NEHEMIA 4 - Sura Magali Nuntu Ngkatuwu

I Nehemia masuaraki waʼa iwali nto Yahudi 4:1-23

¹ Butu nadonge i Sambala, kami to Yahudi mampakoroka bente ngkota, maʼai kojo kasengke ndayanya painaka natepuʼumo mampasinggiri kami.

² Mompau siʼa ri suara waʼa yununya pai waʼa ncurodado nto Samaria, natoʼo, “Nunjaa anu ntongo nawianaka nto Yahudi tengo setu, pai bareʼe naincani raoa setu? Tau seʼe da mawali wangu muni kota seʼi? Nasarumaka ntau seʼe tetala setu bara da roo ri raya anu sandeme, podo ua ndapampanyombaka panyomba? Nasarumaka ntau seʼe amaa anu mobuyu-buyu sinjau bara da napapewali ntau seʼe watu bente?”

³ Mekakore i Tobia ri sorinya, mompau siʼa natoʼo, “Peole, bente anu nawangu ntau seʼe setu! Mauja podo asu yopo masemba liu-liu marua!”

⁴ Ungka lairia mekakai yaku, kutoʼo, “Boo Pue Ala, ndidongemo Pue ewambeʼi napampetikodi kami! Ndipapasuʼukamo tau seʼe ri wawo ntanoananya waʼa mpau pompetikodi setu. Mbolimo pura-pura aga-aganya da napamuru ntau pai tau seʼe da ndakeni mewali tawani ri tana ntau.

⁵ Neʼe boi ndipokapuru tau seʼe pai neʼe boi ndikalingani salaa ntau seʼe, maka napetikodimo ntau seʼe kami anu ntongo mombangunaka seʼi.”

⁶ Sindara setu kami motetala mpaliu, pai bareʼe masae ungka njairia roomo kojo kapakoroka bente santongomo kandatekanya, maka waʼa ntau sondo motetala kojo ri gori mpangkotonya.

⁷ Butu nadonge i Sambala pai i Tobia pai waʼa nto Amoni pai Asido sangkani pai waʼa nto Ara, pampakoroka bente ngkota Yerusale malinja mpaliu, waʼa ngkabolo bente ndatepuʼumo mampigati, maʼai kajaʼa ndaya ntau seʼe.

⁸ Mogombo tau seʼe da maungku Yerusale da naka tewuraga kami.

⁹ Inceʼe painaka mekakai kami ri Pue Ala pue mami pai mangajagai kota setu ri eo pai ri wengi.

¹⁰ Paikanya to Yahuda montepuʼumo mampongayuka ngayu ngkalelu ndaya, ewaseʼi natoʼo, “Puramo roso mami maungkulaka waʼa mparewa, ntanoka waʼa nyoo ntongo mowawo-wawo. Bareʼe kapoli motetala ewanceʼi, mawangu bente ngkota seʼi.”

¹¹ Sindara setu iwali mami marencana da mabungka ncoroba kami, da mampepate kami da naka teʼonto potetala mami.

¹² Paikanya to Yahudi anu maroo-roo mosu ri tau seʼe, papongkani-ngkani rata mantoʼoka kami kono rencana waʼa iwali setu.

¹³ Inceʼe painaka kupotilaka, penai, tawala pai pana ri waʼa ntau sondo, nepa kudika tau seʼe malulu tinanya sambaʼa pai sambaʼa ri sambaliku waʼa bente, anu bareʼepa roo ndapakoroka.

¹⁴ Butu kukita waʼa ntau sondo maeka rayanya, kutoʼoka tau seʼe pai waʼa ntau loʼe pai waʼa ntadulako, “Neʼe maeka rayami ri iwali! Neʼe ndikalingani i Pue anu maroso pai makuasa, ndipombetotomo maendo waʼa ngkasangkompomi, waʼa anami, rongomi pai banuami!”

¹⁵ Nadongemo waʼa iwali mami kapaincanimo waʼa rencana ntau seʼe. Naepe ndayamo ntau seʼe i Pue Ala anu maompo tinako ndaya ntau seʼe. Inceʼe painaka motetala muni kami mampakoroka bente ngkota setu.

¹⁶ Paikanya montepuʼu ri eo setu jamo santongo ungka ri waʼa ntauku anu motetala, maka anu santila mojaga mpaliu, mampake rengko mpoʼiwali mantangke tawala, kanta pai panai. Waʼa ntadulako ntau sondo mamposiʼiowaka waʼa ntau sondo ri gori mpangkotonya,

¹⁷ anu ntongo mpotetala mampakoroka bente setu. Waʼa ntau anu manteo parewa anu da ndapake ri pombangunaka setu sambali palenya motetala sambali woʼu palenya mangkekeni parewa mpoʼiwali.

¹⁸ Ewanceʼe seʼe waʼa mpande mbatu mainti-inti penai ri lompenya. Anu da mantawuisi surupeta petondoni ngkareʼe iwali tikali mpaliu ri soriku.

¹⁹ Kutoʼoka waʼa ntau sondo, waʼa ntau loʼe pai waʼa ntadulako, “Tetalata seʼi kakobangke-bangkemo painaka kita tepotila-tilamo ri sangkarate bente seʼi, mewali kita mombelawa-lawamo sambaʼa pai sambaʼa.

²⁰ Mewali, ane ndidonge oni surupeta, ganggara kojo komi pura-pura mompasambaka ireʼi, maka i Pue Ala pueta da moʼiwali mampompasambalika kita.”

²¹ Ewanceʼemo potetala mami montepuʼu ri mosu reme rantani mengkaa betuʼe ri yangi. Santila tau sondo motetala mampakoroka bente pai anu santila woʼu mojaga-jaga mantangke tawala.

²² Sangkasae mpotetala setu pura-pura topotetala pai tau anu mantulungi tau seʼe, kupokau da sambengi ri Yerusale. Ane mawengi sangkani-ngkani majaga kota, pai mareme motetala mawangunaka bente.

²³ Yaku ngkalioku pai waʼa yunuku sangkani pai waʼa ntauku pai waʼa ntopojagaku mampake mpaliu rengko mpotetala ri eo pai ri wengi. Kami tikali mpaliu pai parewa mpoʼiwali ri pale mami.