Pilipi 4 - Sura Magali Nuntu Ngkatuwu

Waʼa mpatada 4:1-9

¹ Inceʼe puʼunya ee waʼa ngkasangkompo anu kupotowe, ewanceʼemo da katuwumi ri peaya ndaya anu monco ri Pue. Mawo kojo rayaku ri komi! Komi kupeunde-undeka, kakominya anu mampakawongko rayaku.

² I Euodia pai i Sintike! Kuperapi kojo da naka komi da siuju-uju raya ewa waʼa ntau anu sampepeaya.

³ Ri waʼa sampotetalaku anu todo, kuperapi woʼu da naka nditulungi weʼa radua setu. Tau seʼe roomo motetala ri gori mpangkotonya sangkani-ngkani pai yaku mampetumbu Nuntu ngKatuwu anu ungka ri Pue Ala; ewanceʼe seʼe i Kaleme pai waʼa ntau seʼe anu motetala sangkani-ngkani pai yaku. Waʼa ntoʼo ntau seʼe teʼukimo ri Sura nTau Tuwu.

⁴ Mbolimo bareʼe bali-bali wongko ndayami ua komi tuwu ri kasambaʼa-mbaʼa pai Pue. Sangkanipa da kutoʼo ndipakawongkomo rayami!

⁵ Mbolimo tau pura-pura da mangkita poʼengkomi anu mantuju kadago ndayami. Bareʼemo masae da jelamo i Pue.

⁶ Neʼe reʼe bara nunjaa-njaa anu ndipoʼipu ndaya. Ndipekakaimo, ndiperapimo ri Pue Ala mpengaya-ngaya anu ndipoyoweka. Nunjaa anu ndipodaraya ndipetumbumo ri pau mpotarima kase ri Pue Ala.

⁷ Karodo ndaya ungka ri Pue Ala anu bareʼe nakoto ntolino mangarata ndaya da majagai rayami pai nawa-nawami anu sambaʼa-mbaʼamo pai i Kerisitu Yesu.

⁸ Kapusanya, da kutoʼoka komi, mbolimo nawa-nawami da kobangani pai waʼa anu moyowe, anu meawa da ndaunde; inceʼemo waʼa anu monco, tetubunaka, mayoa, magali, lese pai madago.

⁹ Ndiwianakamo nunjaa anu roomo ndipeguru pai nditarima ungka ri yaku, i Pue Ala puʼu ngkalindo ndaya da sangkani-ngkani pai komi pura-pura.

Pau pontarimakase 4:10-20

¹⁰ Ri raya ngkatuwuku anu sambaʼa-mbaʼa pai Pue, kuepe lindo kojo rayaku, maka ewanceʼimo kasaenya, seʼi-seʼi reʼe woʼu kasoami manawa-nawa katedikanakaku. Tinako ndayaku banya kumantuluri komi mangkalinganimo yaku; maka lawi ndiendo-endo yaku, paikanya bareʼe ndirata kasoanya da ndipampatongawa.

¹¹ Inceʼi kutoʼoka komi, banya kumantoʼoka komi kabareʼenya reʼe bara nunjaa-njaa ri yaku, maka yaku magurumo mampogana nunjaa anu kuporeʼe.

¹² Yaku kukoto tuwu ri kakura ngkatuwu, pai yaku seʼe woʼu kuincani tuwu ri gana-gananya. Yaku matamamo kono rahasia ngkatuwu anu ewambeʼi ntano katedikanakanya; madago ri kagana-gana ngkatuwu bara ri kakura ngkatuwu, madago ri kakoreʼe bara ri kakaasi-asi.

¹³ I Kerisitu mawaika yaku kuasa painaka maroso yaku mancuaraki mpengaya-ngaya katedikanaka.

¹⁴ Paikanya komi mantulungimo yaku ri tongo ngkapariku; pai nunjaa anu ndiwianaka setu madago.

¹⁵ Ee waʼa ngkasangkompoku to Pilipi! Komi ngkaliomi ndiincani kojo sindara mpalaiku ungka ri Makedonia owi, ri uyu-uyu mpampetumbu Nuntu ngKatuwu, podo komi dompu anu mantulungi yaku; waʼanyamo komi anu sangkani-ngkani pai yaku maepe kaparinya.

¹⁶ Sindara yaku ri Tesalonika mamperapi petulungi, komi seʼe anu mawai petulungi ri yaku bara sangkuja ngkani.

¹⁷ Inceʼe banya posokinya yaku podo da rayaku marata-rata petulungi. Anu kupodaraya inceʼemo da mangkita powuanya anu maranga-rangani porasimi.

¹⁸ Pura-pura kutarimamo, pai meruumo ri kagana-gananya! Pura-pura petulungi anu ndipakatuka yaku, kutarimamo ungka ri Epapoditu. Seʼi-seʼi waʼa anu da kupake reʼemo ri yaku. Waʼa mpombaimi seʼi ewa panyomba anu mawongi ndapanyombaka ri Pue Ala pai anu ndasabe i mPue Ala ri kawongko ndaya-A.

¹⁹ I Pue Ala anu kupanyomba, mamporeʼe mpengaya-ngaya ri raya i ngKerisitu Yesu, pai Sira da mawaika komi ri kagana-gananya nunjaa anu da ndipoyoweka.

²⁰ Taundemo i Pue Ala Papata rantani masae-sae! Ami.

Petabea kapusanya 4:21-23

²¹ Ndiparatamo tabeaku ri pura-pura tau i mPue Ala anu sambaʼa-mbaʼa pai i Kerisitu Yesu. Pai ndisabemo waʼa ntabea ungka ri waʼa ngkasangkompo anu seʼi sangkani-ngkani pai yaku ireʼi.

²² Pura-pura tau i mPue Ala ri kota seʼi, pagonya tau seʼe anu ungka ri langkanae i Datu, mampakatu tabea rata ri komi.

²³ Mbolimo i Yesu Kerisitu da mangadonco komi pura-pura. Petubunaka ungka ri kami, Paulu pai Timotiu