Lukas 22 - Sura Magali Nuntu Ngkatuwu

Pogombo da mampepate i Yesu 22:1-2

¹ Mosumo eo mposusa roti anu bareʼe ndaragi, anu ndapapotoʼo eo Pasa.

² Napepalimo waʼa ntadulako ntadu mpanyomba jaya da mampepate ngkaroo i Yesu maka maeka raya ntau seʼe ri waʼa ntau sondo.

I Yudasi mampobalu i Yesu 22:3-6

³ Raya i Yudasi to Karioti napesuaki i majaʼa. Siʼa sambaʼa ri oyo anaguru-A anu sampuyu pai radua.

⁴ Nceʼe painaka njoʼumo i Yudasi mogombo pai waʼa ntadulako ntopojaga ri Banua i mPue kono da napampepombaika i Yesu ri tau seʼe.

⁵ Maʼai kojo kawongko ndaya ntau seʼe, pai naposintuwui ntau seʼe da mawaika i Yudasi doi.

⁶ Singkono woʼu pai raya i Yudasi, natepuʼumo mampepali tempo anu madago da napampepombaika i Yesu ri tau seʼe ri kabareʼepanya naincani ntau.

Pompatoka pangkoni Pasa 22:7-13

⁷ Jelamo ri eo mpangkoni roti anu bareʼe ndaragi, eo mpancambale ana bimba anu ndakoni ri posusa Pasa.

⁸ Ndapokaumo i Yesu i Peturu pai i Yohane ndatoʼo, “Ndipalaimo mampatoka da polimbuta mangkoni Pasa.”

⁹ Meoasi tau seʼe, “Ri mbeʼi pampokonomi da kapampatoka?”

¹⁰ Mesono i Yesu, “Ane mesuamo komi ri raya ngkota, da ndipomberataka sambaʼa tuama mampasaʼa gumba mponombu. Ndilulumo tau setu rantani rata ri banuanya,

¹¹ pai da nditoʼoka tumpu banua setu, ndapeoasi i Guru, ‘Ri mbeʼi da polimbu-Ku mangkoni pangkoni Pasa pai waʼa anaguru-Ku?’

¹² Da natujuka komi ntumpu banua setu lincu anu bangke ri wawonya, gana-gana parewa anu da ndapake. Iretumo da ndipampatoka pura-pura.”

¹³ Malaimo i Peturu pai i Yohane, pura-pura anu narata ntau seʼe, bareʼe sala ewa anu ndatotoraka i Yesu. Napatokamo ntau seʼe pangkoni Pasa.

Pangkoni Magali 22:14-23

¹⁴ Butu ratamo tempo da mangkoni pangkoni Pasa setu, motundamo i Yesu pai waʼa anaguru-A da mangkoni.

¹⁵ Nepa ndatoʼoka tau seʼe, “Da raya-Ku kojo mangkoni pangkoni Pasa seʼi sangkani-ngkani pai komi ri kabareʼepanya Yaku maepe kapari!

¹⁶ Maka da ndiayamo: Yaku bareʼemo da mangkoni inceʼi rantani posoki pangkoni seʼi ndapatongawa ri Lino Dawoʼu i mPue Ala.”

¹⁷ Roo setu ndaokotaka i Yesu tabo mpanginu anggoro, nepa ndapasowa pekakai mpontarima kase ri Pue Ala, nepa mompau ndatoʼo, “Timamo inceʼi pai ndipotila-tilamo;

¹⁸ maka da ndipaincani: montepuʼu seʼi-seʼi Yaku bareʼemo da mangainu anggoro seʼi rantani rata ri tempo katongawamo poparenta i mPue Ala.”

¹⁹ Roo setu ndatima i Yesu roti. Ri karoonya ndapasowa pekakai mpontarima kase, ndaripu-ripusi roti setu pai pale-A, nepa ndawaika tau seʼe, seʼi ndatoʼo, “Inceʼimo koro-Ku [anu ndapepombaika tilami. Ndiwianakamo inceʼi ndipaendo Yaku.”

²⁰ Ewanceʼe seʼe ri karoo mangkoni, ndawaika tau seʼe tabo mpanginu anggoro setu seʼi ndatoʼo, “Tabo mpanginu seʼi inceʼemo pojanji i mPue Ala anu dawoʼu, anu ndapakainti pai daa-Ku – daa anu ndabubu tilami.]”

²¹ “Paikanya peole! Tau anu da mampobalu Yaku reʼe ireʼi sangkani-ngkani pai Yaku!

²² I Ana Manusia lawi da mate silulu pai anu ndapakanoto mPue Ala; paikanya marugimo tau anu mampobalu!”

²³ Inceʼe painaka montepuʼumo mombepeoasi tau seʼe sambaʼa-pai sambaʼa, bara isema ungka ri oyo ntau seʼe anu da mowia ewancetu.

Pombetoli kono kaʼisemanya anu ri wawo ngkabangke 22:24-30

²⁴ Mebete pombetoli ri oyo waʼa anaguru i Yesu, kono kaʼisemanya ungka ri oyo ntau seʼe anu sangaya-ngaya da ndadika ri wawo ngkabangke.

²⁵ Ndatoʼo i Yesu ri tau seʼe, “Waʼa mokole ri banca anu bareʼe maincani i Pue Ala mamparini palilinya, pai waʼa ntau anu makuasa anu ndatoʼo, ‘Topongkantawi Palili’.

²⁶ Paikanya komi bareʼe maya ewancetu. Komi banya ewanceʼe, tau anu ri wawo ngkabangkemo ri oyomi sangaya-ngaya da mewali ewa anu maʼai ngkakodinya, pai tadulako sangaya-ngaya da mewali ewa toporioko.

²⁷ Isema anu meruu kabangkenya: tau anu motunda mangkoni ri meja, bara tau anu mamporiokoi siʼa? Manoto tau anu motunda setu. Paikanya Yaku reʼe ri oyomi ewa toporioko.

²⁸ Ri mpengaya-ngaya kapari-Ku komi bareʼe bali-bali sangkani-ngkani pai Yaku.

²⁹ Ewambeʼi pawaimo i mPapa ri Yaku kuasa da moparenta, ewanceʼe woʼu Yaku da mangawaika komi kuasa setu.

³⁰ Ane ewanceʼe komi maya mawongko-wongko raya pai Yaku ri tempo Yaku mewali Mokole. Pai komi da motunda ri sampuyu pai radua gadera mpoparenta da mamparenta sampuyu pai radua lemba nto Isaraeli.”

Pampakanoto i Peturu da mampesapuka i Yesu 22:31-34

³¹ “Simo, Simo, pedongeka! Reʼemo tempo ndawai ri Majaʼa da mangaʼuji komi; daʼewa gandu anu ndapapogaʼa pai pelanya anu maʼoe ndapapogaʼa pai anu apa.

³² Paikanya Yaku roo mompekakaika siko, Simo, da naka peaya ndayamu bareʼe da bali. Pai ane mewalilimo siko ri Yaku, siko sangaya-ngaya da nupakaroso raya waʼa ngkasangkompomu.”

³³ Mesono i Peturu natoʼo, “Pue, yaku tikali mesua ri tarunggu pai mate sangkani-ngkani pai Komi Pue!”

³⁴ Ndatoʼo i Yesu, “Da nuayamo Peturu,” ri kabareʼepanya mototoroʼo manu wengi seʼi, siko tatogo ngkanimo mampesapuka Yaku.

Dompe, watutu bara penai 22:35-38

³⁵ Roo setu ndatoʼo i Yesu ri tau seʼe, “I owi kupampokau komi bareʼe kuwai komi mangkeni dompe, watutu bara talupa, tampe reʼe bara nunjaa-njaa anu ndipomakura?” Mesono tau seʼe natoʼo, “Bereʼe!”

³⁶ Ndatoʼo i Yesu, “Paikanya seʼi-seʼi isema anu mampotumpu dompe bara watutu, sangaya-ngaya da nakeni; pai isema anu bareʼe mampotumpu penai, sangaya-ngaya da napobalu jubanya da naolika penai.

³⁷ Maka, da ndiayamo, pau Ncura Magali anu ewaseʼi katetoʼonya, ‘Siʼa ndapasiwia pai sambaʼa tau majaʼa,’ inceʼe sangaya-ngaya da mewali ri woto ngkoro-Ku. Maka nunjaa anu ndaʼuki ri Sura Magali kakononya Yaku ntongonyamo mewali wawaseʼi.”

³⁸ Natoʼo waʼa anaguru i Yesu, “Pue, ndipeole, ireʼi reʼe radua mata penai.” Mesono i Yesu ndatoʼo, “Madagomo!”

I Yesu mekakai ri Buyu ngKaju Lana 22:39-46

³⁹ Malai i Yesu ungka ri kota, ewa anu ndapobiasamo njoʼu ri Buyu ngKaju Lana, pai waʼa anaguru-A njoʼu woʼu sangkani-ngkani pai Sira.

⁴⁰ Kajela njairia, ndatoʼoka tau seʼe, “Ndipekakaimo, da naka komi bareʼe masalaa ane komi ndapebutuka.”

⁴¹ Ungka lairia malai Sira lawa sakodi ungka ri tau seʼe, tempo-temponya sampewunu mbatu kalawanya,

⁴² nepa mombukotu mekakai ndatoʼo, “Papa, ane maya, ndipakalawa ungka ri yaku kapari anu sangaya-ngaya da kupomberata seʼi. Paikanya neʼe malulu pepokono-Ku, paikanya podo malulu pepokono mPapa.” (

⁴³ Sambaʼa malaʼeka rata ri Sira mampakaroso Sira.

⁴⁴ Maʼai kojo kapari ndaya i Yesu, painaka ndapari-pari kojo mekakai Poperepe inia molepe ri tana ewa daa.)

⁴⁵ Roo mekakai, mewalili woʼu i Yesu ri waʼa anaguru-A. Ndarata tau seʼe ntongo ngkayore ua maʼai kasusa ndaya ntau seʼe.

⁴⁶ Nepa ndatoʼoka tau seʼe, “Wenu komi jayore? Ndipembangumo pai ndipekakaimo da naka komi bareʼe panangi ri pompebutuka.”

I Yesu ndasoko 22:47-53

⁴⁷ Ntongo mompaupa i Yesu, jelamo waʼa ntau anu sondo. Tau seʼe nawawanaka i Yudasi, sambaʼa ri anaguru i Yesu. Ungka lairia njoʼu i Yudasi madadu i Yesu nepa naeki Sira.

⁴⁸ Paikanya ndatoʼo i Yesu ri siʼa, “Yudasi, bara ua paeki setu siko da mampobalu i Ana Manusia?”

⁴⁹ Butu nakita waʼa anaguru i Yesu anu njau njairia nunjaa anu da mewali setu, natoʼo ntau seʼe, “Pue, da kaewamo pai mata mpenai!”

⁵⁰ Nepa sambaʼa ungka ri oyo ntau seʼe mampomai anamayunu i ntadu mpanyomba bangke pai penai painaka ware talinganya tondo mokana.

⁵¹ Paikanya ndatoʼo i Yesu, “Madagomo!” Nepa ndajama talinga ntau setu ndapakaʼosa.

⁵² Roo setu ndatoʼo i Yesu ri waʼa ntadulako ntadu mpanyomba pai waʼa ntadulako ntopojaga Banua i mPue, sangkani pai waʼa ntadulako nto Yahudi anu rata njairia da mancoko Sira, “Ara Yaku seʼi tau majaʼa, painaka komi rata mancoko Yaku mangkeni penai pai tarasulu?

⁵³ Sandeme-sandeme Yaku njau sangkani-ngkani pai komi ri Banua i mPue, wenu bareʼe ndisoko Yaku. Paikanya inceʼimo temponya komi da mowia, tempo ngkuasa mbani anu monggale.”

I Peturu mampesapuka i Yesu 22:54-62

⁵⁴ Tau seʼe mangancoko i Yesu nepa nakeni ri banua ntadu mpanyomba bangke. I Peturu maluluwaka lawa-lawa.

⁵⁵ Ri tongo-tongo ncoma setu njaumo apu ndapatuwu ri dampu, i Peturu njoʼu motunda maneru sangkani-ngkani pai waʼa ntau anu mantolilimi apu setu.

⁵⁶ Sambaʼa anamayunu weʼa mangkita i Peturu motunda ri wiwi dampu setu; nepa napatomata anamayunu weʼa setu i Peturu, natoʼo, “Tau seʼi woʼu ingena njau sangkani-ngkani pai i Yesu!”

⁵⁷ Paikanya mesapu i Peturu. Natoʼo, “Yaku bareʼe liu-liu kuincani tau setu!”

⁵⁸ Bareʼe masae, tau anu sambaʼanya mangkita i Peturu natoʼo, “Siko woʼu sambaʼa anu ungka ri tau seʼe!” Paikanya mesono i Peturu natoʼo, “Bareʼe, banya yaku!”

⁵⁹ Tempo-temponya sajaa ungka lairia, sambaʼa tau anu ntaninya marimbo pompaunya natoʼo, “Lawi tau seʼi anaguru i Yesu, maka siʼa to Galilea!”

⁶⁰ Paikanya mesono i Peturu natoʼo, “Nunjaa anu nutinako ndaya, yaku bareʼe kuincani!” Tempo setu seʼe, ntongo mompaupa i Peturu, mototoroʼo manu.

⁶¹ Meeli i Yesu mampeole i Peturu. Nepa tekaendo i Peturu anu roomo ndatoʼo i mPue ri siʼa, “Ri kabareʼepanya mototoroʼo manu ri wengi seʼi, siko tatogo ngkanimo nupesapuka Yaku.”

⁶² Painaka mesuwu i Peturu ungka lairia motumangi kancodu-ncodu.

I Yesu ndabobaki pai ndapasinggiri 22:63-65

⁶³ Waʼa ntau anu majagai i Yesu, mampasinggiri pai mabobaki Sira.

⁶⁴ Nadampo ntau seʼe mataa nepa ndapeoasi ri Sira, “Koisa toʼo bara incema anu mawombo siko?”

⁶⁵ Maria woʼu pau pompetikodi anu natoʼosi ntau seʼe ri Sira.

I Yesu ri suara Majalisi Agama 22:66-71

⁶⁶ Bangke reme mowuro-wuro, waʼa ntadulako nto Yahudi, waʼa ntadulako ntadu mpanyomba pai waʼa guru agama mompasambaka, nepa nakeni i Yesu ri suara Majalisi Agama ntau seʼe.

⁶⁷ Natoʼo ntau seʼe ri Sira, “Toʼokamo kami, bara sikomo seʼi Mokole Tadungkadago?” Mesono i Yesu ndatoʼo, “Mau kutoʼoka komi, komi lawi bareʼe da ndiaya.

⁶⁸ Pai ane Yaku mompeoasi ri komi, komi seʼe lawi bareʼe da mesono.

⁶⁹ Paikanya montepuʼu seʼi-seʼi, i Ana Manusia da motunda ri tondo mokana mPue Ala Anu Makuasa.”

⁷⁰ Natoʼo ntau seʼe pura-pura, “Ane ewancetu, siko seʼi Ana mPue Ala?” Mesono i Yesu ndatoʼo, “Ewancetu pantoʼomi.”

⁷¹ Natoʼo ntau seʼe, “Bareʼemo reʼe yowenya sabi! Tadongemo paunya ngkalionya!”