Mikha 6 - Sura Magali Nuntu Ngkatuwu

Pogilu i m Pue mangkono to Isaraeli 6:1-5

¹ Ndipedongeka nunjaa anu da ndapogiluka i mPue mangkono to Isaraeli. Ndipeokomo, boo Pue, pai ndiparatamo pogilumi! Mbolimo buyu pai pongku ntana mangadonge nunjaa anu da nditoʼo.

² Ee waʼa buyu, ee waʼa mpotunda lino, padongeka pogilu i mPue! Sira reʼe kara-karaa pai Isaraeli waʼa ntaua pai da mampepalisi powia ntau seʼe.

³ Ndatoʼo i mPue, “Ee waʼa ntauku, nunjaa anu roo kupowia ri komi? Ri jaya anu ewambeʼi Yaku mampakasusa komi? Ndisono Yaku!

⁴ Komi roo kukeni mpesuwu ungka ri tana Masiri, pai Kulapa ungka ri pampowatua; Yaku mampokaumo i Musa, i Haruni pai Miria mawawanaka komi.

⁵ Ee waʼa ntau-Ku, da ndiendomo nunjaa anu narencana i Bala mokole nto Moabi kono komi, pai nunjaa anu napesonoka i Bila ana i Beori ri siʼa. Ndiendomo nunjaa anu mewali ri pelinja ri oyo mpokema ri Sitimi pai Giligali. Ane kono ndiendo pura-pura setu, da ndirata ndayamo nunjaa anu roomo kupowia mancorepaka komi.”

Panyomba anu ndatangara i m Pue 6:6-16

⁶ Nunjaa anu kamonco-monconya da tapanyombaka ri Pue, Pue Ala ri suruga, ane kita rata manyomba ri Sira? Bara sangaya-ngaya kita da mangkeni japi anu mangurapa anu bereʼe posarinya da tapanyombaka mewali panyomba anu ndaʼombasi ri Sira?

⁷ Ara da mawongko raya i mPue ane kita mangkenika Sira moncowu-ncowu bimba bara gana-gana lana saitu? Bara sangaya-ngaya kita da mampanyombaka ri Sira anata anu uyue da mewali poncompo waʼa ncalaata?

⁸ Bareʼe! I Pue mantujukamo kita nunjaa anu madago. Anu ndapedandaka ungka ri kita inceʼemo da naka mayoa powiata, bareʼe bali-bali tuwu ri pombepomawo, pai ri kalauka ndaya kita da tuwu ri kasambaʼa-mbaʼa pai Pue Ala pueta.

⁹ Maʼai ngkaloʼe kita ane mampokaeka i Pue. Sira meboo ri waʼa ntau ri kota, ndatoʼo, “Pedongeka ee komi anu mompasambaka ri kota!

¹⁰ Ri banua waʼa ntau anu majaʼa reʼe ndarata aga-aga anu ndarata ungka ri petengosi. Tau seʼe mampake pobanga anu bareʼe monco, inceʼe sangaya anu Kupobanciika. Tau anu mowia ewanceʼe da Kuhuku.

¹¹ Wenu painaka bareʼe da kupepalisi powia ntau anu mampake dasi bareʼe monco?

¹² Waʼa ntau koreʼe ri kotamu mamparini tau kaasi-asi pai komi pura-pura kambamba-mbamba.

¹³ Seʼi-seʼi Yaku montepuʼumo mawombo pai malesaki komi ua waʼa ncalaami.

¹⁴ Komi da mangkoni paikanya bareʼe da mabosu – ja da maoro mpaliu. Komi da manganteo waʼa aga-aga paikanya bareʼe ndikoto mampakoroka ri kaʼuononya. Pai nunjaa ntano anu ndipakoroka da Kulesaki ri raya mpoʼiwali.

¹⁵ Komi mangancawu inii paikanya bareʼe ndipota wuanya. Komi da mampowia lana ungka ri wua saitu, paikanya bareʼe da ndileʼo mampake lananya. Komi da mangampaa anggoro paikanya bareʼe da ndiinu.

¹⁶ Pura-pura setu da tepewali ua komi malulu powia anu majaʼa i Mokole Omiri pai ananya inceʼemo i Mokole Aha. Komi malulu waʼa mpowia ntau seʼe. Inceʼe painaka Yaku da mangalesaki komi, pai komi da napasinggiri pai napetikodi waʼa banca.”