mesono yaku kutoʼo, “Sambaʼa potunda ncilo wuyawa. Ri wuntunya ndate kareʼe lananya, pai mantolilimi inceʼe njau silo papitu, sambaʼa-sambaʼa seʼe reʼe papitu sumbunya.

³ Ri tondo mokaii pai mokana potunda ncilo setu njau radua mpuʼu saitu.”

⁴ Ungka lairia meoasi yaku ri malaʼeka setu kutoʼo, “Tua, petondoni nunjaa anu natuju waʼa aga-aga setu?”

⁵ Mesono malaʼeka setu ndatoʼo, “Ara bareʼe nuincani? Mesono yaku kutoʼo, “Bareʼe kuincani Tua!”

^10b Ndatoʼo malaʼeka setu ri yaku, “Silo papitu setu inceʼemo mata i mPue anu mampetiro sambawo lino.”

¹¹ Nepa meoasi woʼu yaku kutoʼo, “Nunjaa posokinya puʼu saitu radua anu njau ri kaii kana potunda ncilo setu?

¹² Pai nunjaa woʼu posoki radua raʼa saitu ri sori radua pipa wuyawa poili lana setu?”

¹³ Ndatoʼoka yaku, “Ara bareʼe nuincani?” Mesono yaku kutoʼo “Bareʼe kuincani tua.”

¹⁴ Ndatoʼoka yaku, “Incetu inceʼemo tau radua anu roo Ndapilisi i mPue tumpu ntau-A pai yangi anu ndapakanoto mamporiokoi Sira.”

Janji i m Pue ri Serubabeli 4:6-10a

⁶ Malaʼeka setu mampokau yaku da mangantoʼoka i Serubabeli nuntu mPue ewaseʼi, “Banya ua roso ncurodado pai banya woʼu ua rosomu ngkaliomu mampapowua tetalamu, paikanya pai Inosa-Ku.

⁷ Mau ewa pounda-unda buyu ntano anu mancalempori da tewawence ungka ri suaramu. Siko da mawali wangu muni Banua-Ku, pai ri tempo pampatundamu watu mpancuʼu ri kareʼenya, waʼa ntau da meboo natoʼo, “Adee, ara madolidisa!”

⁸ Nepa rata woʼu nuntu anu ntaninya ungka ri Pue.

⁹ Ndatoʼo, “I Serubabeli madikamo pondasi Banua-Ku, pai siʼa da mamparoo pombangunaka seʼi pura-pura. Ane tepewalimo inceʼe da naincanimo waʼa ntau-Ku ka-Yakunya anu mampokaumo siko Sakaria ri tau seʼe.

^10a Reʼe tau anu mampemaa-maa anu mewali seʼi. Paikanya da nakita ntau seʼe da napampaliu i Serubabeli pawangunaka Banua-Ku, pai da mawongko raya ntau seʼe.”