Sakharia 11 - Sura Magali Nuntu Ngkatuwu

Kanawu waʼa ntau makuasa anu masigari 11:1-3

¹ Ee Libano, lokamo waʼa baa-baamu, da napangkoni apu waʼa ngkaju aramu!

² Ee puʼu daru, pokukuoumo, maka madungkamo waʼa mpuʼu cemara, waʼa mpuʼu ngkaju anu maroso puramo madungka. Ee waʼa mpuʼu ngkaju bangke ri Basani potumangimo. Maka waʼa mpangale bangke puramo lena mewali apu.

³ Pedongekamo pokukuou waʼa ntau makuasa, payamo waʼa ngkakoreʼe. Pedongekemo pengara waʼa ncinga ri yopo; maka majaʼamo kareʼe ntau seʼe ri santuntu Koro Yarade.

Radua topongkambi 11:4-17

⁴ Ndatoʼo i mPue Ala ri yaku, “Polengkomo siko, da ewa siko sambaʼa topongkambi anu mangangkambi bimba anu da ndaroro.

⁵ Waʼa ntau anu mangaoli mampepate waʼa bimba setu pai bareʼe nasuru. Tau seʼe anu mampobalu sanga waʼa bimba setu mantoʼo, ‘Ndaundemo i Pue! Seʼi-seʼi kita terangani kakoreʼeta!’ Waʼa ntopongkambi setu bareʼe merata puru ndayanya ri waʼa bimba anu naporewu ntau seʼe.

⁶ Yaku bareʼemo merata puru ndayaku ri sema ntano bangani ntana seʼi. Yaku ngkalioku da mampepombaika bangani ntana seʼi ri waʼa ntau anu makuasa. Tau seʼe da mangagero tana seʼi, pai Yaku bareʼe da mangalapasaka ungka ri pale ntau seʼe.”

⁷ Yaku Sakaria, da nasaro waʼa ntopobalu-balu bimba, da mangangkambi waʼa bimba anu da ndasambale. Yaku mampotumpu toko radua; anu sambaʼa kupapotoʼoka, “I Pandendaya,” anu sambaʼa woʼu, “Pungu”. Ungka lairia kutepuʼumo mojaga pai mangkambi waʼa bimba setu.

⁸ Reʼe tatogo topongkambi anu mangkelo karau ndayaku pai mampapura kasabaraku. Sambuyaja temponya kuiri tau seʼe.

⁹ Ungka lairia kutoʼoka waʼa bimba setu, “Bareʼemo kupokono mangkambi komi. Anu da mate naka matemo. Pai anu da magero mbolimo nakagero. Anu yabinya ndipombepepatemo.”

¹⁰ Ungka lairia toko anu kupapotoʼoka, “I Pandendaya” setu kutima nepa kupuʼa inceʼe mantomporimo janji anu ndapareʼe i mPue pai waʼa banca.

¹¹ Ri eo setu seʼe janji setu ndatandorimo. Waʼa ntopobalu-balu bimba mampatomata yaku, narata ndayamo ntau seʼe i Pue ntongo mompau mampoliu waʼa mpowiaku setu.

^12-13 Mompau yaku ri tau seʼe kutoʼo, “Ane silulu pai komi, ndiwaikamo yaku saroku; ane bareʼe neʼemo.” Nepa nawai ntau seʼe saroku togo mpuyu doi pera. Ndatoʼo i mPue ri yaku, “Papesua doi setu ri raya mpeti ri Banua-Ku.” Mewali kuwunca doi togompuyu pera setu ri raya mpeti ri Banua i mPue. Podo ewanceʼe karianya pesaro ntau seʼe ri yaku.

¹⁴ Roo setu kupuʼa tokoku anu karaduanya anu kupaotoʼoka, “Kowanya,” inceʼe painaka teburekamo kasambaʼa-mbaʼa Yahuda pai Isaraeli.

¹⁵ Nepa ndatooʼo i mPue ri yaku, “Powia woʼu sangkani ewa siko sambaʼa topongkambi, paikanya anu sangkani seʼi siko da ewa sambaʼa topongkambi anu bareʼe tumoro.

¹⁶ Maka Yaku da mampokau sambaʼa topongkambi da mangajaga dompu bimba-Ku, paikanya bareʼe nalinga mampepali bimba-Ku anu tetaji; siʼa bareʼe mampepali anu lingu, pai bareʼe da mampakulisi anu mawela, pai bareʼe mampakoni bimba anu tuwupa. Sawanya da napasilolongani jasiʼa yau anu mangangkoni sanga bimba anu maboko pai mangasungka waʼa ngkayupa mpinatuwu setu.

¹⁷ Pulorumo waʼa ntopongkambi anu bereʼe yowenya setu! Siʼa mampalaikamo dompu bimbanya. Poʼiwali inceʼe anu mampaposa kakuasanya. Takienya da malente pai da buta matanya anu mokana.”