NEHEMIA 13 - Sura Magali Nuntu Ngkatuwu

To Isaraeli mompatani ungka ri waʼa ntau mencua 13:1-3

¹ Sindara mpabasa padika i Musa ri waʼa ntau sondo, ndaratamo totoraka anu ewaseʼi katetoʼonya: ‘to Amoni pai to Moabi manoto bareʼe maya kojo mompasigalo pai tau i mPue Ala;

² maka ri tempo mpelinja nto Isaraeli ungka ri tana Masiri, banca anu radua setu bareʼe mawai pangkoni pai panginu ri to Isaraeli. Sawanya da natulungi, napetundeka ntau seʼe ri Bila da mantadeasi to Isaraeli. Paikanya i Pue Ala pueta mawalisaka petadeasi setu mewali popadonco.’

³ Butu nadonge nto Isaraeli padika setu, napatani ntau seʼe pura-pura tau mencua ungka ri oyo nto Isaraeli.

Waʼa pompakadawoʼu anu nawianaka i Nehemia 13:4-31

⁴ Ri kabareʼepanya nawianaka i Nehemia pompakadawoʼuni setu, i Tadu mPanyomba Eliyasi anu ndadika majagai waʼa lincu kanjau mpadika waʼa mpangkoni ri Banua i mPue, mobale maramu pai i Tobia.

⁵ Nape pombaika i Eliyasi ri Tobia sambaʼa lincu bangke anu kamonconya da ndapangadika pompatoka pangkoni anu ndapatani, waʼa mpanyomba gandu, dupa pai waʼa mparewa anu ndapake ri Banua i mPue, panyomba anu da tila waʼa ntadu mpanyomba, panyomba sampotila sampuyu, gandu, anggoro pai lana saitu anu da ndatilaka waʼa nto Lewi, waʼa ntopomusiki pai waʼa ntopojaga baa-baa Banua i mPue.

⁶ Pewalinya ewanceʼe yaku bareʼe njau ri Yerusale, maka ri taʼu katatogo mpuyu pai radua poparenta i Aritasasa datu nto Babeli setu, yaku ndeku ri Babeli momberata pai datu mampetumbu potetalaku ri datu. Yaku ndataʼamaka masae sakodi nepa ndawai,

⁷ mewalili ri Yerusale. Karataku ireʼi jingki rayaku madonge i Eliyasi mawaikamo i Tobia sambaʼa lincu ri raya Banua i mPue.

⁸ Maʼai kojo kasengke ndayaku, njoʼu yaku kupewunuka ri sambalikunya pura-pura aga-aga i Tobia anu njau ri ri raya lincu setu.

⁹ Roo setu kupokau ndawianaka upacara pampakagali waʼa lincu setu, nepa kudika muni waʼa mpanyomba anu kamonconya da ndadika njairia, ewa gandu, dupa pai waʼa mparewa Banua i mPue.

¹⁰ Banya podo inceʼe, kurata waʼa ntopomusiki pai waʼa nto Lewi malaimo ungka ri Yerusale, njoʼumo ri bondenya sambaʼa-sambaʼa seʼe, maka waʼa ntau sondo bareʼe mampagana anu da nakatuwuka ntau seʼe.

¹¹ Inceʼe painaka kuseko waʼa ntopombawanaka maka napapaliukamo ntau seʼe Banua i mPue bareʼe ndapasilolongani. Nepa kuwali mpeboo waʼa nto Lewi pai waʼa ntopomusiki motetala muni.

¹² Kupokau waʼa ntau sondo mampasilolongani muni panyomba sampotila sampuyu ungka ri gandu, anggoro pai lana saitu ndabanganika waʼa lincu padika pangkoni.

¹³ Kudika bara tesangkuja tau majagai waʼa lincu padika waʼa mpangkoni setu tau seʼe setu inceʼemo: i Tadu mPanyomba Selemia, i Sadoki tau anu loʼe ri Padika setu pai i Pedaya siʼa to Lewi, i Hanani ana i Sakuri makumpu i Matanya kudika mantulungi tau seʼe. Maka kusarumaka waʼa ntau setu timama da mangantila-ntila waʼa mpangkoni ri waʼa junu sampotetalanya ri kamonconya.

¹⁴ Boo Pue Ala pueku, ndipetiromo pura-pura anu kupowia ri Banua-Mi pai katewianaka mporiokoi.

¹⁵ Ri tempo setu kukita ri eo Umapo, reʼe bara tesangkuja to Yahuda mompaa anggoro, anu saʼe woʼu maʼulaya gandu, anggoro, wua anggoro, wua ara pai anu ntaninya ri kalidenya ndakeni ri Yerusale. Kupetangani tau seʼe mobalu-balu ri Yerusale.

¹⁶ Bara tesangkuja tau ungka ri Tiru anu maroo-roo ri Yerusale mangkeni bau pai mpengaya-ngaya balu-balunya ri eo Umapo, napobalu ri waʼa nto Yahudi.

¹⁷ Kuseko woʼu waʼa ntadulako nto Yahuda, kutoʼoka tau seʼe, “Bara bareʼepa ndiepe ndaya kakominya seʼi mampowiamo anu majaʼa ri kabareʼenya ndipakagali eo Umapo?

¹⁸ Ua waʼa ncalaa anu ewaseʼi painaka ndahuku i mPue Ala waʼa ntau piamota painaka ndagero kota seʼi. Mewali seʼi da ndiranga-rangani woʼu karau ndaya i mPue Ala ri to Isaraeli ri kabareʼenya ndipakagali eo Umapo?”

¹⁹ Inceʼe painaka kusongka tau seʼe da naka sangkani-sangkani eo Umapo, montepuʼu ungka ri eo Jumaa mawengi, waʼa baa-baa ngkota da ndarancongi ane ngkinowiamo, pai bareʼe maya ndaloka ane bareʼepa liu eo Umapo ri eo Saatu mawengi. Kudika bara tesangkuja tauku ri baa-baa setu da mampepeoleka da naka ri eo Umapo bereʼe balu-balu anu ndakeni mpesua ri raya ngkota.

²⁰ Paikanya reʼe teasantongo, bara tesangkuja topobalu-balu pai anu mampobalu aga-aga sambengi ri sambaliku bente ngkota ri eo Jumaa mawengi.

²¹ Kutoʼoka tau seʼe, “Bereʼe yowenya komi mopea rantani mowuro njairia, ndiendo-endoka ane sangkani ndipowia ewancetu, maka ane reʼe woʼu powiami ewancetu, komi sangaya-ngaya da kuhuku!” Montepuʼu ungka njairia bareʼemo reʼe kamaʼi ntau seʼe ri eo Umapo.

²² Nepa kupokau waʼa nto Lewi mawianaka upacara pampakagali koro ntau seʼe nepa mojaga ri waʼa baa-baa da mampepeoleka da natubunaka waʼa ntau eo Umapo. Mekakai yaku kutoʼo, “Boo Pue Ala, ndipetiromo yaku ua waʼa anu kuwianaka seʼi, pai ndipokapurumo yaku silulu pai kabangke ntowe ndaya-Mi.”

²³ Ri tempo setu kukita woʼu to Yahudi maria anu mamporongo waʼa mbeʼa ungka ri banca Asido, Amoni pai Moabi.

²⁴ Santila ri waʼa ana ntau seʼe bareʼemo naincani basa nto Yahudi, tau seʼe mampakemo basa Asido bara basa ntau mencua ntaninya.

²⁵ Kupokarau pai kutadeasi waʼa ntau seʼe. Reʼe nau kutabasi, reʼe anu kuwinta ri wuyuanya. Nepa kupokau tau seʼe montando koro ri toʼo i mPue Ala, katau seʼenya pai waʼa ananya bareʼemo da mamporongo tau mencua.

²⁶ Kutoʼoka tau seʼe, “Ara banya salaa anu ewanceʼi anu napowia i Mokole Salomo? Bereʼe mokole ri wawo lino seʼi anu meruu ngkabangkenya pai siʼa, siʼa ndapokapuru i mPue Ala, siʼa ndapapewali mokole nto Isaraeli pura-pura. Paikanya mau ewanceʼe siʼa naleʼo waʼa mbeʼa banca ntaninya mangkanarasi mowia salaa.

²⁷ Mewali maʼai ngkajaʼa kojo powiami seʼi! Makoje komi maewa i Pue Ala ri pamporongomi waʼa mbeʼa ungka ri tau mencua!”

²⁸ I Yoyada siʼa ana i nTadu mPanyomba Bangke Eliyasi, paikanya reʼe sambaʼa ana i Yoyada anu mewali mania i Sambala ungka ri kota Beta-Horoni. Inceʼe painaka i Yoyada kuiri ungka ri kota Yerusale.

²⁹ Mekakai yaku kutoʼo, “Boo Pue Ala pueku, ndipetiromo Pue ewambeʼi powia waʼa ntau seʼe maonusi tetala ntadu mpanyomba pai pojanjimi pai waʼa ntadu mpanyomba pai waʼa nto Lewi!”

³⁰ Ewanceʼemo kupampakagali to Isaraeli ungka ri mpengaya-ngaya engko nto mpolamoa. Kupakanoto dede ntetala tila ntadu mpanyomba pai waʼa nto Lewi, painaka tau seʼe sambaʼa-sambaʼa seʼe simbente mampasilolongani tetalanya.

³¹ Kupasilolongani woʼu da naka ri tempo ndapampake kaju apu ri pawianaka panyomba sangaya-ngaya da toka, da naka nakoto ntau sondo mangkeni panyombanya pandata ri pojamaanya anu uyu mbua. Kapusanya mekakai yaku ri Pue kutoʼo, “Pue Ala pueku ndidoncomo yaku.”