NEHEMIA 5 - Sura Magali Nuntu Ngkatuwu

I Nehemia mantulungi waʼa ntau kaasi-asi 5:1-13

¹ Bareʼe masae ungka lairia maria to Yahudi tuama pai weʼa anu montepuʼumo manggantali waʼa ntau anu kasambaʼa-mbaʼa bancanya.

² Reʼe anu mantoʼo, “Yaku maria anaku. Kami bareʼemo reʼe gandu anu da kakatuwuka.”

³ Reʼe woʼu anu mangantoʼo, “Ua kaparinya, yaku kugademo bonde gandu, bonde anggoro pai banua mami da nakareʼe ndaolika gandu da naka neʼe mate yoga kami.”

⁴ Pai reʼe woʼu anu mangantoʼo, “Kami mangancabomo doi da ndabayarika asele anu ndapakanoto i mokole, asele bonde gandu pai bonde anggoro mami.

⁵ Ara banya kami seʼe woʼu to Yahudi? Ara banya ana mami woʼu siwia pai waʼa ana nto Yahudi anu ntaninya? Paikanya mau ewanceʼe bareʼemo reʼe jaya ntaninya kapepombaikamo ana mami mewali watua. Pai reʼemo ana mami anu anaweʼa anu kapobalu mewali watua. Bareʼemo reʼe roso mami, maka bonde gandu pai bonde anggoro mami roomo kagade.”

⁶ Padongeku pompau ntau seʼe setu, maʼai kojo kasengke ndayaku,

⁷ pai kupakanoto sangaya-ngaya da kuparoo incetu. Inceʼe painaka kuseko waʼa ntau loʼe pai waʼa ntadulako ri oyo ntau sondo, kutoʼoka tau seʼe, “Komi mangampipisi waʼa ngkasangkompomi ngkaliomi!” Ungka lairia kupapogombo waʼa ntau pura-pura da mampakanoto jaya mbeʼi anu da ndalulu,

⁸ pai kutoʼoka tau seʼe “Ri gori-gori mpangkotota kita roomo mangaosu waʼa ngkasangkompota to Yahudi anu mampobalumo koronya ri tau mencua. Paikanya inceʼi ntaninya, jakomi anu mariso tau seʼe da mampobalu koronya ri komi, ntanoka komi seʼe to Yahudi.” Bareʼemo nakoto waʼa ntadulako setu mesono.

⁹ Nepa kutoʼoka woʼu tau seʼe, “Powiami setu bareʼe madago! Kamonconya komi da tuwu mampokaeka i Pue Ala. Maka ane ewanceʼe waʼa iwalita anu bereʼe puenya setu bareʼe ndiwaika tempo da mampetikodi kita.

¹⁰ Yaku ngkalioku paiwaʼa ngkasangkompoku pai waʼa yunuku mampapasaboka doi pai gandu ri tau sondo. Pai bareʼe da kuperapi sawaninya.

¹¹ Mewali komi woʼu da mampalisi waʼa inda ntau sondo ri komi, bara motaʼa doi bara motaʼa gandu, bara anggoro bara lana saitu. Pai maliga-liga ndipapewalili bonde gandu, bonde anggoro, bonde saitu bara banua ntau seʼe!”

¹² Mesono waʼa ntadulako setu, natoʼo, “Totorakami seʼi da kalulu. Da kapapewalili muni pura-pura pai bareʼe da kaperapi pombayari bara nunjaa-njaa ri tau seʼe!” Nepa kupeboo waʼa ntadu mpanyomba nepa kupokau waʼa ntadulako setu montando koro ri suara waʼa ntadu mpanyomba setu, mangantoʼo nunjaa anu roo natoʼo ntau seʼe setu monco-monco kojo da nawianaka ntau seʼe.

¹³ Ungka lairia kulede soʼo ntongoku kuwurentesaka, nepa kutoʼo, “Ewanceʼimo da ndapawurentesaka i mPue Ala tau anu bareʼe mabangani janjinya. Tau setu da mewali kaasi-asi, banua sangkani pai aga-aganya da ndatima i mPue Ala!” Pura-pura tau mogombo setu mesono, natoʼo, “Ami!” nepa naunde ntau seʼe i Pue. Nabangani kojo waʼa ntadulako setu janji ntau seʼe.

Kapande ndaya i Nehemia 5:14-19

¹⁴ Sampuyu pai radua ntaʼu kasaenya pewaliku petoro ri Yahuda, inceʼe montepuʼu ungka ri taʼu karuampuyu rata ri taʼu katogo mpuyu pai radua poparenta i Datu Aritasasa. Sangkasae setu yaku pai waʼa ngkasangkompoku bereʼe kupantima gaji kapetoroku.

¹⁵ Waʼa petoro anu moriu, mampapakoyoka tau sondo 40 doi salaka anu da mewali pangkoni pai panginunya ri raya anu sandeme. Pai waʼa mpegawai ntau seʼe mamparini tau sondo. Paikanya yaku bareʼe kumowia ewanceʼe maka yaku mampokaeka i Pue Ala.

¹⁶ Kumotetala kojo ri gori mpangkotoku mawangunaka bente ngkota pai bereʼe mau sakodi tana anu kutima mewali sili lengeku seʼi pura-pura tauku paka motetala ri pombangunaka setu.

¹⁷ 150 tau to Yahudi anu kupakoni ri banuaku, bareʼepa ndaimba waʼa linggona ungka ri waʼa banca anu mombemosu pai kami.

¹⁸ Sandeme-sandeme kupatoka sambaʼa japi, aono bimba anu maboko pai maria woʼu manu anu ndaroro, pura-pura setu ongkosoku ngkalioku. Pai tesampuyu ndeme oyonya kupatoka anggoroku. Paikanya mau ewanceʼe bareʼe kupesingaraka gaji ngkapetoroku maka bareʼe kupokono da mampakapari waʼa ntau sondo anu lawi maparimo katuwunya.

¹⁹ Kuperapi boo Pue Ala, ndiendomo waʼa anu roo kuwianaka pai ndidoncomo yaku.