NEHEMIA 9 - Sura Magali Nuntu Ngkatuwu

Tau sondo mampangakuka salaanya 9:1-5

¹ Ri rua mpuyu pai aopo eo mbuya setu seʼe, mompasambakamo waʼa nto Isaraeli. Tau seʼe mopuasa mampatongawa poncosoi ndaya ntau seʼe ua waʼa ncalaanya.

² Tau seʼe mompatani ungka ri waʼa ntau mencua. Mantuju kapari ndayanya, tau seʼe mamporengko karu, pai madika awu ri wawo ntanoananya. Roo setu mekakore tau seʼe mampangakuka waʼa ncalaa ntau seʼe pai waʼa ncalaa ngkai ntau seʼe.

³ Tempo-temponya tatogo jaa kasaenya Sura mPadika i mPue, Pue Ala pue ntau seʼe ndabasaka tau seʼe pai tatogo jaa woʼu tau seʼe mampangakuka waʼa ncalaanya. Roo setu nepa mombukotu tau seʼe manyomba ri Pue, Pue Ala puenya.

⁴ Njairia njau mimbari tila waʼa nto Lewi, ri wawonya mekakoremo i Yosua, i Bani, i Kadimieli, i Sebanya, i Buni, i Serebiya, i Bani pai i Kenani. Marombo oni nganganya mekakai ri Pue Ala puenya.

⁵ Panyomba ri eo setu natepuʼu waʼa nto Lewi, inceʼemo: i Yosua, i Kadimieli, i Bani, i Hasabeniya, i Serebiya, i Hodia, i Sebanya pai i Petahiya. Natoʼo ntau seʼe, “Ndipekakoremo pai ndiundemo i Pue Ala pueta. Ndioretakamo peunde ri Sira rantani masae-sae! Taundemo toʼo-A anu buke pai peawa, toʼo anu meawa meruu ri pura-pura peunde!”

Pekakai mampangakuka salaa 9:6-37

⁶ Ungka lairia mekakaimo waʼa nto Isaraeli ewaseʼi: “Komimo Pue, Komi Pue Ane Sambaʼa-mbaʼa; Komi anu mampapewali betuʼe pai sambawo yangi. Ewanceʼe seʼe tasi, lino sangkani pai waʼa banganinya. Komi anu mampatuwu pai mamporewu. Ri komi panyomba pai pepue pura-pura kuasa ri yangi; tau seʼe meʼuru pai mombukotu ri suarami.

⁷ Komimo Pue Ala, Pue Anu Sambaʼa-mbaʼa. Ndipilisi i Burahima ungka ri oyo ntinanya. Napalaika tana Uri pai Babeli, ua komi anu mawawanaka. Nepa Ndiwaika siʼa toʼo anu dawoʼu: i Burahima, inceʼe anu napotoʼo montepuʼu ungka njairia.

⁸ Tongawa siʼa sambaʼa tau anu todo pai medonge ri Komi. Nepa Ndipareʼe sambaʼa janji anu maroso pai siʼa. Tana Kanaʼa, Heti pai Amori, tana Peresi, Yebusi pai Girigasi, pura-pura setu da Ndiwaika siʼa; da kareʼe mpeari pura-pura waʼa mulinya. Ripurinya Ndibangani janji setu ri siʼa, maka Komi mayoa pai todo.

⁹ Ndikita kapari waʼa ngkai mami ri tempo anu ndaliunakamo, Ndidonge potumangi ntau seʼe ri tana Masiri pai ri Tasi Taberau,

¹⁰ ri datu nto Masiri Ndipowia waʼa tanda ngkuasa, ewanceʼe seʼe ri waʼa mpegawainya pai waʼa mpalilinya, maka Ndiincani ewambeʼi napajeani waʼa ntaumi. Painaka tebambari toʼomi rata ri sandeme seʼi.

¹¹ Da naka reʼe jaya mpoliu waʼa ntau-Mi ndipapogaʼa tasi; Ndiwotesaka tau seʼe mojaya ri oruntasi anu mangau-ngau. Waʼa ntau anu maduduki malodongi ri ue mayombu, ewa manawu watu ri tasi anu motobi.

¹² Ri ndeme tau seʼe Ndiponinika malulu limu, pai ri wengi tau seʼe Ndiponinika pai limu anu merara ewa apu.

¹³ Ungka ri yangi menaʼu komi ri wawo Buyu Sinai, nepa mompau komi ngkaliomi ri waʼa ntau-Mi. Komi mawai padika, ada pai songka anu mayoa, monco pai moyowe.

¹⁴ Eo Umapo anu magali sangaya-ngaya da nabangkei ntau seʼe, pai mampoliu i Musa ndiwai waʼa mPadikami.

¹⁵ Ri tempo ntau seʼe maoro pai bareʼe gana pangkoni, Ndipatudu roti ungka ri yangi. Pai ungka ri roka mbatu pangi Ndipapebete ue gana-gana mampapaya karanganga. Ndipokau tau seʼe mangkuasai tana, anu Ndijanjika tau seʼe.

¹⁶ Paikanya waʼa ngkai mami mobangke-bangke pai mapeni raya; bareʼe medonge ri waʼa ncongkami.

¹⁷ Tau seʼe bareʼe mepoʼinaya, bareʼemo naendo waʼa ngkapuru ndaya-Mi, pai pura-pura tanda ngkuasa-Mi nakalinganimo. Ua pobangke-bangke ntau seʼe, napilisi sambaʼa tadulako anu da mangkeni mpewalili tau seʼe njoʼu ri tana Masiri. Paikanya Komi Pue Ala anu bareʼe mampepalisi salaa, mayombu raya, pande mporaya pai buke puru ndaya. Towemi bereʼe kasiwianya, bareʼe ndipalaika tau seʼe.

¹⁸ Napowia ntau seʼe lamoa ewa taʼa japi, nepa natoʼo ntau seʼe, ‘Inceʼimo Pue Ala puemu, anu mangkeni komi ungka ri tana Masiri ri pampowatua komi.’ Boo Pue Ala Komi ngkalio-Mi anu napeti kodi!

¹⁹ Paikanya ri pada bone seʼe bareʼe Ndipalaika tau seʼe, maka Komi buke pai puru ndaya, bareʼe ndipapaya limu pai apu anu mantuju jaya ri ndeme pai ri wengi.

²⁰ Kuasami anu manondo mampaguru tau seʼe, tau seʼe mangkoni roti mana pai mainu ue gana-gana.

²¹ Ri raya anu aopo mpuyu ntaʼu ri pada bone Ndipagana-gana anu nakatuwuka ntau seʼe. Rengko ntau seʼe bareʼe maronto, bareʼe majuʼa bara mewoke witi ntau seʼe.

²² Ndiwaika tau seʼe penangi ri waʼa mokole pai banca anu motida pai ntana ntau seʼe. Hesiboni tana i Mokole Sihoni napotundasi ntau seʼe. Basani tana i Mokole Ogo napeari ntau seʼe.

²³ Ndipapewali muli ntau seʼe ewa kasondo betuʼe ri yangi. Ndiwaika tau seʼe tana da napeari, tana anu roo ndijanjika waʼa ngkai ntau seʼe.

²⁴ Muli ntau seʼe manganangi to Kanaʼa; Ndipapeʼuru waʼa ntau njairia. Ndiwai kuasa ri waʼa ntau-Mi mowia malulu pepokononya ri waʼa banca nto Kanaʼa pai waʼa-waʼa mokolenya.

²⁵ Waʼa ntau-Mi mangarampa waʼa bente anu maroso, tana anu maboko pai banua anu buke pai kakoreʼe. Waʼa ntibubu pai mata ue narampa ntau seʼe, bonde anggoro, puʼu saitu pai waʼa mpinamuya anu ntaninya. Napomabokomo ntau seʼe mangkoni gori mpepokononya. Mpengaya-ngaya pombaimi anu madago nakatuwuka ntau seʼe.

²⁶ Paikanya waʼa ntau-Mi meewa bareʼe mepoʼinaya ri komi, nalewamo padika pai waʼa ncongka-Mi, tau seʼe mampepate waʼa nabi anu ma-mpatiendo tau seʼe, pai anu mampokau tau seʼe da mewalili ri Komi Pue Ala puenya. Boo Pue, sangkani-sangkani ndapatiendo woʼu, Komi napetikodi ntau seʼe.

²⁷ Painaka ndipepombaika tau seʼe ri waʼa iwalinya anu masii kojo mangkuasai pai majeani tau seʼe. Paikanya ri tongo-tongo ngkapari naepe ntau seʼe, meboo tau seʼe ri komi merapi pompelae. Ungka ri suruga Ndipedongeka peboo ntau seʼe; ri kapuru ndaya-Mi ndisono, Ndipakatu tadulako pai tau makoje, anu malapasaka tau seʼe ungka ri pale iwali.

²⁸ Paikanya jabutu maʼuono muni tananya, napowia woʼu ntau seʼe salaa. Ndipepombaika woʼu tau seʼe ri iwali anu majeani. Paikanya butu majea pai moncosoi, meboo tau seʼe ri Komi merapi nda-sorepaka. Ungka ri suruga Ndipedongeka, pai papongkani-ngkanimo Ndipantulungi maka merata puru ndaya-Mi pai maʼai Ndipampomawo.

²⁹ Ndiseko tau seʼe da naka mepoʼinaya ri waʼa pompaguru-Mi, paikanya ri kapeni ndayanya bareʼe natarima ntau seʼe Padika-Mi. Ntanoka ane nawianaka ntau seʼe Padikami, sangaya-ngaya da uono katuwunya. Tau seʼe mapeni woʼo pai mapeni raya, bareʼe medonge pai bareʼe mepoʼinaya.

³⁰ Santaʼu-santaʼu ri kayombu ndaya-Mi ndipatiendo tau seʼe; mampoliu waʼa nabi, Inosami mompau ri tau seʼe. Paikanya nadampo waʼa ntau-Mi setu talinganya painaka Ndipepombaika ri waʼa banca ri sambawo lino.

³¹ Paikanya ua towemi anu bangke bereʼe kasiwianya, bareʼe Ndipalaika pai bareʼa Ndiropu tau seʼe, lawi Komimo Pue Ala anu bareʼe kasiwianya. Bangke ngkatowe ndaya pai pande mporaya!

³² Boo, Pue Ala pue mami anu maroso! Pue Ala anu bangke pai bereʼe kasiwianya! Ua katodomi ndikekeni mpaliu janji-Mi; waʼa janji-Mi Ndibangani pai Ndiwia-naka. Montepuʼu ungka ri tempo mpajeani mokole nto Asuri kami, rantani wawaseʼi maria kapari anu kaepe. Waʼa mokole mami, tadu mpanyomba, nabi pai waʼa ntau loʼe, ewanceʼe seʼe waʼa ngkai mami pai waʼa ntau sondo maepemo pari pura-pura. Neʼe Ndikalingani waʼa ngkapari setu! Neʼe boi Ndikalingani!

³³ Powia-Mi mayoa, ndihuku kami anu masalaa; Komi todo mau kami maria posarinya.

³⁴ Waʼa ngkai mami, mokole, tadu mpanyomba pai waʼa ntau loʼe maewa padika-Mi pai bareʼe malinga waʼa ncongka pai peseko anu Nditoʼoka tau seʼe, bareʼe napedongeka pai bareʼe nalinga.

³⁵ Ndidonco waʼa mokole anu mamparenta waʼa ntaumi ri tongo mpeari ntau seʼe ri tana bangke pai maboko anu Ndiwaika tau seʼe. Paikanya bareʼe napalaika ntau seʼe engko ngkatuwu anu majaʼa, bareʼe napokono meʼuru pai manyomba ri Komi.

³⁶ Seʼi-seʼi kami seʼe mewali watua ri tana anu Ndiwaika kami kapopanta. Tana seʼe maboko, gana-gana wua mpinamuya, anu kamonconya kami da mampoyoweka.

³⁷ Pura-pura wua mpinamuya ri tana seʼi sangaya-ngaya da kapepombaika ri waʼa mokole ntana seʼi. Waʼa ntau makuasa setu ndilanti da mamparenta waʼa ntau-Mi mewali huku ncalaa mami ri Komi. Tau seʼe mancongka malulu papokononya ri kami pai ri waʼa mpinatuwu mami. Inceʼe painaka kami mantodosaka kapari, gana-gana kasusa pai kapari ndaya.”

Waʼa ntau sondo madika bate mpalenya ri pojanji 9:38–10:27

³⁸ Merontada ri pura-pura anu mewali setu, kami waʼa nto Isaraeli mampareʼe pojanji anu maroso pai teʼuki pai nateke waʼa ntadulako mami, waʼa nto Lewi pai sambaʼa tadu mpanyomba mami.