NEHEMIA 10 - Sura Magali Nuntu Ngkatuwu

¹ Tau anu kaʼisa madika bate mpale ri pojanji setu inceʼemo: i Petoro Nehemia ana i Hakaliya, nepa metondaraka i Sedekia, roo setu nepa metondaraka waʼa ntau ntaninya madika woʼu bate mpale:

^2-8 Waʼa ntadu mpanyomba i Seraya, i Asaria, i Yeremia, i Pasuri, i Amaria, i Malikia, i Hatusi, i Sebanya, i Maluka, i Harimi, i Meremoti, i Obaja, i Danieli, i Ginetoni, i Baruki, i Mesula, i Abia, i Miyamini, i Maasia, i Biligai, pai i Semaya.

^9-13 Waʼa nto Lewi i Yesua ana i Asanya, i Binui muli ntina i Henadadi, i Kadimieli, i Sebanya, i Hodia, i Kelita, i Pelaya, i Hanani, i Mika, i Rehobo, i Hasabiya, i Sakuri, i Serebiya, i Sebanya, i Hodia, i Bani pai i Beninu.

^14-27 Waʼa ntadulako banca i Parosi, i Pahati-Moabi, i Elami, i Satu, i Bani, i Buni, i Asagadi, i Bebai, i Adonia, i Bigawai, i Adina, i Ateri, i Sikia, i Asuri, i Hodia, i Hasumi, i Besai, i Haripa, i Anato, i Nebai, i Magapia, i Mesula, i Hesira, i Mesesabeli, i Sadoki, i Yadua, i Pelaca, i Hanani, i Anaya, i Hosea, i Hananya, i Hasubi, i Halohesi, i Piliha, i Sobeki, i Rehumi, i Hasabana, i Maaseya, i Ahia, i Hanani, i Anani, i Maluka, i Harimi pai i Baana.

Bangani ncura mpojanji 10:28-39

²⁸ Kami, palili nto Isaraeli, waʼa ntadu mpanyomba, waʼa nto Lewi, waʼa ntopojaga baa-baa Banua i mPue, waʼa ntopomusiki pai waʼa ntopotetala ri Banua i mPue, waʼa rongo pai waʼa ana mami anu maincanimo mampedongeka pau sangkani pai pura-pura tau mepoʼinaya ri Padika i mPue Ala, pai kami anu mompatanimo ungka ri waʼa ntau mencua anu maroo-roo ri oyo mami.

²⁹ Kami pura-pura mompasambaʼa-mbaʼa pai waʼa ntadulako mami montando koro da tuwu malulu Padika i mPue Ala anu roo ndawaika kami mampoliu watuaa i Musa. Mbolimo i Pue Ala da mantadeasi kami ane bareʼe kabangani janji mami seʼi. Kami montando koro da mepoʼinaya ri songkami, padika pai pepokonomi Pue, Pue Ala pue mami.

³⁰ Kami montando koro bareʼe da mamporongo waʼa banca anu mencua anu meari ri tana mami.

³¹ Ane reʼe banca anu mencua da mampobalu gandu bara aga-aga njaa ntano ri kami ri eo Umapo bara ri eo anu magali ntaninya, bareʼe da kaoli. Ri sangkani-sangkani taʼu anu kapapitu, kami bareʼe da momuya pinamuya ri bonde mami pai bareʼe da mampesingaraka inda.

³² Santaʼu-santaʼu kami sambaʼa-sambaʼa seʼe da mawai alima garami salaka anu da ndaʼongkosonika Banua i mPue.

³³ Kami da mampatoka anu da ndapake ri panyomba ri Banua i mPue, ewa, roti mpanyomba, gandu mpanyomba sendeme-sandeme, pinatuwu anu da ndapake ri panyomba anu ndaʼombasi sandeme-sandeme, pai panyomba ntaninya anu magali. Waʼa mpanyomba kabareʼenya ndakitanaka salaa nto Isaraeli, pai mpengaya-ngaya anu ndapake ri Banua i mPue.

³⁴ Kami, tau sondo, waʼa ntadu mpanyomba pai waʼa nto Lewi da mantende dadu santaʼu-santaʼu da mampakanoto tina inceme anu da mampatoka kaju apu anu da ndapake ri pawianaka waʼa mpanyomba anu da ndapanyombaka ri Pue Ala pue mami silulu pai bangani mPadika.

³⁵ Santaʼu-santaʼu da kakeni ri Banua i mPue uyu mbua gandu mami, waʼa uyu mbua ri taga mpinamuya anu marasa ri tuwanya.

³⁶ Da kakeni ana mami tuama anu uyue ri waʼa ntadu mpanyomba ri Banua i mPue da ndapampepombaika ri Pue Ala, silulu pai bangani mPadika. Da kapepombaika woʼu ana japi, ana bimba bara ana mbula anu uyu pampoana indonya.

³⁷ Kami da mangkeni ri waʼa tadu mpanyomba ri Banua i mPue adona ungka gandu anu uyu mpota santaʼu-santaʼu, ewanceʼe seʼe waʼa mpanyomba ntaninya ewa anggoro, lana saitu pai mpengaya-ngaya wua mpinamuya mami. Panyomba anu sampotila sampuyu ungka pandata ri pojamaa mami da kakeni ri waʼa nto Lewi anu mampasambaka waʼa mpanyomba sampotila sampuyu ri waʼa ngkota ntopojamaa.

³⁸ Paikanya sambaʼa tadu mpanyomba muli i Haruni anu da mampoyunuki to Lewi setu ane njoʼu tau seʼe mampasambaka panyomba setu. Pai sampotila sampuyu ungka ri pura-pura panyomba setu, sangaya-ngaya da nakeni nto Lewi ri raya mponiu kanjau waʼa mpangkoni ri Banua i mPue.

³⁹ Waʼa ntau sondo pai to Lewi sangaya-ngaya da mangkeni pombai anu bareʼe bali-bali ewa anggoro pai lana saitu ri waʼa lincu padika pangkoni ri kareʼe mpadika waʼa mparewa anu ndapake ri Banua i mPue. Njairia woʼu kareʼe mpeari waʼa ntadu mpanyomba anu ntongo mawianaka tetalanya, waʼa ntopojaga baa-baa Banua i mPue pai waʼa ntopongayu. Bareʼe da bali-bali kami da mamporewu pai da majagai Banua i mPue mami.