Mikha 7 - Sura Magali Nuntu Ngkatuwu

Kajaʼa mpoʼengko Isaraeli 7:1-7

¹ Marugi yaku! Jamo ewa tau anu yoga njoʼu mampupu wua ngkaju seʼi liumo turo mpowuanya. Bareʼemo reʼe wua ngkaju ri puʼunya. Wua anggoro pai wua ara anu madago puramo ndapupu.

² Tau anu mayoa bareʼemo reʼe ri raya lipu, tau anu todo ri Pue Ala bareʼemo da ndarata. Sambaʼa-sambaʼa tau mampetaʼa tempo anu madago da napepate. Sambaʼa-sambaʼa seʼe mantaʼa tolia ri kasiyununya.

³ Pura-pura tau loʼemo mowia jaʼa. Tau ndalanti pai topobotusi mamperapi doi lekoaje, pai tau anu ndatubunaka mampedandaka pepokononya, ewanceʼemo tau seʼe sangkani-ngkani mamposintuwui.

⁴ Tau anu maʼai ngkadago pai maʼai ngkayoa ri oyo ntau seʼe ntano ewa yopo ndui anu bereʼe yowenya. Ratamo temponya i Pue Ala mangahuku waʼa ntau-A silulu pai anu roomo ndapatiendoka tau seʼe mampoliu waʼa nabia. Seʼi-seʼi mebetemo kaguaga ri oyo ntau seʼe.

⁵ Neʼemo nusarumaka tau samposori banuamu, neʼe nupomata-mata yunumu. Da nunawa-nawa waʼa mpaumu, mau podo rongomu ngkaliomu anu mangadonge.

⁶ Maka ri tempo anu ewanceʼi potaʼanya bangani ncombori da moʼiwali: ana tuama da mampetikodi papanya, ana anu weʼa da maewa inenya, pai mania anu weʼa da mopaiso pai ine manianya.

⁷ Paikanya kita montambusaka ri Pue; ri peaya ndayata kita mampetaʼa Pue Ala pueta. Sira da mampedongeka pekakaita pai da mancorepaka kita.

I Pue mancorepaka 7:8-13

⁸ Bereʼe perontada waʼa iwalita da mawongko raya ua kagerota. Maka mau kita manawu kita da membangu muni. Seʼi-seʼi kita reʼe ri raya mbani, paikanya i Pue da mampakareme kita.

⁹ Kita masalaa ri Pue, inceʼe painaka kita seʼi-seʼi sangaya-ngayada mangaepe karau ndaya-A. Paikanya bareʼemo masae Sira da mampelae kita pai mawai yoa ri kita. Sira da mangangkeni kita ri reme; kita da mangaepe ngkaliota ka-Siranya mancorepaka kita.

¹⁰ Iʼowi iwali mampetikodi kita maka natoʼo, “Mbeʼimo Pue, Pue Ala puemi setu?” Paikanya seʼi-seʼi da nakita ntau seʼe nunjaa anu ndapowiaka i mPue kita, pai tau seʼe da maea. Kita da mangangkita waʼa iwalita ndanangi pai ndaija-ijaki ewa loge ri jaya.

¹¹ Ee Yerusale! Ratamo temponya komi da mawali wangu muni waʼa ntembo kotamu. Ri tempo setu wilayamu da ndapakabini.

¹² Waʼa ntaumu da mewalili ri siko ungka ri mbeʼi-mbeʼi – ungka ri Asuri tondo pebetea, ungka ri Masiri tondo selata, ungka ri daera Koro Eparata, ungka ri sambote ntasi pai ungka ri waʼa buyu anu lawa.

¹³ Paikanya lino da mewali londa-londa ua kajaʼa ntau anu mampeari.

Pekakai merapi puru ndaya i m Pue tila Isaraeli 7:14-20

¹⁴ Boo Pue, ndikambimo waʼa ntaumi, waʼa ntau anu ndipilisi. Tau seʼe maroo-roo tepatani ri une mbana, ri une ntana anu maboko. Mbolimo tau seʼe marata pangkoni ri pada ewo Basani pai Bilea ewa ipiamo.

¹⁵ Nditujumo tanda ngkuasa ri kami, boo Pue, ewa anu ndipowia owi sindara ndipangkeni mpesuwu kami ungka ri tana Masiri.

¹⁶ Waʼa banca da mangangkita inceʼe pai da maea matanya maka da naepe ndayamo ntau seʼe, waʼa roso ntau seʼe bereʼe yowenya. Da paya akala ntau seʼe, painaka bareʼe nakoto mompau bara mampedongeka.

¹⁷ Tau da menjoyo ri tana ewa ule. Ri kaeka pai ri kakandende-ndende tau seʼe da mesuwu ungka bentenya, nepa rata ri Komi, boo Pue Ala pue mami.

¹⁸ Bereʼe Pue Ala anu ewa Komi, boo Pue, anu bareʼe mangkitanaka salaa waʼa ntau anu ndipilisi anu totaʼa. Banya rantani masae-sae karau ndayami; paikanya ndipokono mantuju towemi anu bereʼe kapusanya setu.

¹⁹ Komi da mapuru muni rayami ri kami pai bareʼemo mangkitanaka kami. Waʼa ncalaa mami da ndija-ijaki pai da nditajika ri oru ntasi.

²⁰ Ri waʼa ntau-Mi, muli i Burahima pai Yako, Komi da mantuju katodomi pai katowemi anu bereʼe kapusanya setu ewa anu Ndijanji ri tau piamo mami ipiamo.