Sakharia 3 - Sura Magali Nuntu Ngkatuwu

Pepatongawa kono Tadu mPanyomba Bangke 3:1-10

¹ Ri pepatongawa anu ntaninya woʼu, i Pue mampapakitaka yaku Tadu mPanyomba Bangke njau mekakore ri suara malaʼeka i mPue. Ri sambali i Yosua mekakore sambaʼa Seta anu tikalimo da mantuluri siʼa.

² Ndatoʼo malaʼeka i mPue ri Seta, “Tuarapa i Pue mangahuku siko ee Seta! Mbolimo i Pue mampokapuru Yerusale pai mahuku siko. Tau seʼi jamo ewa tompo ayuta anu ndanoʼosaka ungka ri reka apu.”

³ I Yosua mekakore njairia mampake rengko anu maʼai ngkakeʼonunya.

⁴ Inceʼe painaka natoʼo malaʼeka setu ri waʼa ntoporioko ri suruga, “Tajikamo rengko anu keʼonu anu napake ntau seʼi.” Nepa natoʼoka i Yosua, “Salaamu roomo kutaji, siko da kuwaika rengko anu dawoʼu.”

⁵ Nepa napokau waʼa ntoporiokonya mampataka suruba anu bareʼe keʼonu ri woʼo i Yosua. Nawianaka ntau seʼe, roo setu napatakaka rengko anu dawoʼu i Yosua, naole-oleka malaʼeka i mPue.

⁶ Roo ewanceʼe, malaʼeka i mPue setu mamparataka i Yosua pau i mPue ewaseʼi,

⁷ “Ane nululu waʼa mpadika-Ku pai nuwianaka waʼa ntetala anu Kuwaika siko, maya siko mpaliu mewali topombawanaka ri raya Banua-Ku pai mampasilolongani tambalenya. Yaku da mampedongeka waʼa mpekakaimu, ewa kupampedongeka waʼa mpekakai malaʼeka anu reʼe ri sori-Ku.

⁸ Pedongekamo ee Tadu mPanyomba Bangke Yosua, ewanceʼe seʼe komi waʼa ntadu mpanyomba anu mewali yununya, komi pura-pura mewali petondoni reme da rata anu madago. Ri tempo setu Yaku da mangampokau watua-Ku anu ndapapotoʼo, ‘I Wayonya’.

⁹ Kudika ri suara i Yosua saogu watu anu mosuno papitu anu da Kuwoti pai waʼa uki. Ri raya anu sandeme da Kutaji salaa ungka ri tana seʼi.

¹⁰ Ane ratamo eo setu, sambaʼa-sambaʼa tau da mangancale tau samposori banuanya da maʼi mangamposiepe dago pai kalindo ri tongo waʼa bonde anggoro pai waʼa mpuʼu aramu.”