NEHEMIA 11 - Sura Magali Nuntu Ngkatuwu

Bangani ngkota Yerusale 11:1-24

¹ Waʼa ntadulako meari ri Yerusale, pai waʼa ntau sondo inceʼe anu ndaʼundi da mampakanoto sambaʼa sombori ungka ri oyo anu sampuyu ncombori anu sangaya-ngaya da meari ri kota magali Yerusale. Pai anu bareʼe kono ndapilisi inceʼe maya meari ri waʼa ngkota ntaninya.

² Ri oyo ntau seʼe anu kono ndapilisi reʼe anu mabuya rayanya meari ri Yerusale, pai tau anu mampokono setu naunde waʼa ntau sondo.

³ Ri waʼa ngkota ntaninya setu, waʼa ntau sondo, waʼa ntadu mpanyomba, waʼa nto Lewi, waʼa ntopotetala ri Banua i mPue pai muli waʼa ntoporioko i Ncalomo, mampeari tana ntau seʼe ri waʼa ngkota ntau seʼe ngkalionya.

^4-6 Reʼe bara tesangkuja tau ungka ri lemba i Yahuda pai i Benyami anu meari ri Yerusale. Seʼimo waʼa ntoʼo ntau seʼe. Ungka ri lemba i Yahuda: i Ataya ana i Usia makumpu i Sakaria. Bara tesangkuja toʼo ntau duruka anu mampomulika, inceʼemo: i Amaria, i Sepaca pai i Mahalale, i Peresi, i Yahuda. Imba ntau seʼe 468 tau anu maroso pai makoje. I Maaseya ana i Baruki makumpu i ngKolose. Bara tesangkuja toʼo ntau duruka anu mampomulika, inceʼemo: i Hasaya, i Adaya, i Yoyari, i Sakaria, i Sela, i Yehuda.

^7-8 Ungka ri lemba i Benyami: i Salu ana i Mesula makumpu i Yoedi. Bara tesangkuja toʼo ntau duruka anu mampomulika inceʼemo: i Pedaya, i Kolaya, i Maaseya, i Itieli pai Yesaya. I Gabai pai Salai. Tau seʼe kasangkompo mosu ungka ri Salu. Imba ntau seʼe pura-pura 928 tau, anu nawawanaka,

⁹ i Yoeli ana i Sikiri pai sarungkoronya, i Yehuda ana i Hasenua.

^10-11 Waʼa ntadu mpanyomba: i Yedaya ana i Yoyari pai i Yakini, i Seraya ana i Hilikia makumpu i Mesula. Bara tesangkuja toʼo ntau duruka anu mampomulika tau seʼe inceʼemo: i Sadoki, i Merayo, i Ahitu anu mewali Tadu mPanyomba Bangke.

¹² Imbanya pura-pura 822 tau tadu mpanyomba anu motetala ri Banua i mPue. I Adaya ana i Yeroha makumpu i Pelaliya. Bara tesangkuja toʼo ntau duruka anu mampomulika tau seʼe, inceʼemo: i Amisi, i Sakaria, i Pasuri pai Malikia.

¹³ Waʼa ntadulako ri santina-santina seʼe imbanya 242 tau. I Amasai ana i Asareeli makumpu i Ahasai. Tau tuʼa ntau seʼe inceʼemo: Mesilemo pai i Imeri.

¹⁴ Ungka ri tau santina seʼi reʼe 128 tau anu makoje pai makaliki. Tadulako ntau seʼe inceʼemo: i Sabidieli ana i Gedoli.

^15-18 Waʼa nto Lewi: I Semaya ana i Hasubi makumpu i Asirika. Ri oyo waʼa ngkai ntau seʼe inceʼemo i Hasabiya pai i Buni. I Sabetai pai Yasaba tau seʼemo to Lewi anu ndasarumaka majagai katewianaka ntetala ri sambaliku Banua i mPue. I Matanya ana i Mika makumpu i Sabadi, ungka ri muli i Asapi. Siʼa anu mawawanaka waʼa ntopongayu ri pekakai pontarima kase. I Bakubukia, sarungkoro i Matanya. I Abada ana i Samua makumpu i Galali, ungka ri muli i Yedutu. Imba ntau seʼe pura-pura 284 tau.

¹⁹ Waʼa ntopojaga baa-baa: I Akubi, i Talimo pai waʼa yunu ntau seʼe, poromunya 172 tau.

²⁰ Waʼa nto Isaraeli, waʼa ntadu mpanyomba pai waʼa nto Lewi anu bareʼepa tesua riwaʼa anu ndaimba roo, inceʼemo anu da mampeari tananya ngkalionya ri waʼa ngkota ri tana nto Yahuda.

²¹ Waʼa ntopotetala ri Banua i mPue, tau seʼe anu meari ri kota Yerusale anu ndapapotoʼo Opeli. Tau seʼe mawianaka tetalanya nawawanaka i Siha pai Gisipa.

²² Waʼa nto Lewi anu meari ri Yerusale najagai i Usi ana i Bani makumpu i Hasabiya. Ngkai ntau seʼe inceʼemo i Matanya ana i Mika. Siʼa tesua ri muli i Asapi, anu mampasilolongani musiki ri tempo mpanyomba ri Banua i mPue.

²³ Pombesawani santina-santina tau anu da mampasilolongani pomusiki ri Banua i mPue sandeme-sandeme inceʼe ndapakanoto malulu podede ncongka i mokole.

²⁴ I Petahiya ana i Mesesabeli ungka ri tina i Sera lemba i Yehuda, inceʼe anu mewali sarungkoro nto Isaraeli ri langkanae datu Peresia.

Waʼa ntau bangani ngkota ntaninya 11:25-36

^25-30 Mari ri oyo waʼa ntau sondo anu mampeari waʼa ngkota anu mombemosu pai waʼa bonde ntau seʼe. Reʼe bara tesangkuja to Yahuda anu meari ri tana anu paraoyo Beriseba tondo selata pai Lembo Hinomi tondo utara. Tau seʼe meari ri waʼa ngkota seʼi pai waʼa lipu anu mantolilimi: Kiria-Araba, Diboni, Yehabeseeli Yesua, Molada, Beta-Pele Hasara-Suali, Beriseba Sikila, Mekona Ena-Rimoni, Sora, Yarimuti, Sanoa, Adula, Aseka, Lakisi.

³¹ Bara tesangkuja tau ungka ri to Benyami anu meari ri Geba, Mikimasi, Ai, Beteli pai waʼa lipu anu sampotenginya,

³² ri Anato, Nobi, Ananya,

³³ ri Hasora, Rama, Gitaimi,

³⁴ ri Hadida, Seboi, Nebala,

³⁵ ri Lodi, Ono pai ri Lembo Waʼa mPande.

³⁶ Reʼe bara tesangkuja ntibura to Lewi anu meari owi ri tana Yahuda ndapokau maroo-roo sangkani-ngkani pai to Benyami.