NEHEMIA 6 - Sura Magali Nuntu NgkatuwuPombasambaʼa-mbaʼa ntau anu maewa i Nehemia 6:1-14 1 Nadongemo i Sambala, i Tobia, Gesemi pai waʼa iwali mami anu ntaninya, karoomo mami mampakoroka bente ngkota, pura-pura kabolonya roomo kapigati, mau ri tempo setu bareʼepa kupataka waʼa dampo ri baa-baa ngkota. 2 Napakau i Sambala pai i Gesemi sura anu mampeboo yaku da njoʼu momberata pai tau seʼe ri sambaʼa desa anu njau ri Rato Ono. Paikanya kuincani tinako ndaya ntau seʼe anu da mampakarugi yaku. 3 Inceʼe painaka kupakatuka tau seʼe silinya, mantoʼo, “Yaku bareʼe jajiku da njoʼu maka maria tetala anu da kuparoo. Tetala setu bareʼe da mewali ane njoʼu yaku momberata pai komi.” 4 Aopo ngkani pampakatu ntau seʼe sura mampeboo yaku, paka siwia banganinya, paikanya kupakatu woʼu silinya anu siwia. 5 Ri kaʼalima ngkaninya rata sambaʼa tau i Sambala, mawai kaku sura mpeekasi, 6 ewaseʼi bangani ncura setu, “I Gesemi mampamoncoka kareʼenya bambari ri waʼa banca anu reʼe ri santongo seʼi, anu mangantoʼo siko pai pura-pura to Yahudi marencanamo sambaʼa peewa, inceʼe painaka siko mampakoroka bente ngkota. Pai natoʼo woʼu siko da malantimo koromu mewali mokole nto Yahuda, 7 pai siko mangatujumo bara tesangkuja nabi anu da mangalanti siko ri Yerusale. Bambari setu manoto da karatanya ri talinga i datu. Inceʼe painaka kamaʼimo mampombetoʼoka kono inceʼe setu.” 8 Paikanya kusili sura setu, kutoʼoka, “Pura-pura anu nuimbasi setu podo mbamba anu nupareʼe ngkaliomu.” 9 Napebutuka ntau seʼe maekasi kami da naka kupeʼontoka tetala setu. Mekakai yaku kutoʼo, “Boo Pue Ala ndipakaroso rayaku!” 10 Ri tempo setu seʼe njoʼu yaku ri banua i Semaya ana i Delaya pai makumpu i Mahetabeeli, ua bareʼe jajinya madadu yaku. Natoʼoka yaku, “Maʼimo takanjoʼu mesambuni ri Banua i mPue, tarancongi pura-pura damponya maka reʼe tau anu mantunggai da mampapepate siko. Bara sambengi seʼi da napampepate siko.” 11 Paikanya mesono yaku, kutoʼo, “Yaku seʼi banya tau anu dangga anu da molonco mesambuni. Pai yaku seʼi podo anggota biasa bareʼe maya mesua ri Banua i mPue, yaku da mate. Bareʼe kupokono!” 12 Butu kumonawa-nawa, kurata ndayamo, pesale i Semaya setu banya ungka ri Pue Ala, paikanya ungka ri Tobia pai Sambala. Tau seʼe roo mawaika i Semaya doi da naka napokono masale yaku. 13 Tinako ndaya ntau seʼe da naka merataeka ndayaku, painaka da kululu pau ntau seʼe da mampowia salaa. Ane mewali ewanceʼe, reʼemo perontada ntau seʼe da mampakajaʼa toʼoku, yaku da napau-paumo ntau. 14 Mekakai yaku kutoʼo, “Boo Pue Ala, ndipetiromo Pue nunjaa anu napowia i nTobia pai i Sambala setu. Ndihukumo Pue tau seʼe! Ewanceʼe seʼe nabi weʼa anu mampotoʼo i Noaja pai waʼa nabi ntaninya anu mangaeka-ekasi yaku.” Karoomo pawangunaka bente ngkota 6:15–7:3 15 Pawali mpakoroka bente ngkota setu 52 eo kasaenya, nepa roo ri rua mpuyu pai alima eo mbuya Eluli. 16 Butu nadonge waʼa iwali mami anu ri oyo waʼa banca anu mantolilimi kami, maeka raya ntau seʼe boi majaʼa toʼonya, maka naincani ntau pura-pura kapawianaka waʼa ntetala setu pue Ala anu mantulungi kami. 17 Sindara setu waʼa ntadulako nto Yahudi ntongo mombesura-surani pai i Tobia. 18 Maria to Yahudi anu mobale-bale pai i Tobia, maka siʼa mania i Sekanya ana i Ara. Pai ana i nTobia anu mampotoʼo i Yohanani mamporongo ana i Mesula ana i Berekia. 19 Bareʼe naowe-owe i nTobia mampakatu sura ri yaku, tinako ndayanya maeka-ekasi yaku, pai waʼa ntadulako nto Yahudi woʼu maimba-imba kaku kadago i nTobia. Pai pura-pura nunjaa anu kutoʼo njoʼu napetumbuka ntau seʼe i Tobia. |
@LAI 2000
Indonesian Bible Society