NEHEMIA 2 - Sura Magali Nuntu Ngkatuwu

I Nehemia njoʼu ri Yerusale 2:1-20

¹ Aopo mbuya ungka njairia, ri anu sandeme ri wuya Nisani, sindara mpangkoni i Datu Aritasasa, yaku mampeporiokoka anggoro ri sira paikanya bareʼe ntani madonde rayaku. Bareʼepa reʼe ndapangkita lioku anu ewa ri sandeme setu.

² Inceʼe painaka meoasi sira, ndatoʼo, “Wenu painaka kukita maʼai kasusa ndayamu seʼi bareʼe majuʼa? Manoto reʼe anu nupomasusa ndaya.” Jingki rayaku,

³ mesono yaku kutoʼo, “Tuwu komi Datu rantani masae-sae! Wenu painaka bareʼe da mapari rayaku ane kota kanjau dayo waʼa ntau piamoku rantani wawaseʼi jamo awunya anu ndakita, waʼa baa-baanya puramo nakoni apu.”

⁴ Meoasi i Datu, ndatoʼo, “Mewali nunjaa anu nutangara ndaya?” Mekakai ri rayaku yaku ri Pue Ala anu makuasa ri suruga,

⁵ nepa kumompau ri Datu, kutoʼo, “Ane mabuya rayami Datu mampoʼioka perapiku, ndipokaumo yaku njoʼu ri tana Yahuda da mangawangu muni kota kanjau dayo waʼa ntau piamoku.”

⁶ Sindara setu i Datu motunda moawe-awe pai i Datu weʼa, ndaiokamo perapiku setu. Meoasi sira ndatoʼo, sangkuja ngkasae da kanjoʼumo pai impia da pewalilimu, inceʼe painaka kutoʼoka sira eo mbuya anu lawi roomo kupakanoto.

⁷ Ungka lairia kuperapi sura anu da rata ri waʼa petoro anu njau ri poropinci Eparata tondo Kasoyoa da naka natulungi ntau seʼe pelinjaku rata ri tana Yahuda.

⁸ Kuperapi woʼu sura anu da rata ri Asapi anu majagai yopo negara da naka siʼa mampatoka kaju anu da ndapowiaka waʼa baa-baa bente ngkota pai banua da peariku. Ndabangani i Datu pura-pura perapiku setu, maka i Pue Ala anu mantulungi yaku.

⁹ Malaimo kojo yaku njoʼu ri poropinci Eparata tondo Kasoyoa, nayunuki bara tesangkuja tadulako ncurodado pai surodado anu monyara anu ndasongka i datu. Rata njairia kuparata ri waʼa petoro sura i datu.

¹⁰ Paikanya butu nadonge i Sambala to Beta-Horoni pai i Tobia sambaʼa tau ndalanti ungka ri Amoni, karataku setu da mangantulungi to Isaraeli, maʼai kojo kalente ndayanya.

¹¹ Karataku ri Yerusale, meosa yaku tatogo ndeme.

¹² Ri raya anu tatogo ndeme setu bereʼe mau sambaʼa tau anu kutoʼoka kayakunya marata totoraka ungka ri Pue Ala da mangawangu muni kota Yerusale. Ri karua mbenginya, ntongo mbengi membangu yaku, kusale bara tesangkuja yunuku njoʼu ri sambali bente. Podo yaku anu melamba ri kalide, bareʼe kakeni pinatuwu ntaninya anu ndapelamba.

¹³ Pesuwu mami ungka ri kota moliu ri Baa-Baa Bangke Yombo tondo ri kasoyoa. Pelinja mami katotoka Baa-Baa Bangke Nyoo, moliu ri Mata Ue Naga. Ri pelinja mami setu yaku mamparesa waʼa ngkajaʼa bente ngkota, pai kukita woʼu waʼa baa-baa anu puramo nakoni apu.

¹⁴ Kamelinja mpaliu ungka ri tondo pebetea katotoka tondo utara njoʼu ri Baa-Baa Bangke Ue Metumbulaka pai Limbo Mokole. Paikanya njairia bereʼe jaya da poliu ngkalide anu kupelamba setu, maka buke pai wune ngkarua bente setu.

¹⁵ Inceʼe painaka mobalungke kami ri Yombo ngKidero, mampaliu pelinja mami sambengi setu, seʼi mamparesa bente ngkota setu. Roo setu kapilesaka pelinja mami mewalili ri kota mojaya ri Baa-Baa Bangke Rato.

¹⁶ Bereʼe mau sambaʼa tau ri oyo waʼa ntopombawanaka ntau sondo anu mangaincani ri mbeʼi palaiku, pai nunjaa anu ntongo kunawa-nawa. Maka rata ri tempo setu bareʼepa reʼe bara nunjaa-njaa anu kutoʼoka waʼa ntau anu kasambaʼa-mbaʼa bancaku, madago waʼa ntadu mpanyomba pai waʼa ntau loʼe, bara waʼa mpegawai pai waʼa ntau anu da mamposiwangu bente Yerusale setu.

¹⁷ Ripurinya nepa mompau yaku ri tau seʼe kutoʼo, “Ndipeolemo ewambeʼi katedikanakata anu mapari seʼi! Yerusale jamo awunya, waʼa baa-baa pura nakoni apu. Ndimaʼimo tapawali wangu muni bente ngkota Yerusale da naka neʼe ndapetikodi woʼu kita.”

¹⁸ Nepa kutuntuka tau seʼe ewambeʼi pantulungi i mPue Ala yaku pai nunjaa anu roo ndatoʼo i datu ri yaku. Mesono tau seʼe natoʼo, “Maʼimo tapantepuʼu mombangunaka!” Mompatikalimo kojo tau seʼe da mantepuʼu potetala.

¹⁹ Butu tedonge ri Sambala pai Tobia pai Gesemi sambaʼa to Ara, rencana mami setu, napopogeleka pai napanggeoni kami. Natoʼo ntau seʼe, “Nunjaa anu da ndipowia seʼi? Ara komi seʼi da maewa i datu?”

²⁰ Mesono yaku, kutoʼo, “I Pue Ala anu makuasa ri suruga inceʼe anu da mampapewali tetala seʼi. Kami seʼi waʼa mbatuaa inceʼe painaka kami mantepuʼu pombangunaka. Paikanya komi bereʼe kuasami bara aga-agami ri Yerusale. Pai ane kono napau ntau Yerusale, bareʼe da kono natoʼo-toʼo ntau toʼomi.”