Pilipi 2 - Sura Magali Nuntu Ngkatuwu

Kalauka ndaya pai peawa i ngKerisitu 2:1-11

¹ Komi maroso, ua komi sambaʼa-mbaʼa pai i Kerisitu. Pai lindo rayami maka i Kerisitu mampotowe komi! Komi ndaponinika Inosa mPue Ala, pai komi woʼu matowe pai pande mporaya sambaʼa pai sambaʼa.

² Mewali, koisa ndipakagana kojo kawongko ndayaku ri waʼa mpowiami anu ewanceʼi. Ndikatuwumo ri kasintuwu ndaya pai ri towe ndaya anu siwia-wia, pai ri kasiwia mponawa-nawa pai tinako ndaya.

³ Neʼe ndipowia bara nunjaa-njaa anu podo maendo koro ngkalio, bara ua da mekiunde. Moruana komi sambaʼa pai sambaʼa ri kalauka ndaya da maepe tau ntaninya meruu ngkadagonya painaka koromi ngkaliomi.

⁴ Da ndinawa-nawa nunjaa anu da moyowe tila ntau ntaninya; neʼe japodo maendo koro ngkalio.

⁵ Mbolimo komi da ewa poraya i Yesu Kerisitu.

⁶ Kamonconya Sira siwia pai Pue Ala, paikanya Sira bareʼe mangkekeni maroso katedikanaka ka-Siranya pue seʼe.

⁷ Paikanya, Sira marengkasa pura-puranya, nepa mampasiwia koro-A ewa sambaʼa watua. Sira medika ewa tolino, pai tongawa ri katuwu-A ewa tolino.

⁸ Sira mampakalauka koro-A, pai tuwu ri pepoʼinaya ri Pue Ala rantani mate – inceʼemo mate ri kaju ndapanggo.

⁹ Inceʼe painaka i Pue Ala madika Sira ri gori-gori ngkandatekanya, pai ndawaika Sira kuasa anu meruu ngkabangkenya ungka ri waʼa ngkuasa anu ntaninya.

¹⁰ Pai tila mpantubunaka i Yesu, pura-pura anu ndapapewali i mPue, anu ri suruga pai anu ri lino, sangkani pai anu ri ara lino, da manyomba ri Sira.

¹¹ Tau seʼe pura-pura da mangaʼaku, i Yesu Kerisitumo Pue; ri raya ngkaʼewanceʼenya i Pue Ala Papa ndapapeawa.

Mesindi ewa rara anu mampakareme lino 2:12-18

¹² Inceʼe painaka, ee komi waʼa ngkasangkompo anu kupotowe, ewambeʼi ntano pedongemi ri yaku ri sindara yaku reʼe ri oyomi, ewanceʼe seʼe mau kita mombelawa-lawamo da maʼaimo katongawanya ndipampedongeka yaku. Ndipompari-mpari mpaliu da naka tumumpu katesorepakami. Ndiwianakamo pura-puranya setu ri kakandende-ndende ndaya ua pampokaekami i Pue Ala,

¹³ maka i Pue Ala ngkalio-A anu motetala ri rayami painaka ndipokono pai ndikoto mampakawongko raya mPue Ala.

¹⁴ Ndiwianakamo pura-puranya setu neʼe ri kakanguru-nguru pai ri pombebali-bali.

¹⁵ Powiami ewanceʼe, komi mampatongawa kakominya waʼa ana i mPue Ala anu bereʼe posarinya, anu magali ri oyo ntau tuwu salapi seʼi anu majaʼa engkonya pai masalaa, mbolimo ri tempo ndipamparataka tau seʼe bambari anu da mawai katuwu, komi da ewa reme anu mampakareme lino seʼi,

¹⁶ ndikekeni maroso nuntu ngkatuwu, da naka maʼai ngkabangke kawongko ndayaku ri eo ngkarata i ngKerisitu. Inceʼe katongawanya bareʼe ngkabongo posilumbaku pai pompari-mpariku maka reʼe powuanya.

¹⁷ Bara katuwuku seʼi sangaya-ngaya da kupanyombaka ri Pue Ala da mampagana panyomba anu ndipanyombaka ua peaya ndayami ri Pue Ala. Pai ane lawi da ewanceʼe ntano, kuunde i Pue Ala, pai mawongko rayaku sangkani-ngkani pai komi.

¹⁸ Ewanceʼe seʼe komi da mabuya rayami mawongko-wongko raya sangkani-ngkani pai yaku.

I Timotiu pai i Epaporoditu 2:19-30

¹⁹ Kupoaya monco kojo ua pompelae i Yesu, painaka ronga kuleʼo mampokau i Timotiu madadu komi da naka tepalindo rayaku ua da marata bambari kono katedikanakami.

²⁰ Podo i Timotiu ri waʼa ntau anu reʼe ireʼi anu siwia peepe ndayanya pai yaku, pai monco-monco kojo nanawa-nawa kono da kadagomi.

²¹ Pura-pura waʼa ntau ntaninya podo mampasilolongani anu da moyowe tila ngkoronya ngkalionya, banya anu da moyowe tila i Yesu Kerisitu.

²² Kuepe-epe komi ngkaliomi ndikita ewambeʼi poyowenya i Timotiu. Siʼa motetalamo ri gori mpangkotonya sangkani-ngkani pai yaku mampobambarika Nuntu ngKatuwu ungka ri Pue Ala. Kami radua bareʼemo sala jamo ewa ana pai papanya.

²³ Inceʼe puʼunya painaka jabutu kuincanimo ewambeʼi da potandonya kara-karaku seʼi, maliga-liga kupokau siʼa da ronga madadu komi.

²⁴ Kupoayamonco ua pompelae ungka ri Pue, yaku ngkalioku woʼu bareʼemo masae da rata mampeole komi.

²⁵ Kono kasangkompota i Epaporoditu anu ndipokau maʼi mantulungi yaku, kuepe-epe sangkadagonya ane kupokau muni madadu komi. Siʼa mayunukimo yaku ri pompari-mpariku mawianaka tetalaku.

²⁶ Maʼai kamawo ndayanya ri komi pura-pura, masusa rayanya maka ndidongemo kajuʼanya.

²⁷ Monco kojo kajuʼanya sakodi mate. Paikanya mapuru raya i mPue Ala ri siʼa; paikanya banya woʼu podo ri siʼa, pai ri yaku woʼu, da naka neʼe terangani kapari ndayaku.

²⁸ Inceʼe puʼunya painaka bangke rayaku da mampokau siʼa mewalili muni ri komi, da nakamawongko muni rayami ane momberatamo pai siʼa, pai yaku woʼu da rodomo rayaku.

²⁹ Mewali ndisabemo siʼa ri wongko ndaya ewa sambaʼa tau anu sampepeaya ndaya. Da nditubunaka pura-pura tau anu ewa siʼa.

³⁰ Ua tila ntetala i ngKerisitu, sakodi kojo da mate siʼa; siʼa bareʼe mampepurungi inosanya da mantulungi yaku mamponcarungkoroka komi.