Lukas 2 - Sura Magali Nuntu Ngkatuwu

Pampoana i Yesu 2:1-7

¹ Ri tempo setu napapesuwumo i Datu Agutu songka da naka pura-pura palilinya da mampekiʼuki toʼonya da ndapaincani imbanya.

² Inceʼemo anu kaʼisa ngkaninya paimba tau ri tempo i Kireniu mewali petoro ri tana Siria.

³ Pura-pura tau da njoʼu mampekiʼuki toʼonya ri lipu ntuʼanya.

⁴ I Yusu woʼu malai ungka ri lipu Nasare ri Galilea, njoʼu ri lipu Beteleme ri tana Yudea, lipu pampoana ngkainya i Mokole Daudi; maka siʼa muli i Daudi.

⁵ I Yusu mampekiʼuki toʼonya sangkani-ngkani pai tengeanya i Maria anu maneemo koronya.

⁶ Sindara ngkanjau ntau seʼe ri Beteleme, jelamo wuyanya da poana i Maria.

⁷ Napoanamo ana tuama, inceʼemo ananya anu uyue. Ananggodi setu napujuka ronto, nepa nauli ri raya dula anu lau deami maka bareʼemo reʼe kasoanya ri banua linggona.

Topongkambi pai malaʼeka 2:8-20

⁸ Ri daera setu reʼe waʼa ntopongkambi anu maroo-roo ri pada mposambengi mangkariani waʼa bimbanya.

⁹ Tingkarasaka, setu malaʼeka i mPue Ala mekakore ri sori ntau seʼe, pai peawa i mPue Ala mesindi makilaya marara tau seʼe, painaka maʼai kojo kaeka ndayanya.

¹⁰ Paikanya natoʼo malaʼeka setu ri tau seʼe, “Neʼe maeka! maka yaku rata mampetumbuka komi bambari madago galami – bambari anu mampakawongko raya ntau pura-pura.

¹¹ Sandeme seʼi ndapoanamo Mokole Tadungkadago anu da mancompo salaami, inceʼemo i Kerisitu Pue, ri lipu i Daudi.

¹² Pai seʼi petondoninya, da ndirata ongaa setu ndapuju ndonto, ndauli ri raya dula.”

¹³ Tingkarasaka malaʼeka setu teranganimo karianya, pai tau seʼe mongayu maunde i Pue Ala natoʼo,

¹⁴ “Unde-undemo i Pue Ala, Sira anu makuasa! Dago pai wongko ndaya, tudumo ri wawo ntana. Morasi tau anu mampakawongko raya i mPue!”

¹⁵ Butu payamo waʼa malaʼeka setu mewalili ri suruga, mombesalemo topongkambi setu, napombetoʼoka, “Maʼimo kita ndeku ri Beteleme mampeole anu mewali setu ewa anu ndapetumbuka kita i mPue.”

¹⁶ Maliga pelinja ntau seʼe, kajela ntau seʼe njairia narata kojo i Maria pai i Yusu sangkani-ngkani pai ongaa setu, ndauli ri raya dula.

¹⁷ Ri pangkita ntopongkambi ongaa setu, napatuntumo ntau seʼe anu natoʼo waʼa malaʼeka kakononya ongaa setu.

¹⁸ Pai pura-pura tau anu mangadonge popatuntu waʼa ntopongkambi setu jingki rayanya.

¹⁹ Paikanya i Maria nadika ri rayanya pura-pura setu, pai napepewoloka.

²⁰ Mewalilimo waʼa ntopongkambi setu ri pada, naunde-unde i Pue Ala, pai nabangkei toʼo-A, maka pura-pura anu nadonge pai nakita ntau seʼe singkono pai anu natoʼo malaʼeka.

I Yesu ndapapotoʼo 2:21

²¹ Ri kagananya uayu ndeme tinuwu ananggodi setu, ananggodi setu da ndasuna. Pai napapotoʼoka ntau seʼe Yesu, toʼo anu nawai malaʼeka ri kabareʼepanya nakatianaka ine-A.

I Yesu ndakeni ri Banua i mPue 2:22-38

²² Ganamo eo pampakagali i Yusu pai Maria malulu padika i Musa. Inceʼe painaka ndeku tau seʼe mangkeni ananggodi setu ri Yerusale da ndapampepombaika ri Pue Ala.

²³ Maka malulu Padika i mPue, “Pura-pura ana tuama anu uyue da ndapepombaika ri Pue.”

²⁴ Tangara ndaya ntau seʼe woʼu da mampanyombaka panyomba ri Pue tonci tokuku samboko bara radua tonci putiʼa anu mangurapa, ewa anu ndapakanoto ri raya mPadika i mPue.

²⁵ Sindara setu lau ri Yerusale tau tuʼa sambaʼa i Simeo toʼonya. Siʼa sambaʼa tau meaya pai mampokaeka i Pue Ala, siʼa woʼu mampopea tempo da pancorepaka i mPue Ala to Isaraeli. Inosa mPue Ala mamponinika siʼa,

²⁶ pai Inosa mPue Ala roomo mampapaincanika siʼa, kasiʼanya bareʼepa da mate ane bareʼepa nakita Mokole Tadungkadago anu ndajanji i mPue Ala.

²⁷ Ua popanini Inosa mPue Ala, mesua i Simeo ri Banua i mPue. Ri tempo setu i Yusu pai i Maria mesua mangkeni i Yesu anu ntongo kodi-kodipa setu, da mawianaka ada malulu songka agama.

²⁸ Nasokomo i Ncimeo ananggodi setu nepa naunde i Pue Ala natoʼo,

²⁹ “Seʼi-seʼi boo Pue ndibanganimo janji-Mi. Mbolimo nditimamo inosaku ri karodo dayaku.

³⁰ Maka nakitamo mataku Toponcorepaka anu ungka ri komi.

³¹ Toponcorepaka setu roomo ndipatoka tila lemba pura-pura.

³² Ewa reme anu mampakareme jaya tila waʼa banca ntaninya, da maʼi ri Komi; inceʼemo reme anu mangkeni katetubunaka tila waʼa ntau-Mi to Isaraeli.”

³³ Napojingki mpapa pai ine ananggodi setu madonge anu natoʼo i Ncimeo kono ana ntau seʼe.

³⁴ Nadonco i Ncimeo tau seʼe, nepa natoʼoka i Maria ine ananggodi setu, “Peole, ananggodi seʼi roo ndapilisi i mPue Ala da mangagero pai da mancorepaka maria to Isaraeli. Da mewali petondoni ungka ri Pue Ala anu da naewa ntau sondo,

³⁵ pai ua ewanceʼe tongawamo bangani ndaya ntau seʼe. Kapari ndaya da mantosu sulemu ewa penai anu mataja.”

³⁶ Lau woʼu nabi weʼa sambaʼa i Hana toʼonya, ana i mPanueli to Asere, siʼa tuʼamo mpodago, papitu ntaʼuja polangkainya,

³⁷ tempo setu i Hana bembamo, uayu mpuyu pai aopo ntaʼumo tinuwunya. Bareʼe napalaika Banua i mPue. Ri wengi pai ri reme siʼa njau manyomba ri Pue Ala mekakai pai mopuasa.

³⁸ Sindara setu maʼimo siʼa njairia, naunde i Pue Ala pai mompau woʼu siʼa kono Ananggodi setu ri waʼa ntau anu mampopea tempo i Pue Ala da malapa Yerusale.

Mewalili ri Nasare 2:39-40

³⁹ Karoonya nawianaka i Yusu pai Maria pura-pura anu malulu songka agama, mewalilimo tau seʼe ri lipu Nasare ri Galilea.

⁴⁰ Mewonggamo ananggodi setu kakobangke-bangkemo pai maroso. Sira loʼe kojo pai maʼai ndapampotowe i mPue Ala.

I Yesu ri Banua i mPue 2:41-52

⁴¹ Santaʼu-santaʼu tau tuʼa i Yesu ndeku ri Yerusale da mamposusaka Posusa Pasa.

⁴² Ganamo sampuyu pai radua ntaʼu tinuwu i Yesu ndekumo woʼu Sira malulu wawai mposusa.

⁴³ Pusamo eo mposusa setu da mewalilimo tau seʼe paikanya i Yesu anu ntongo ananggodipa teʼonto ri Yerusale, bareʼe naincani ine pai papa-A.

⁴⁴ Nasarumaka ntau seʼe bara tepalaimo pai waʼa ntau anu malai riunya. Sandeme pelinja ntau seʼe nepa napombepeoasika ri waʼa ngkasangkomponya pai ri sampombeincani ntau seʼe.

⁴⁵ Paikanya bareʼe narata ntau seʼe, painaka mewalili muni tau seʼe ri Yerusale mampepali Sira.

⁴⁶ Pusa tatogo ndeme napampepali ntau seʼe, nepa narata ntau seʼe Sira ri raya Banua i mPue, motunda-tunda ri oyo waʼa guru agama mampedongeka tuntu ntau seʼe, pai maria pompeoasi.

⁴⁷ Tau pura-pura anu njau njairia, jingki rayanya mampedongeka waʼa mpesono-A, maka tongawa kojo kaloʼe-A.

⁴⁸ Tau tuʼa-A seʼe jingki rayanya mangkita Sira. Natoʼoka ine-A Sira, “Makuja ana, painaka nupowia kami ewaseʼi? Papa-Mu pai ine-Mu, masusa kojo raya mami mampepali siko!”

⁴⁹ Ndatoʼoka tau seʼe, “Makuja papa pai ine mampepali Yaku? Ara papa pai ine bareʼe ndiincani Yaku sangaya-ngaya da reʼe ri raya banua mPapa-Ku?”

⁵⁰ Paikanya bareʼe narata ndaya ntau seʼe pesono i Yesu.

⁵¹ Roo setu mewalilimo Sira sangkani-ngkani pai tau seʼe njoʼu ri lipu Nasare, Sira medonge kojo ri tau seʼe. Paikanya ine-A madika ri rayanya pura-pura anu mewali setu.

⁵² Kakoteranga-ranganimo kabangke pai kaloʼe i Yesu, tongawa kojo Sira ndapotowe i mPue Ala pai napomawo woʼu waʼa ntau.