Pilipi 3 - Sura Magali Nuntu Ngkatuwu

Kamonco anu ungka ri Pue Ala 3:1-11

¹ Kapusanya ee waʼa ngkasangkompoku, mbolimo da mawongko-wongko rayami ua komi sambaʼa-mbaʼa pai Pue. Bareʼe manee rayaku da mantoʼoka komi nunjaa anu roomo riunya kuʼukika komi; maka inceʼe moyowe tila da ngkatesorepakami.

² Da ndisoro-soro kojo waʼa ntau anu mawianaka waʼa anu majaʼa inceʼemo waʼa ntau anu sintinaja da ndatoʼo ‘asu’ Tau seʼe mariso waʼa ntau da naka ndasuna.

³ Ntanoka kitamo yau anu mantarima popasuna anu monco, banya tau seʼe. Kita manyomba ri Pue Ala ua popanini Inosa mPue ngkalio-A, pai tapokawongko ua kita sambaʼa-mbaʼa pai i Kerisitu Yesu. Kita bareʼe mantanje waʼa wawai anu napareʼe ntolino.

⁴ Kamonconya yaku kukoto montanje ri waʼa mbawai ntolino setu. Maka ane reʼe tau anu maepe siʼa reʼe rosonya da montanje ri wawai ntolino, yakupa anu meruu.

⁵ Maka yaku ndasuna ri kagananya uayu ndeme tinuwuku. Yaku napomulika nto Isaraeli ungka ri sepa lemba i Benyami; yaku to Ibarani mpuʼu. Kono pepoʼinaya ri waʼa mpadika agama nto Yahudi, yaku sambaʼa to Parisi.

⁶ Maʼai mpodago kadoyo ndayaku mangaduduki dompu i ngKerisitu. Ane mampeole kono ri pelulu ri waʼa mpadika agama Yahudi yaku tesua tau madago pai bereʼe posarinya.

⁷ Paikanya ua i Kerisitu, painaka pura-pura anu i owi kuepe ewa sambaʼa anu mampaporasi, seʼi-seʼi tongawa mewali sambaʼa anu mepakarugi.

⁸ Banya podo kakononya inceʼe paikanya pura-puranyamo seʼe kureke podo mampareʼe rugi. Nunjaa anu kupotumpu wawaseʼi inceʼe anu bangke olinya: Inceʼemo mangaincani i Kerisitu Yesu Pueku. Ua i Kerisitu painaka kurengkasakamo mpengaya-ngaya. Pura-puranya setu kureke podo nyoo, da kupangkoto marata i Kerisitu,

⁹ pai monco kojo sambaʼa-mbaʼa pai Sira. Pokenta anu madago pai Pue Ala bareʼe kupepali ngkalioku mampoliu pepoʼinaya ri waʼa mpadika agama, seʼi-seʼi yaku maratamo pokenta anu madago pai Pue Ala, ua yaku meaya ri Kerisitu; mewali pokenta anu madago setu kurata ungka ri Pue Ala, mamponono peaya ri Yesu Kerisitu.

¹⁰ Podo sangaya anu kupodaraya inceʼemo da naka kuincani i Kerisitu pai mangaepe kuasa anu mampatuwu muni Sira ungka ri kapate. Da rayaku maepe pari pai Sira pai da siwia pai Sira kono ri kapate-A.

¹¹ Pai kupomata-mata yaku da ndapatuwu muni ungka ri kapate.

Molonco rata ri ungkanya 3:12-21

¹² Bareʼe kutoʼoka komi bara yaku seʼi maratamo rasi, bara bareʼemo reʼe posarinya. Paikanya ntongo kumompari-mpari da mangkekeni pombai anu ndapatokamo i ngKerisitu Yesu. Ua kaʼinceʼenya painaka Sira mangkekeni yaku pai ndapapewali tau-A.

¹³ Kamonconya ee waʼa ngkasangkompo, banya bara kutoʼo yaku kukekenimo pombai setu. Paikanya sangaya anu kupowia, inceʼemo mangkalingani pura-pura nunjaa anu kuliunakamo pai mompari-mpari kojo da kupaleʼo nunjaa anu reʼe ri suara.

¹⁴ Inceʼe puʼunya painaka kumolonco mpaliu naka rata ri ungkanya da kupaleʼo pombai mpenangi seʼe, inceʼemo da tuwu ri suruga; ua kaʼinceʼenya kita ndapeboo i mPue Ala mampoliu i Kerisitu Yesu.

¹⁵ Kita pura-pura anu matinuwumo ri tila ngkatuwu ntanoana da ewanceʼemo poʼengkota. Paikanya ane reʼe ri oyomi anu ntaninya parata ndayanya, nepa i Pue Ala woʼu da mantotoraka ri kayonto-yontonya ri komi.

¹⁶ Paikanya anu sangaya seʼi da ndikomatasi: Kita pura-pura sangaya-ngaya da tuwu malulu pandiri anu taratamo ri tempo seʼi.

¹⁷ Ee waʼa ngkasangkompo pura-pura! Ndilulumo pandiri ri yaku! Kutujukamo komi pandiri anu monco, inceʼe painaka ndipatomata mpodago waʼa ntau anu malulu pandiri mami.

¹⁸ Maria ngkanimo kutoʼoka komi, pai seʼi-seʼi ri polepe-lepe ue mataku kuwali ntoʼoka woʼu komi, maka maria tau anu ri katuwunya majaʼati posoki ngkapate i ngKerisitu ri kaju ndapanggo.

¹⁹ Katuwu ntau anu ewanceʼe da motando ri kagero, maka lamoa ntau seʼe inceʼemo sawoyo ndaya anu mangkuasai koronya. Waʼa mpowia anu kamonconya da ndapokaea inceʼe anu napekiundeka; maka tau seʼe podo manawa-nawa nunjaa anu singkono pai pepokono lino seʼi.

²⁰ Paikanya kita seʼi inceʼemo palili mpoparenta ncuruga. Ungka ndatiriamo woʼu da poiwo Mokole Tadungkadagota, i Yesu Kerisitu. Siramo anu tapopopea ri kamawo ndayata.

²¹ Korota anu malente pai da magero seʼi da ndabalisaka i ngKerisitu da mewali ewa koro-A ngkalio-A anu meawa. Ndakoto mawianaka inceʼe maka Sira mampotumpu kuasa anu mampapeʼuru mpengaya-ngaya.