Mikha 2 - Sura Magali Nuntu Ngkatuwu

Katedikanaka waʼa ntau anu mamparini tau kaasi-asi 2:1-11

¹ Marugimo waʼa ntau anu manawa-nawa anu majaʼa sindara mpoturunya yore mawengi, pai nawianaka ri bangke reme, maka reʼe roso ntau seʼe mangawianaka.

² Ane napodaraya salimpu jamaa narampa ntau seʼe. Ane napodaraya sambaʼa banua, napesuaki ntau seʼe. Madago aga-aga ewanceʼe seʼe sombori bereʼe anu uono.

³ Inceʼe painaka ndatoʼo i mPue, “Yaku marencana karugi tilami, painaka bareʼe da ndileʼo lapa. Sindara ngkapepa setu komi bareʼemo da ndikoto melinja ri pekiunde.

⁴ Katedikanakami da napoparumbasamo ntau, pai da napowia ntau seʼe ngayu pongkabalusi ewaseʼi, ‘I Pue masintakimo tana mami seʼi nepa ndawaika tau anu mantawani kami. Kami manoto maregemo mpaliu.’ ”

⁵ Inceʼe painaka ane ratamo temponya tana setu nmdapapewalili muni ri waʼa ntau i mPue, bereʼe mau sambaʼa tau ungka ri oyomi anu da mangarata tilanya.

⁶ Waʼa ntau mampotuntuka yaku natoʼo, “Neʼe montuntu ri kami, neʼe boi nupotuntuka pura-pura setu, kami bareʼe da marata ea.

⁷ Neʼe nusarumaka Isaraeli ndatusakimo i mPue. I Pue bareʼe da mangawianaka waʼa anu ewanceʼe. Sira bareʼe bali kayombu ndayaa. Ara banya Sira mompau maʼalusu ri waʼa ntau anu mawianaka anu monco?”

⁸ Mesono i Pue ndatoʼo, “Komi anu mangaungku waʼa ntauku ewa iwali. Tau anu mewalili ungka ri pombetoto mampomata-mata kaʼuono ri raya banuanya, ntanoka komi mantundani da ndipangarampa banuanya.

⁹ Waʼa mbeʼa ri oyo waʼa ntauku ndiiri ungka ri banuanya anu napomawo, komi mangantima mpaliu pombai mpuru anu kuwaika waʼa ana ntau seʼe.

¹⁰ Ndipeokomo, ndipalai; ireʼi bareʼepa uono. Waʼa ncalaami mampareʼemo kapari anu maʼai ri kareʼe seʼi.

¹¹ Komi mampokono nabi anu napokono mombamba pai metengosi pai montonaa kakononya komi da mampotumpu anggoro pai panginu anu mampaka yangu ri kagana-gananya.”

Janji kono katesorepaka 3:12-13

¹² Ndatoʼo woʼu i mPue, “Ee waʼa nto Isaraeli anu njaupa yau yabinya! Komi sangaya-ngaya da Kupasambaka pai da Kupasambaʼa-mbaʼa da ewa bimba anu mewalili ri monconya. Da ewa pada ewo anu buke-buke pai bimba, da ewanceʼemo woʼu tanamu da buke pai waʼa ntau anu sondo.

¹³ Yaku da mangawete jaya pai da mangangkeni mpesuwu ungka ri kareʼe pantawani. Komi da mangaruasi waʼa baa-baa nepa malai mpaliu. Yaku, Pue ngkalio-Ku, inceʼemo Datumi pai Yaku anu da mawawanaka komi mesuwu.”