NEHEMIA 3 - Sura Magali Nuntu Ngkatuwu

Pampakoroka bente ngkota Yerusale 3:1-16

¹ Ewaseʼi katepodedenya pampakoroka bente ngkota Yerusale. I nTadu mPanyomba Bangke Eliyasi sangkani pai waʼa yununya mawali wangu Baa-Baa Bimba, mampataka waʼa damponya pai mampanyombaka anu ndapatani tila i mPue. Tau seʼe mampakoroka pai tetulabasi bente ndatotoka Menara Saatu nakarataka ri Menara Hananeeli

^2-16 Waʼa ntau anu banya tadu mpanyomba woʼu motetala mampakoroka bente ngkota sangkani pai waʼa baa-baa pai waʼa menaranya, ewaseʼi podede mpotetala ntau seʼe: Waʼa nto Yeriko, i Sakuri ana Imiri Tina i Senaa: Dampo Baa-Baa Bau, pai waʼa ntungka mbombonya, waʼa dampo mbombo, paku bose pai waʼa ranconginya. i Meremoti ana i Uria pai makumpu i Hakosi. i Mesula ana i Berekia pai makumpu i Mesesabeeli. i Sadoki ana i Baana Bangani ngkota Tekoa (waʼa ntau loʼe ri kota setu bareʼe napokono mawianaka tetala anu manee). Yoyada ana i mPasea pai Mesula ana i Besoja: Baa-baa Bangke Yesana pai waʼa ncobonya, tungka mbombo pai waʼa damponya, waʼa mpaku bose pai waʼa ranconginya. i Melaca ungka ri Gibeo pai i Yadoni ungka ri Meronoti. Waʼa nto Gibeo pai waʼa nto Misipa: bente ngkota rantani rata ri langkanae petoro Eparata tondo Kasoyoa. i Usieli, sambaʼa pande wuyawa ana i Harihaya. i Hananya, sambaʼa tau anu loʼe mampowia lana wongi: Rata ri Bente ngKota Mabini. i Repaya ana i Huri, anu mangkuasai santongo kecamata ngkota Yerusale. i Yedaya ana i Harumapi: bente ngkota anu mosu ri banuanya ngkalionya. i Hatusi ana i Hasabeneya i Malikia ana i Harimi pai Hasubi ana i Pahati-Moabi: bente ngkota sumpanya pai Menara mPaneru. i Salumi ana i Halohesi anu mangkuasai santongo wilaya Yerusale natulungi waʼa ananya anu weʼa. i Hanu pai waʼa ntau anu ri Sanoa: Baa-Baa ri Rato sangkani pai waʼa damponya, waʼa mpaku bose pai waʼa ranconginya. Pai bente ngkota 440 meteri karatenya rata ri Baa-Baa Bangke Nyoo. i Malikia pai Rehabu, anu mangkuasai wilaya Beta-Keremi: Baa-Baa Bangke Nyoo pai waʼa damponya, waʼa mpaku bose pai waʼa ranconginya. i Salumi pai i Kolose anu mangkuasai wilaya Misipa: Baa-Baa Mata Ue pai ata, waʼa dampo pai waʼa mpaku bose sangkani pai waʼa ranconginya. Ewanceʼe seʼe Limbo Sela mosu ri bonde langkanae rata ri eja mpenaʼu-naʼu ri Kota i Daudi. i Nehemia pai i Asibuki, anu mangkuasai santongo wilaya Beta-Suri: bente rantani rata ri dayo ntina i Daudi, limbo ndakae pai tanci ncurodado.

Waʼa nto Lewi anu tesua mampakoroka bente 3:17-21

^17-21 Reʼe bara tesangkuja ntila bente anu napakoroka nto Lewi, ndatila-tila woʼu ri waʼa nto Lewi santina-santina seʼe, ewaseʼi katetilanya: i Rehumi ana i Bani i Hasabiya anu mangkuasai santongo Wilaya Kehila. Siʼa anu mampakoroka bente anu simpontu pai kareʼe mpearinya. i Binui ana i Henada, anu mangkuasai woʼu santongo Wilaya Kehila. i Eseri ana i Yesua, anu mangkuasai Misipa: bente ri suno njaya ri suara gudangi parewa mpoʼiwali. Baruki ana i Sabai: bente ungka suno njaya rata ri boboka i nTadu mPanyomba Bangke Eliyasi. i Meremoti ana i Uria makumpu i Hakosi: bente ngkota ungka ri banua i Eliyasi rata ri tando banua setu.

Waʼa ntadu mpanyomba anu tesua mampakoroka bente 3:22-26

^22-26 Reʼe bara tesangkuja ntila bente ngkota anu napakoroka waʼa ntadu mpanyomba, ewaseʼi katetilanya: Waʼa ntadu mpanyomba anu kareʼe mpearinya lawa ungka ri Yerusale. I Benyami ana i Hasubi: bente ri suara banua ntau seʼe. I Asaria ana i Maaseya ana i Ananya: bente mosu ri banuanya. I Binui ana i Henada: bente ungka ri banua i Asaria rata ri suno bente. I Palali ana i Usai: bente ungka ri suno pai menara langkanae tondo ri wawonya, mosu ri kareʼe mpojaga. i Pedaya ana mParosi: bente rata ri Baa-Baa Bangke Ue tondo ri pebetea pai menara mpojaga Banua i mPue. (Bareʼe lawa ungka njairia reʼe tana anu ndapapotoʼoka Opeli, kareʼe mpeari waʼa ntopotetala ri Banua i mPue.)

Waʼa ntopotetala anu ntaninya 3:27-32

^27-32 Reʼe bara sangkuja ntila bente anu napotetalaka waʼa ntau seʼe, ewaseʼi katetila-tilanya: Waʼa ntau bangani ngkota Tekoa: bente ungka ri suara menara banua mpojaga Banua i mPue rata ri bente tana Opeli. Waʼa ntadu mpanyomba anu meari mosu ri Baa-Baa Bangke Nyara: bente anu mombesuara pai banua ntau seʼe, ungka ri baa-baa setu liu ri tondo utara. i Sadoki ana i Imeri: bente anu mombesuara pai banuanya. I Semaya ana i Sekanya topojaga Baa-Baa mPebetea: bente anu mombesuara pai banuanya. I Hananya ana i Selemia pai i Hanu ana i Salapa anu kaʼaono. I Mesula ana i Berekia: bente anu mombesuara pai banuanya. Malikia, sambaʼa pande wuyawa: bente ri kareʼe mpeari ntopotetala ri Banua i mPue pai banua waʼa ntopobalu-balu ri suara Baa-Baa Mipakadi rantani rata mosu ri lincu ri wawonya ri suno bente ri payompo yangi tondo tasi. Waʼa mpande wuyawa pai topobalu-balu: marata tila bente tondo ri tandonya, montepuʼu ungka ri lincu tondo ri wawonya ri suno bente rata ri Baa-Baa Bangke Bimba.