NEHEMIA 8 - Sura Magali Nuntu Ngkatuwu

I Esira mabasaka tau sondo Sura mPadika 8:1-12

¹ Ri wuya kapapitu to Isaraeli rodomo mempeari kotanya sambaʼa-sambaʼa seʼe. Ri sambaʼa eo mbuya setu tau seʼe pura-pura mompasambaka ri Yerusale ri soma anu ri suara Baa-Baa Ue. Tau seʼe mamperapi da naka Sura mPadika da natima i Tadu mPanyomba Esira, sambaʼa tau loʼe ri Padika anu ndawai i mPue ri to Isaraeli mampoliu i Musa.

² Roo setu natima i Esira sura setu nakeni ri suara ntau sondo, njau waʼa ntuama, weʼa pai ananggodi anumangkotomo marata ndaya padika setu.

³ Ungka lairia montepuʼu ungka ri mpowuro nakarataka ntongo ndeme i Esira mabasaka tau seʼe Padika setu. Napedongeka mpodago ntau seʼe bangani mPadika setu.

⁴ I Esira mekakore ri mimbari kaju anu ndapowia da ndapake ri pompasambaka setu. Ri tondo mokananya mekakore i Matica, i Sema, i Anaya, i Uria, i Hilikia pai i Maaseya, pai ri tondo mokaiinya mekakore: i Pedaya, i Misaeli, i Malikia, i Hasumi, i Hasibadana, i Sakaria pai i Mesula.

⁵ Mimbari anu ndawangu setu meruu kalangkatinya pai tau setu painaka yosa pangkita ntau seʼe pura-pura. Butu nabulere i Esira sura setu liu-liu mekakore tau seʼe pura-pura.

⁶ Natoʼo i Esira: “Undemo i Pue, Pue Ala anu bangke!” Pura-pura tau sondo mantora palenya nepa mesono: “Ami, Ami!” Nepa mombukotu tau seʼe manyomba ri Pue Ala.

⁷ Roo setu meoko tau seʼe nepa mekakore ri tampanya sambaʼa-sambaʼa seʼe, sindarawaʼa nto Lewi mantotoraka tau seʼe kono bangani mPadika setu. Waʼa nto Lewi setu inceʼemo: i Yesua, i Bani, i Serebiya, i Yamini, i Akubi, i Sebetai, i Hodia, i Maaseya, i Kelita, i Asaria, i Yosaba, i Hanani pai i Pelaya.

⁸ Tau seʼe mampalimba waʼa mPadika i mPue Ala setu nteasangaya pai mantotoraka da naparata ndaya waʼa ntau sondo posoki anu ndabasa setu.

⁹ Madonge pabasa Padika setu waʼa ntau sondo maʼai kojo kamawo ndayanya painaka matumangi tau seʼe. Inceʼe painaka natoʼo i Petoro Nehemia ri Tadu mPanyomba Esira sangkani pai waʼa nto Lewi anu montotoraka Padika setu ri waʼa ntau sondo, ewaseʼi: “Eo seʼi eo anu ndapatani tila i mPue Ala puemi, mewali neʼe mapari rayami pai motumangi.

¹⁰ Seʼi-seʼi ndipewalilimo ri karodo ndayami ndipangkoni pai ndipanginu ri kawongko-wongko ndayami. Ndiwai santila pangkonimi pai anggoromi ri waʼa ntau anu megana katuwunya. Eo seʼi eo ndapatani tila mPueta, mewali neʼe masusa rayami. Wongko ndaya anu ndawai i mPue ri komi inceʼe anu da mampakaroso rayami.”

¹¹ Waʼa nto Lewi woʼu mampari-mpari mampalindo raya waʼa ntau sondo, natoʼka tau seʼe, “Neʼe boi masusa rayami ri eo anu ndapatani seʼi.”

¹² Mewalilimo waʼa ntau sondo setu njoʼu mangkoni pai manginu pai mampotilaka pangkoni ri waʼa ntau ntaninya. Mawongko raya ntau seʼe maka narata ndayamo ntau seʼe posoki anu ndabasa anu nadonge ntau seʼe setu.

Posusa mPokuani 8:13-18

¹³ Bangke reme mompasambakamo waʼa ntadulako santina-santina seʼe, waʼa ntadu mpanyomba pai waʼa nto Lewi, njoʼu madadu i Esira, mampeguru totoraka kono Padika i mPue.

¹⁴ Njairia narata ntau seʼe ri raya mPadika anu ndawai i mPue mampoliu i Musa setu, i Pue mampokau to Isaraeli da maroo-roo ri kuani sangkasae mPosusa mPokuani.

¹⁵ Inceʼe painaka sandaya ngkota Yerusale, ri waʼa ngkota pai waʼa desa, naparata ntau seʼe songka setu, “Ndipalaimo ri buyu mongkodo nditimamo waʼa raʼa ngkaju cemara, saitu, puʼu ngkaju lana, koroma pai kaju ntaninya da ndipampowia kuani silulu pai songka anu lau ndaʼuki ri Sura mPadika.”

¹⁶ Njoʼumo kojo waʼa ntau setu mantima waʼa raʼa ngkaju setu. Napowia ntau seʼe kuani ri wawo ata banua ntau seʼe anu lene atanya, ri soma banuanya, ri soma anu ri suara Banua i mPue, ri tana lapa anu mosu ri Baa-Baa Ue pai ri tana lapa anu mosu ri Baa-Baa Eparai.

¹⁷ Pura-pura tau sondo anu mewalilimo ungka ri pantawani mampowia waʼa ngkuani setu, nepa maroo-roo njairia. Inceʼemo pampowia anu kaʼisa montepuʼu ungka ri tempo i Yosua ana i Nuu, tongawa lindo pai mawongko raya ntau seʼe.

¹⁸ Papitu ndeme kasaenya posusa ntau seʼe. Sandeme-sandeme bara tesangkuja ntila bangani Ncura mPadika i mPue Ala setu nabasa i Esira. Ri eo anu kaʼuayu ndapowia upacara pampapusa posusa, silulu pai songka mPadika setu.