Sakharia 10 - Sura Magali Nuntu Ngkatuwu

I Pue mojanji da mancorepaka waʼa ntau-A 10:1-12

¹ Ane ratamo tempo mporeme, ndiperapimo uja ungka ri Pue. I Pue da mampasambaka limu makundongi da mampatudu uja marombo da naka waʼa jamaa ndakita mayawuyu, lese nakita ntau pura-pura.

² Waʼa ntau merapi totoraka ungka ri waʼa lamoa pai waʼa ntopontonaa, paikanya waʼa sononya anu da rata ntau seʼe inceʼe podo mbamba podo pau soa ngkabongo. Reʼe anu mamposoki pangipi, paikanya totoraka ntau seʼe podo mampakalingu komi, pai pompalindo anu nawai ntau seʼe bereʼe yowenya. Inceʼe painaka waʼa mpalilinya tewuraga ewa bimba. Mapari raya ntau seʼe maka bemoreʼe tepombawanaka.

³ Ndatoʼo i mPue, “Maʼai karau ndayaku ri tau anu makuasa anu mamparenta waʼa ntau-Ku, inceʼe painaka tau seʼe da kuhuku. Paikanya bangani Yahuda Yaku tumpunya, Yaku Pue Anu Makuasa da mangkariani tau seʼe. Tau seʼe da kupapewali ewa nyara mpoʼiwaliku anu makaliki.

⁴ Ungka ri oyo ntau seʼe da kupilisi anu makuasa, topombawanaka, pai tadulako ncurodado anu da mamparenta waʼa ntau-Ku.”

⁵ Bangani Yahuda da menangi da ewa waʼa mpomakoje anu da malandasi waʼa iwali ewa loge ri tongo njaya. Tau seʼe da mompakaroso ua kayakunya, i Pue mampelae tau seʼe, pai surodado anu melamba ri nyara da nanangi ntau seʼe pura-pura.

⁶ “Bangani Yahuda da kupakaroso, waʼa nto Isaraeli da Kusorepaka. Kukeni mpewalili tau seʼe ri tananya, ua mapuru rayaku ri tau seʼe. Tau seʼe da kupowia ewa sambaʼa banca anu bereʼe Kupampesapuka. Yakumo Pue Ala pue ntau seʼe waʼa mpekakainya da kupedongekamo.

⁷ Waʼa nto Isaraeli da ewa waʼa mpomakoje anu maroso, ewa tau anu mainu anggoro, da mawongko raya ntau seʼe. Muli ntau seʼe popalapi-lapi bareʼe da mangkalingani penangi anu kuwai seʼi. Tau seʼe da modoro-doro ua waʼa mpowiaku tila ntau seʼe.

⁸ Waʼa ntauku da Kupeboo pai da Kupasambaka mewali sambaʼa-mbaʼa. Tau seʼe da Kulapasaka pai da Kupapewali sondo ewa iʼowi.

⁹ Mau roomo kusebu tau seʼe ri oyo waʼa banca, bareʼe bali da napaendo ntau seʼe Yaku njairia. Tau seʼe tesorepaka, ewanceʼe seʼe waʼa ananya pai da mewalili sangkani-ngkani ri tananya.

¹⁰ Ungka ri Masiri pai ungka ri Asuri da kupampapewalili tau seʼe. Ri tananya ngkalionya da kupadika tau seʼe. Da kukeni woʼu tau seʼe njoʼu ri Gilea pai Libano pai samalele ntana da buke tau seʼe.

¹¹ Ane tau seʼe da mangawote tasi ngkapari, Yaku, Pue da mangamposo waʼa balumbanya; inceʼe painaka oru ngKoro Nili mangau-ngau. Banca Asuri anu mobangke-bangke da kukodisi, pai masiri anu makaliki da paya kojenya.

¹² Yaku da mampakaroso waʼa ntau-Ku, tau seʼe da mepoʼinaya pai da manyomba ri Yaku. Yaku Pue anu mantoʼomo seʼi.”