NEHEMIA 7 - Sura Magali Nuntu Ngkatuwu

¹ Butu roo ndawangu pura-pura bente ngkota setu, kupokauka napataka ntau seʼe waʼa dampo baa-baa. Roo setu kusongkamo waʼa ntopojaga baa-baa, waʼa ntopongayu pai waʼa nto Lewi mawianaka tetalanya sambaʼa-sambaʼa seʼe.

² Tila pampapelinja songka ri Yerusale, kupesaraʼuka ri kasangkompoku i Hanani pai i Hananya anu mewali tadulako bangke ri bente ngkota, maka siʼa tongawa maria peruunya ri tau ntaninya, siʼa mampokaeka i Pue Ala pai sintinaja ndasarumaka.

³ Kutoʼoka tau seʼe, “Baa-baa ngkota Yerusale nepa maya ndaloka ane mokaamo karemenya pai sangaya-ngaya da ndadampo pai da ndarancongi ri kabareʼepanya mombesawani topojaga ri kangkinowianya. Pai sangaya-ngaya da ndapakanoto tau anu todo mojaga ungka ri oyo waʼa ntau anu meari ri Yerusale, santila da njau mpaliu ri banua mpojaga pai santila woʼu da malinja mamparesa daera anu mantolilimi waʼa banua ntau seʼe.”

Toʼo waʼa ntau anu mewalili ungka ri pantawani 7:4-73

⁴ Yerusale sambaʼa kota anu bangke paikanya podo sakodija tau anu mampeari, pai bareʼepa sondo banua anu ndawangu.

⁵ Inceʼe painaka ndapapaepe i mPue Ala yaku da naka kupasambaka waʼa ntau sondo pai waʼa ntadulako sangkani pai waʼa ntau loʼe, da naka kuimba tau seʼe malulu posuncu anu mampomulika. Ri tempo setumo kuparata sura paʼuki toʼo ntau anu uyu-uyunya mewalili ungka ri pantawani. Ewanceʼi kono totoraka anu kurata ri raya ncura setu:

⁶ Maria ri oyo waʼa ntau anu malai ungka ri poropinci Babeli mewalili ri Yerusale pai Yahuda, sambaʼa-sambaʼa seʼe njoʼu ri kotanya ngkalionya. Masaemo katuwu ntau seʼe ri kota ngkatetawaninya ri Babeli, montepuʼu ungka ri pangkeni i Datu Nebukanesa mewali tawani.

⁷ Waʼa ntadulako ntau seʼe inceʼemo: i Serubabeli, i Yesua, i Nehemia, i Asaria, i Raamiya, i Nahamani, i Modekai, i Bilisani, i Misipereti, i Bigawai, i Nahumi pai Baana.

^8-25 Seʼimo toʼo waʼa tina nto Isaraeli pai imbanya santina-santina seʼe anu mewalilimo ungka ri pantawani: i Parosi – 2.172 i Sepaca – 372 i Araki – 652 i Pahati-Moabi (waʼa muli i Yesua pai i Yoabi) – 2.818 i Elami – 1.254 i Satu – 845 i Sakai – 760 i Binui – 648 i Bebai – 628 i Asagadi – 2.322 i Adonika – 667 i Bigawai – 2.067 i Adina – 655 i Ateri (karua ntoʼonya i Sikia) – 98 i Hasumi – 328 i Besai – 324 i Haripa – 112 i Gibeo – 95

^26-38 Waʼa ntau anu waʼa ngkainya mampeari waʼa ngkota anu ndaʼuki toʼonya ri sura seʼi anu mewalilimo ungka ri pantawani: Kota Beteleme pai Netopa – 188 Anato – 128 Beta-Asimawe – 42 Kiria-Yeari, Kapira pai Beero – 743 Rama pai Gaba – 621 Mikimasi – 122 Beteli pai Ai – 123 Nebo anu ntaninya – 52 Elami anu ntaninya – 1.254 Harimi – 320 Yeriko – 345 Lodi, Hadida pai Ono – 721 Senaa – 3.930

^39-42 Seʼi toʼo waʼa ntina ntadu mpanyomba anu mewalilimo ungka ri pantawani: i Yedaya (muli i Yesua) – 973 i Imeri – 1.052 i Pasuri – 1.247 i Harimi – 1.017

^43-45 Tina nto Lewi anu mewalilimo ungka ri pantawani inceʼemo: i Yesua pai Kadimeeli (muli i Hodewa) – 74 Waʼa ntopomusiki i Banua i m(muli i Asapi) – 148 Topojaga Baa-Baa Bangke Banua mPanyomba ri Pue (muli i Salumi, i Ateri, i Talimoni, i Akubi, i Hatita pai i Sobai) – 138

^46-56 Seʼimo toʼo ntina waʼa ntopotetala ri Banua i mPue anu mewalilimoungka ri pantawani: i Siha, i Hasupa, i Tabaoti, i Kerosi, i Sia, i Padoni, i Lebana, i Hagaba, i Salumai, i Hanani, i Gideli, i Gahari, i Reaya, i Resina, i Nekoda, i Gasami, i Usa, i Pasea, i Besai, i Meunima, i Nepusima, i Bakibuki, i Hakupa, i Harahuri, i Basilita, i Mehida, i Haresa, i Barikosi, i Sisera, i Temahi, i Nesia, pai i Hatipa.

^57-59 Waʼa ntina ntoporioko i Ncolema anu mewalilimo ungka ri pantawani: i Sotai, i Sepereti, i Perida, i Yaala, i Darikoni, i Gideli, i Sepaca, i Hatili, i Pokereti-Hasebaimi, i Amoni.

⁶⁰ Pura-pura muli ntopotetala ri Banua i mPue pai waʼa ntoporioko i Ncolema anu mewalilimo ungka ri pantawani reʼe 392 imbanya.

^61-62 Ri oyo waʼa ntau anu malai ungka ri waʼa ngkota Tela-Mela, Tela-Haresa, Kerubi, Adoni pai Imeri, reʼe 642 tau anu tesua ri tina i Delaya, i Tobia pai Nekoda, paikanya bareʼe nakoto ntau seʼe mantuju katauseʼenya muli nto Isaraeli.

^63-64 Pai reʼe woʼu bara tesangkuja tina ntadu mpanyomba anu bareʼemo ndarata toʼo ntau anu mampomulika tau seʼe. Waʼa ntina setu inceʼemo: i Habaya, i Hakosi pai i Barasilai. (Maka reʼe sambaʼa ngkai ntadu mpanyomba Barasilai mamporongo weʼa ungka ri tina i Barasilai anu i Gilea, pai ripurinya mampake toʼo ntina manianya.) Ua bareʼe nakoto ntau seʼe mantuju tanda kaʼisemanya ngkai ntau seʼe, inceʼe painaka bareʼe ndatarima mewali tadu mpanyomba.

⁶⁵ I petoro ntana Yahuda mampetangani tau seʼe da mangkoni pangkoni anu ndapanyombaka ri Pue Ala, rantani reʼe sambaʼa tadu mpanyomba anu marata totoraka ungka ri Pue mampoliu Uri pai Tumi.

^66-69 Waʼa ntau ndatawani anu mewalilimo ri tananya, poromunya pura-pura reʼe 42.360 tau, simpoyunu pai tau seʼe melulu waʼa anamayunu ntau seʼe imbanya 7.337 tau pai waʼa ntopongayu 245 tau. Tau seʼe woʼu mangkeni waʼa mpinatuwu: Nyara – 736 Nyara yopo – 245 Onta – 435 Kalide – 6.720

^70-72 Mari tau anu mawai pombainya anu da ndapake ri pampakoroka Banua i mPue: ungka ri petoro: – 8 kilo wuyawa 50 mangko upacara 530 juba ntadu mpanyomba ungka ri tadulako ntau santina-santina seʼe: – 168 kilo wuyawa 1.250 kilo salaka ungka ri waʼa ntau ntaninya: – 168 kilo wuyawa 140 kilo salaka 67 juba ntadu mpanyomba

⁷³ Waʼa ntadu mpanyomba, waʼa nto Lewi, waʼa ntopojaga baa-baa Banua i mPue, waʼa ntopongayu, mari woʼu waʼa ntau sondo, waʼa ntopotetala ri Banua i mPue, ndatoʼomo pura-pura to Isaraeli, mearimo riwaʼa ngkota pai waʼa desa ri Yahuda.