Sakharia 2 - Sura Magali Nuntu Ngkatuwu

Pepatongawa kono wayaa mpontubu 2:1-5

¹ Ri pepatongawa anu mantonda kukita sambaʼa tuama anu mantangke wayaa mpontubu.

² Meoasi yaku kutoʼo, “Da malai ri mbeʼi?” Mesono sira ndatoʼo, “Da njoʼu mantubu Yerusale, da rayaku mangaincani sangkuja karate pai kabini ngkota setu.”

³ Nepa kukita malaʼeka anu mompaumo pai yaku, melinja ndeki suara pai sambaʼa malaʼeka anu ntaninya madadu siʼa.

⁴ Malaʼeka anu kaʼisa mompau ri malaʼeka anu karadua natoʼo, “Njoʼumo maliga-liga ri pamuda sinjau, pai toʼoka siʼa Yerusale da nabuketi ntau anu maʼai ngkasondonya pai pinatuwu painaka bareʼe mewali ndawangu tembo anu mantolilimi.

⁵ Roo ndajanji i mPue, Sira ngkalioa anu da mewali bente apu anu mantolilimi kota setu da mantatondoi pai Sira da maroo-roo njairia ri kakuasa-A pai peawa-A.”

Waʼa ntau ndatawani ndapeboo mewalili 2:6-13

^6-7 Ndatoʼo i mPue ri waʼa ntaua, “Yaku mawuraga komi ri mbeʼi-mbeʼi. Paikanya seʼi-seʼi ee waʼa ntau ndatawani, ndipoloncomo ungka ri Babeli ndipewalilimo ri Yerusale.

⁸ Isema anu maungku komi, inceʼe mangaungku wua ndayaku.” Inceʼe painaka i Pue Anu Makuasa mampokau yaku mamparata nuntu seʼi ri waʼa banca anu roomo mampamurui waʼa ntau-A.

⁹ “I Pue ngkalioa anu da maewa komi! Pai komi da napamurui waʼa mbatuami owi. Ane tepewalimo inceʼe nepa da ndiincani kaʼi Pue Anu Makuasanya mampokau yaku.”

¹⁰ Ndatoʼo i mPue, “Pongayumo ri kawongko ndayamu ee bangani Yerusale. Yaku da maroo-roo ri oyomi!”

¹¹ Ri tempo setu maria banca anu da rata ri Pue da mewali tau-A. Siʼa da maroo-roo ri oyomi, pai da ndiincanimo kaʼi Puenya anu mampokau yaku ri komi.

¹² Sangkani woʼu Yahuda da mewali anu ndapatani tila i mPue ri tana-A anu magali, pai Yerusale da mewali kota anu maʼai ndapampomawo.

¹³ Ndikarodomo komi pura-pura ri suara i mPue! Maka Sira maʼimo ungka ri kareʼe mpeari-A ri suruga.