Lukas 21 - Sura Magali Nuntu Ngkatuwu

Pombai mpanyomba sambaʼa weʼa bemba 21:1-4

¹ Ndakomatasi i Yesu waʼa ntau anu mesua ri Banua i mPue, ndakita waʼa ntau koreʼe manawu doi ri peti mpombai panyomba.

² Ndakita woʼu sambaʼa weʼa bemba anu kaasi-asi manawu radua doi rimisi.

³ Ndatoʼo i Yesu, “Ndipedongeka, weʼa bemba seʼi anu maria mpodago panyombanya nawai painaka waʼa ntau sondo setu.

⁴ Maka anu napanyombaka waʼa ntau sondo setu podo peruunya ungka ri anu da napake. Paikanya weʼa bemba anu kaasi-asi seʼi, mampepombaikamo pura-pura ri anu lawi da napake ri katuwunya.”

I Yesu mampau kono da kagero Banua i mPue 21:5-6

⁵ Ri padonge i Yesu paunde ntau peawa Banua i mPue, ewambeʼi kadolidi mbatunya pai panyomba ntau mpengaya-ngaya ri Pue Ala, ndatoʼo i Yesu ri tau seʼe,

⁶ “Mosumo temponya pura-pura anu ndikita setu da magero, bareʼemo da reʼe mau saogu watu ireʼi anu da njau tepatapi ri kareʼenya.”

Kapari pai pejeani 21:7-19

⁷ Napeoasi ntau seʼe ri Yesu, “Guru, impiamo da pewalinya pura-pura setu? Pai nunjaa petondoninya ane jelamo tempo da pewalinya?”

⁸ Mesono i Yesu, “Ndipakadago neʼe boi komi ndatengosi. Maka maria tau anu da jela mampake toʼo-Ku da natoʼo, ‘Yakumo seʼi! pai jelamo temponya.’ Paikanya neʼe ndiaya tau seʼe.

⁹ Pai neʼe ndipokaeka ane ndidonge bambari mpoʼiwali, pai ponjaʼati. Maka pura-pura setu sangaya-ngaya da mewali riunya. Paikanya incetu banya posokinya jelamo eo kiama.”

¹⁰ Ndasumparaka i Yesu pasimbaju-A ndatoʼo, “Tau salemba da mampoʼiwalika tau anu salembanya pai negara anu sambaʼa da maungku negara anu ntaninya.

¹¹ Ri mbeʼi-mbeʼi da mewali lindugi anu maʼai, oro pai juʼa lele. Pai da mewali waʼa anu ndapojingki pai mampakaeka raya ri yangi.

¹² Paikanya ri kabareʼepanya mewali pura-pura setu, komi da ndasoko pai da ndajeani. Komi da ndakeni ri suara ntopobotusi ri raya banua mpekakai pai da ndapari ntarunggu. Pai komi da ndakeni ri suara waʼa mokole pai to poparenta ua mancuru palulumi Yaku.

¹³ Iretumo tempo anu madago da ndipampetumbu Nuntu ngKatuwu ungka ri Pue Ala.

¹⁴ Ndipakaroso rayami, neʼe ipu rayami manawa-nawa nunjaa anu da ndipesonoka.

¹⁵ Yaku da mantotorakaka komi waʼa mpau pai kaloʼe ndaya setu; rantani bereʼe mau sambaʼa ri oyo iwalimi mangkoto maewa bara mancapu nunjaa anu nditoʼo.

¹⁶ Komi da nanawusaka inemi pai papami, kasangkompomi pai waʼa njaʼimi. Santila komi da napepate ntau seʼe.

¹⁷ Komi da napobanciika ntau ua pangalulumi Yaku.

¹⁸ Paikanya mau santoko wuyuami bareʼe da tetaji.

¹⁹ Ane bareʼe mogencu pai rodo rayami, komi da ndasorepaka.”

Kagero ngkota Yerusale 21:20-24

²⁰ “Ane ndikita kota Yerusale nalimbu ncape iwali, da manotomo ri rayami mosumo da kageronya.

²¹ Ri tempo setu waʼa ntau anu mampeari tana Yudea da molonco ri wawo buyu. Waʼa ntau anu lau ri raya ngkota da mesuwu, pai waʼa ntau anu reʼe ri sambalikunya neʼe boi mesua ri raya ngkota.

²² Maka ri tempo setumo eo pampakanoto popahuku, ua ewanceʼe da mewalimo ewa anu ndaʼuki ri Sura Magali.

²³ Ara maparisa da naepe waʼa mbeʼa anu manee koronya ri tempo setu, pai waʼa ine anu ntongo mampasusu ongaanya. Da maʼai kaparinya ri tana seʼi, waʼa ntau da ndahuku i mPue Ala.

²⁴ Reʼe tau anu da mate ri mata mpenai, pai reʼe tau anu da ndatawani ri tana ntau; pai kota Yerusale da naija-ijaki ntopolamoa rantani pusa tempo anu ndapepombaika i mPue ri tau seʼe.”

Karata i Ana Manusia 21:25-28

²⁵ “Da reʼe woʼu ndakita petondoni ri ogu eo, wuya pai betuʼe; waʼa ntau ri lino da maeka pai da ipu rayanya madonge pewakuu pai kaposo-poso balumba ndopo ntasi.

²⁶ Da maʼai kaeka ndaya ntolino mangkita anu da mewali ri sambawo lino seʼi, maka waʼa ngkuasa ri tongo ndaoa da sigaliganggomo.

²⁷ Maka ri tempo setumo da karata i Ana Manusia meyapi-yapi limu mampatongawa kuasa pai peawa anu bangke.

²⁸ Ane montepuʼumo mewali pura-pura setu, ndipembangumo pai ndiwangutakamo woʼomi, maka mosumo temponya komi da ndasorepaka.”

Totoraka ewa katuwu ngkaju ara 21:29-33

²⁹ Ndapau woʼu i Yesu ri tau seʼe sambaʼa nuntu mporapa ewaseʼi, “Peolemo mpodago kaju ara pai waʼa ngkaju anu ntaninya.

³⁰ Ane ndikita montepuʼumo mesuwu londenya, inceʼe petondoni mosumo tempo mporeme.

³¹ Ewanceʼe seʼe ri pangkitami wuwunya anu mewali, da manotomo ri rayami, mosumo da pepatongawa poparenta i mPue Ala.

³² Da ndipaincani! Pura-pura setu da mewali ri kabareʼepanya pura mate waʼa ntau tuwu salapi seʼi.

³³ Yangi pai lino da paya paikanya nuntu-Ku bareʼe da bali rantani masae-sae.”

Da ndiponcoro-ncoro 21:34-38

³⁴ “Neʼe leba komi, podo mampasilolongani posusami, manginu-nginu baru pai mopancua bara podo mampari wawo anu da ndikatuwuka; painaka bereʼe pompatokami boi rata ncoroba eonya.

³⁵ Maka eo setu ewa patambo gala ntau pura-pura ri wawo lino seʼi.

³⁶ Ndiponcoro-ncoromo, ndipekakaimo neʼe bali-bali da ndipangkoto maliunaka pura-pura anu da mewali setu pai naka da ndileʼo mombesuara pai i Ana Manusia.”

³⁷ Ane ri eo i Yesu motuntu ri Banua i mPue, pai ane mawengi njoʼu sambengi ri Buyu ngKaju Lana.

³⁸ Sampowuro-sampowuro pura-pura tau tepasambaka ri Banua i mPue da mampedongeka pompaguru i Yesu.