Mikha 5 - Sura Magali Nuntu Ngkatuwu

I Pue Ala majanji sambaʼa tau anu makuasa ungka ri Beteleme 5:1-5a

¹ Ndatoʼo i mPue, “Ee Beteleme Eparata, siko sambaʼa ungka ri oyo ngkota anu maʼai ngkakodinya ri Yahuda! Paikanya ungka ri siko da kupampapekakore sambaʼa tau anu makuasa tila Isaraeli anu potutua ngkatuwunya ungka ipiamo.”

² Mewali, i Pue da mampapaliuka waʼa ntaua da nakuasai waʼa iwali ntau seʼe rantani rata ri tempo weʼa anu ndapakanoto da mewali ine ntau anu makuasa setu mampoana siʼa. Roo setu waʼa ntau anu kasambaʼa-mbaʼa bancanya anu njau ri kareʼe mpantawani da ndapasambaʼa-mbaʼa muni pai banca ntau seʼe.

³ Ane ratamo tau anu makuasa setu, Siʼa da mamparenta waʼa ntaunya ua roso pai kuasa anu ungka ri Pue Ala puenya. Waʼa ntaunya da tuwu ri kaʼuono, maka pura-pura tau ungka ri sambawo lino da mangaʼaku kabangke-A,

^4-5a pai siʼa da mawai kalindondaya.

Katelapa pai popahuku 5:5b-14

^5b Ane nasamburaragi ncurodado nto Asuri tanata pai napesuaki benteta, kita da maʼiowaka waʼa ntadulakota anu maʼai ngkarosonya mampoʼiwalika tau seʼe. Waʼa ntadulakota setu da manganangi to Asuri pai parewa mpoʼiwali, pai da mancorepaka kita ungka ri pale ntau seʼe.

⁶ To Isaraeli anu totaʼapa da mewali ewa rini anu mencii ungka ri Pue tila maria banca, pai ewa katudu uja ri pinamuya. Tau seʼe da meonda ri Pue Ala pai banyamo da meonda ri tolino.

⁷ To Isaraeli anu maroo-roo ri oyo waʼa banca da ewa singa ri tongo waʼa mpinatuwu yopo bara ewa ri tongo dompu bimba ri pada ewo. Singa setu mesua ri tongo-tongo dompu bimba setu, naija-ijaki pai nasempati; bereʼe anu mangkoto malapa waʼa bimba setu.

⁸ Isaraeli da manganangi waʼa iwalinya pai da mangagero tau seʼe pura-pura.

⁹ Ndatoʼo i mPue, “Ri tempo setu yaku da mampapaya pura-pura nyaramu, pai mangagero waʼa ngkareta mpoʼiwalimu.

¹⁰ Waʼa ngkota anu ndabente ri tanamu da Kulesaki, pai pura-pura bente mpoʼiwalimu da Kuruasi.

¹¹ Waʼa ajimamu Kupapaya pai pura-pura to pontonaamu da Kupapalai.

¹² Yaku da mangalesaki waʼa nturukimu pai waʼa ntugu anu nupanyomba, komi bareʼemo da mampanyomba anu ndapowia mpalemi ngkaliomi.

¹³ Waʼa ntugu lamoa weʼa Asera anu reʼe ri tanamu da Kuruasi, pai waʼa ngkotami anu ndabente da Kulesaki.

¹⁴ Ua pesongke ngkarau ndaya-Ku da Kupesawai jaʼa pura-pura banca anu bareʼe mepoʼinaya ri Yaku.”