Lukas 7 - Sura Magali Nuntu Ngkatuwu

I Yesu mampakaʼosa anamayunu i ntadulako ncurodado nto Roma 7:1-10

¹ Butu roomo ndatotoraka pura-pura setu ri waʼa ntau sondo, malaimo i Yesu njoʼu ri Kapenau.

² Njairia njau tadulako ncurodado nto Roma anu mampotumpu anamayunu anu maʼai napampotowe. Anamayunu setu majuʼa maʼai da matemo.

³ Ri padonge ntadulako ncurodado setu kono i Yesu, napokaumo bara tesangkuja tau tadulako nto Yahudi njoʼu ri Sira da mamperapi naka maʼi Sira mampakaʼosa anamayununya.

⁴ Karata ntau seʼe ri Yesu, merapi puru tau seʼe da naka Sira mantulungi tadulako ncurodado setu. Natoʼo ntau seʼe ri Yesu, “Tadulako ncurodado seʼi sintinaja da Nditulungi,

⁵ maka siʼa mampokapuru bancata, siʼa mangawangukamo kami banua mpekakai.”

⁶ Njoʼumo kojo i Yesu sangkani-ngkani pai tau seʼe. Butu mosumo i Yesu ri banuanya, napokau ntadulako ncurodado waʼa yununya madadu Sira da mangantoʼo, “Neʼemo ndipari-pari da maʼi ri banuaku. Maka yaku bareʼe sintinaja da mantarima Komi ri banuaku.

⁷ Inceʼe puʼunya painaka yaku ngkalioku bareʼe kutaha da madadu komi. Mewali mauja nditoʼo songka da naka osa anamayunuku.

⁸ Maka yaku woʼu medonge ri songka ntau anu kuporiwawo pai reʼe waʼa ncurodado anu kuporiara sangaya-ngaya da medonge ri songkaku. Ane kupokau sambaʼa surodado, ‘Palai!’ da malai siʼa; pai ane kutoʼoka anu ntaninya, ‘Maʼi ireʼi!’ da maʼi siʼa. Pai ane kusongka anamayunu, ‘Powia inceʼi!’ da napowia.”

⁹ Jingki raya i Yesu madonge pau setu. Meeli Sira ndatoʼoka waʼa ntau anu sondo melulu ri Sira, “Kupojingki kojo tau seʼi. Ri oyo nto Isaraeli bareʼepa reʼe Kupampomberataka peaya ndaya anu ewanceʼi kabangkenya!”

¹⁰ Tempo mpewalili waʼa ntau anu napokau setu ri banua ntadulako ncurodado setu, anamayunu setu osamo.

I Yesu mampatuwu muni ngalitau anu mate ri lipu Nai 7:11-17

¹¹ Bareʼe masae ungka lairia malaimo i Yesu njoʼu ri lipu Nai. Njoʼu woʼu anaguru-A pai waʼa ntau sondo melinja sangkani-ngkani pai Sira.

¹² Mosumo i Yesu ri baa-baa ngkota setu, simpadopamo pai waʼa ntau anu mampoaju tau mate mesuwu ungka ri kota. Anu mate setu sambaʼa ngalitau, siʼa ana sambaʼa-mbaʼa, inenya bembamo. Maria tau anu mangkeni tau mate setu, simpoyunu pai inenya.

¹³ Pangkita i Yesu weʼa bemba setu, merata puru ndaya-A, ndaseko i Yesu ndatoʼo, “Neʼe motumangi ee inenya!”

¹⁴ Ndatimosuki i Yesu kati ntau mate setu, ndajama, meʼontomo waʼa ntau anu mopakati. Nepa mompau i Yesu ndatoʼo, “Ee ngalitau, Kutoʼoka siko pembangu!”

¹⁵ Membangu tau mate setu motunda, natepuʼumo mompau-mpau. Nepa ndapepombaika i Yesu ngalitau setu ri inenya.

¹⁶ Meratamo eka ndaya ntau setu pura-pura naunde ntau seʼe i Pue Ala, natoʼo, “Jelamo ri oyota sambaʼa nabi anu bangke! I Pue Ala rata mancorepaka tau-A!”

¹⁷ Tolelemo bambari kono i Yesu ri sambawo ntana Yudea pai ri waʼa lipu-lipu anu sampotenginya.

Pomokau i Yohane Topopariu 7:18-35

¹⁸ Napetumbumo waʼa anaguru i Yohane ri siʼa pura-pura anu mewali setu. Napeboo i Yohane anagurunya radua,

¹⁹ napokau anagurunya radua setu njoʼu ri Yesu, da mampeoasi ri Sira, “Bara Komimo anu da rata setu malulu janji i mPue Ala, bara ntongo da kapopeapa tau ntaninya?”

²⁰ Njoʼumo kojo anaguru radua setu ri Yesu natoʼo, “I Yohane Topopariu mampokau kami da mampeoasi ri Komi, bara Komimo anu da jela seʼe malulu janji i mPue Ala, bara ntongo da kapopeapa anu ntaninya?”

²¹ Sindara setu i Yesu ntongo mampakaʼosa tau majuʼa sondo mpodago, pai mairi waʼa inosa majaʼa, pai maria tau buta anu ndapakaʼosa.

²² Mesono i Yesu ndatoʼo, “Ndipewalilimo, ndipetumbuka i Yohane ungkanya anu ndikita pai anu ndidonge, tau buta yosamo matanya, tau pungku melinjamo, tau ketangga osamo, tau bongo nadongemo raoa, tau mate ndapatuwu muni pai tau kaasi-asi ndapetumbuka Nuntu ngKatuwu ungka ri Pue Ala.

²³ Morasimo tau anu bareʼe bata-bata rayanya ri Yaku.”

²⁴ Butu tepalaimo waʼa mpomokau i Yohane setu, ndatepuʼumo i Yesu mantotorakaka tau sondo kaʼisemanya i Yohane, ndatoʼo, “Komi njoʼu ri pada bone mampeole nunjaa? Bara podo morompa anu nawui-wui ngoyu?

²⁵ Komi njoʼu mampeole nunjaa? Sambaʼa tau anu morengko madolidi? Waʼa ntau anu morengko ewanceʼe pai anu gana-gana katuwunya maroo-roo ri langkanae!

²⁶ Mewali, nunjaa anu mesuwu ndipeole? Bara da mampeole sambaʼa nabi? Monco, siʼa meruu ungka ri sambaʼa nabi.

²⁷ Maka i Yohane seʼimo anu ndatangara ndaya ri raya Ncura Magali seʼi, ‘Inceʼimo pomokau-Ku,’ ndatoʼo i mPue Ala, ‘Da Kupokau siʼa mamporiuka siko, da naka napatokaka siko jaya-Mu!’ ”

²⁸ Ndatoʼo woʼu i Yesu, “Da ndipaincani, ri lino seʼi bareʼepa reʼe tau anu meruu kabangkenya ungka ri Yohane Topopariu. Paikanya tau anu maʼai ngkakodinya ri oyo ntau i mPue Ala, meruu kabangkenya ungka ri Yohane Topopariu.”

²⁹ Pura-pura tau-tesua pai waʼa ntoponduru asele anu njau madonge pompau i Yesu ewanceʼe, waʼa ntau seʼemo anu mawianaka pepokono mPue Ala pai roomo nariu i Yohane.

³⁰ Paikanya waʼa nto Parisi pai waʼa guru agama bareʼe malulu songka i mPue Ala anu da tila ntau seʼe. Tau seʼe bareʼe napokono nariu i Yohane.

³¹ Nepa mompau woʼu i Yesu ndatoʼo, “Daʼewa nunjaa ndapaporapaka tau tuwu salapi seʼi? Daʼewa nunjaa tau seʼe?

³² Tau seʼe ewa waʼa ananggodi anu motunda-tunda ri pasari; satobu meboo ri anu satobunya, ‘Kami seʼi mangayuka komi ngayu ngkawongko ndaya, paikanya bareʼe ndipokono motaro! Kapongayuka ngayu mpotau mate pai bareʼe ndipokono motumangi!’

³³ I Yohane Topopariu rata – siʼa mopuasa pai bareʼe nainu anggoro – pai nditoʼo, ‘Siʼa napesuaki i majaʼa!’

³⁴ Rata i Ana Manusia – siʼa mangkoni pai manginu, nepa nditoʼo, ‘Peole, tau setu! Manyanya, topoyangu-yangu, yunu ntoponduru asele pai waʼa ntau masalaa.’

³⁵ Paikanya mau ewanceʼe; kaloʼe mPue Ala tongawa ri waʼa ntau anu mantarima Sira.”

I Yesu ri banua i Ncimo 7:36-50

³⁶ Reʼe sambaʼa to Parisi i Simo toʼonya mampeboo i Yesu da mangkoni ri banuanya. Jelamo kojo i Yesu ri banuanya, motundamo da mangkoni Sira.

³⁷ Ri kota setu reʼe sambaʼa weʼa anu bareʼe tumoro katuwunya. Padongenya i Yesu njau mangkoni ri banua nto Parisi setu, njoʼumo siʼa nakeni sambaʼa butolo watu lana wongi.

³⁸ Siʼa mekakore ri taliku mosu ri powiti i Yesu, seʼi motumangi siʼa ue matanya nayoʼosika witi i Yesu nepa napalisika wuyuanya, naeki witi i Yesu nepa nabubuka lana wongi.

³⁹ Pangkita nto Parisi anu mampeboo i Yesu anu mewali setu, natoʼo ri rayanya, “Ane monco tau seʼi sambaʼa nabi, sangaya-ngaya da naincani isema weʼa maisu koronya, weʼa sinjau tau anu tuwu ri raya ngkasalaa.”

⁴⁰ Mompau i Yesu ri Simo ndatoʼo, “Simo reʼe sangaya anu da kutoʼoka siko!” Mesono i Simo natoʼo, “Nditoʼomo Guru!”

⁴¹ Mesono i Yesu ndatoʼo, “Reʼe radua tau anu moinda ri topompapoana doi, anu sambaʼa moinda lima atu doi salaka, anu sambaʼa woʼu moinda lima mpuyu doi salaka.

⁴² Tau radua setu bareʼemo nakoto da mabayari indanya, painaka napalisimo ntopompapoana doi indanya. Mewali isema ri oyo ntau radua setu anu maʼai da pampomawonya tau anu mampapoana doi setu?”

⁴³ Mesono i Simo natoʼo, “Malulu parata ndayaku manoto tau anu maʼai ngkasondo indanya anu ndapalisi.” Mesono i Yesu, “Monco parata ndayamu.”

⁴⁴ Nepa meole i Yesu ri weʼa anu bareʼe tumoro katuwunya setu, ndatoʼoka i Simo, “Nukitamo weʼa seʼi? Yaku nupeboo maʼi ri banuamu paikanya bereʼe ue nupatoka da Kumosoʼika witi-Ku; paikanya weʼa seʼi, ue matanya nawusoʼika witi-Ku nepa napalisika wuyuanya.

⁴⁵ Yaku rata bareʼe nueki, paikanya weʼa seʼi montepuʼu ungka ri karata-Ku bereʼe peʼontonya maeki witi-Ku.

⁴⁶ Siko bareʼe nububuka lana wongi woʼo-Ku, paikanya weʼa seʼi nabubuka lana wongi witi-Ku.

⁴⁷ Monco Kutoʼoka siko weʼa seʼi bareʼemo ndakitanaka salaanya mau bangke pai maria kojo, maka natujumo kabangke kojo ntowe ndayanya! Tau anu naepe sakodija salaanya, sakodija woʼu towe ndayanya.”

⁴⁸ Mompau i Yesu ri weʼa setu ndatoʼo, “Waʼa ncalaamu bareʼemo ndakitanaka!”

⁴⁹ Waʼa ntau anu njau motunda mangkoni sangkani-ngkani pai Yesu mombepeoasi natoʼo, “Ara isema tau seʼi anu mangkoto bareʼe da mangkitanaka salaa?”

⁵⁰ Paikanya mompau i Yesu ri weʼa setu ndatoʼo, “Peaya ndayamu ri Yaku mancorepakamo siko, pewalilimo ri karodo ndayamu!”