Mikha 4 - Sura Magali Nuntu Ngkatuwu

I Pue mamparenta lino ri Kaʼuononya 4:1-5

¹ Ri reme-reme anu nepa da rata, pongku ntana kareʼe mpotunda Banua i mPue, da toa mekakore pai da meuntu-untu ndateka meruu ri waʼa buyu pai waʼa mpongkuntana. Mpengaya-ngaya banca da mangguyu-ngguyu njoʼu njairia,

² Pura-pura tau da mangantoʼo “Maʼimo kita mandake ri pongkuntana i mPue Ndeku ri Banua i mPue Ala, pue nto Isaraeli! Sira mampaguruka kita nunjaa anu da tawianaka. Kita da mangalulu jayaa maka pompaguru i mPue ungka ri Yerusale kamaʼinya; ungka ri Sioni Sira mompau ri waʼa ntau-A.”

³ I Pue mangabotusi kara-kara ri oyo waʼa banca, ri oyo waʼa negara anu maroso, anu lawa bara mosu. Tau seʼe da mangampalu waʼa mpenainya mewali pajeko pai waʼa ntawala ntau seʼe mewali tibo mpongkou wuyua. Waʼa banca bareʼemo da mombeungku, bareʼemo da mompatikali da moʼiwali.

⁴ Sambaʼa-sambaʼa tau da tuwu ri kaʼuono pai kaliondandaya, ri tongo bonde anggoro pai bonde aranya; bereʼe anu da maekati tau seʼe, incetu janji mPue Anu Makuasa.

⁵ Pura-pura banca ri wawo lino manyomba pai mepoʼinaya ri lamoanya ngkalionya. Paikanya kita da mepoʼinaya ri Pue Ala pueta pai manyomba ri Sira rantani masae-sae.

Isaraeli da mewalili ungka ri pantawani 4:6-14

⁶ Ndatoʼo i mPue, “Da rata temponya Yaku da mampasambaka waʼa ntau anu Kuhuku, inceʼemo waʼa ntau seʼe anu maepe pari ri kareʼe mpantawani.

⁷ Tau seʼe ndalenteimo pai tuwu lawa ungka ri lipu mpebete ntanoananya. Paikanya ungka ri waʼa ntau yabinya setu, Yaku da mantepuʼu sambaʼa muli anu dawoʼu. Tau seʼe da mewali banca anu bangke pai maroso. Yaku da mamparenta tau seʼe ungka ri Pongkuntana Sioni rantani masae-sae.”

⁸ Pai siko Yerusale, kareʼe i mPue Ala majagai waʼa ntau-A, ewa topongkambi majagai dompu bimbanya, siko da mewalili mewali ibu kota ngkamokole ewa iʼowi.

⁹ Wenu painaka siko marimbo potumangimu? Wenu painaka siko mantodosaka pari ewa weʼa anu da moana? Bara ua ri kabareʼenya nupotumpu mokole, pai waʼa ntau anu mantotoraka puramo mate?

¹⁰ Ee waʼa ntau bangani ngkota Yerusale, pomapakarosomo pai peʼotosakamo ewa weʼa anu ntongo mpoana! Maka seʼi-seʼi komi sangaya-ngaya da njoʼu ri Babeli, paikanya njairia komi da ndalapa i mPue ungka ri waʼa iwalimi.

¹¹ Maria banca da mompasambaka da maungku siko, ee Yerusale! Natoʼo ntau seʼe, “Yerusale sangaya-ngaya da ndagero! Da kakita kota setu mewali awu!”

¹² Paikanya waʼa banca setu bareʼe naincani nunjaa anu ntongo ndarencana i mPue. Bareʼe narata ndaya ntau seʼe, katauseʼenya ndapasambakamo da ndahuku, da ewa gandu ndapasambaka da ndapesawuka.

¹³ Ndatoʼo i mPue, “Ee waʼa bangani Yerusale, palaimo njoʼu nulandasi waʼa iwalimu! Yaku da mampakaroso komi, ewa japi anu mampotondu labu pai mampokayupa tambaga. Komi da mangalesaki sondo banca pai kakoreʼe anu napamuru ntau seʼe da ndipanyombaka ri Yaku, Pue tumpu ntana pai ue.”

¹⁴ Ee komi waʼa bangani Yerusale, ndiperapi purumo da naka i Pue mampelae komi! Kita ntongo nalimbu iwali! Iwali ntongo maungku tadulako Isaraeli!