Mikha 3 - Sura Magali Nuntu Ngkatuwu

I Mika maewa waʼa ntadulako nto Isaraeli 3:1-12

¹ Pedongeka ee waʼa ntau anu makuasa ri Isaraeli! Kamonconya sangaya-ngaya da ndiincani nunjaa anu mayoa,

² paikanya komi ja mampobanciika anu madago pai mampokawongko anu majaʼa. Bancaku ndilenu pelanya tuwu-tuwu, pai ndisempati sanganya ungka ri waʼa wukunya.

³ Komi mangkoni bancaku, pelanya ndisempa-sempa pai wukunya ndilesaki. Komi mangabatu-batu tau seʼe ewa tau mabatu sanga mpinatuwu ndapari ngkura.

⁴ Maʼipa temponya da rata komi meboo merapi tulungi ri Pue, paikanya Sira bareʼe ndapokono mangasono. Sira bareʼe da mampedongeka waʼa mpekakaimi, maka komi mawianakamo anu majaʼa.

⁵ Banca seʼi nambambasi waʼa nabi anu mantonaa anu madago ri tau anu mawaika siʼa doi, paikanya napoʼiwalika pai napesaru-saru tau anu bareʼe mombai. Ri waʼa nabi anu ewanceʼe, ndatoʼo i mPue,

⁶ “Ee nabi mosumo da kapusa tempomu; rememu da soyomo. Komi bareʼemo da mangarata pepatongawa anu mantoʼo waʼa rencana-Ku. Komi bareʼemo da ndileʼo montonaa bara nunjaa-njaa.”

⁷ Waʼa ntau anu mantonaa kono eo anu da rata da marata ea mata maka pontonaanya bareʼe monco. Da maea mata ntau seʼe maka i Pue Ala bareʼe mancono pekakai ntau seʼe.

⁸ Paikanya anu mangkono koroku seʼi, i Pue mawaimo inosa-A pai kuasaA. Ri yaku ndawai parata ndaya kono kayoa, pai kakoje ndaya woʼu da mampatongawa ri to Isaraeli waʼa ncalaa anu roo nawianaka.

⁹ Ndipedongekamo waʼa mpauku seʼi, ee komi waʼa ntau anu makuasa ri to Isaraeli anu mampobanciika kayoa pai mantoro baliko kamonco.

¹⁰ Komi mawangunaka Yerusale, kota mPue Ala, merontada ri pepepate pai kabareʼenya mayoa.

¹¹ Waʼa ntau makuasa ri raya ngkota moparenta ua da naparata doi lekoaje, waʼa ntadu mpanyomba mampepaguruka padika i mPue da naparata gaji, pai waʼa nabi merapi patada ungka ri Pue Ala podo da naparata doi – painaka tau seʼe pura-pura masarumaka i Pue njau mancambiranaka tau seʼe. Natoʼo ntau seʼe: “I Pue reʼe ri oyota; kita bareʼe da napere ngkapari.”

¹² Ua kajaʼamu setu, Sioni da nasuʼa mpajeko ewa jamaa, Yerusale da mewali pobuyu-buyu awu, pai pongku ntana Banua i mPue da mewali yopo mapepu.