Lukas 15 - Sura Magali Nuntu Ngkatuwu

Nuntu mporapa bimba anu tetaji 15:1-7

¹ Ri anu sandeme sondo toponduru asele pai waʼa ntau anu napobanciika ntau sondo madadu i Yesu da mampedongeka potuntu-A.

² Waʼa nto Parisi pai waʼa guru agama montepuʼumo mongkakanguru. Natoʼo ntau seʼe, “Peole tau setu, napokono mampobale-baleka waʼa ntau majaʼa pai molimbu mangkoni pai waʼa ntau seʼe!”

³ Inceʼe puʼunya painaka ndapauka i Yesu ri tau seʼe nuntu mporapa ewaseʼi,

⁴ “Ane rapanya reʼe ri oyomi mampotumpu bimba saatu, ungka lairia tetaji sambaʼa, bara nunjaa anu da napowia? Manoto da napalaika anu siompuyu pai sasio setu ri tongo mpada, da malai mampepali anu tetaji setu rantani narata.

⁵ Pai ane naratamo bimba setu manoro maʼai kojo da kawongko ndayanya, gori ngkawongko ndayanya napasaʼa bimba setu,

⁶ nakeni mpewalili ri yununya. Roo setu da napeboo waʼa balenya pai waʼa ntau samposori banuanya, nepa da natoʼoka, ‘Ndikamaʼimo kita da mosusa, mampokawongko bimbaku anu tetaji kurata muni!’

⁷ Mewali ewanceʼe seʼe bangke kawongko ndaya ri raya ncuruga ane reʼe sambaʼa tau masalaa moncosoi, painaka siompuyu pai sasio tau anu mayoa pai anu mau bareʼemo majea.”

Nuntu mporapa doi anu tetaji 15:8-10

⁸ “Bara rapanya reʼe sambaʼa weʼa mampotumpu sampuyu doi salaka, ungka lairia tetaji sangkomba – nunjaa anu da napowia? Manoto da natutuni silo pai da moncaewe ri raya banuanya rantani narata doi setu.

⁹ Samparatanya doi setu liu-liu napeboo waʼa ongganya pai waʼa ntau samposori banuanya natoʼoka, ‘Maʼai kojo kawongko ndayaku maka doiku anu tetaji kurata muni. Ndikamaʼimo tapamposusaka!’

¹⁰ Monco Kutoʼoka komi, ‘Ewanceʼemo seʼe da kawongko ndaya waʼa malaʼeka mPue Ala ane reʼe tau majaʼa mamponcosoi ndaya salaanya.’ ”

Nuntu mporapa ana mampalaika papanya 15:11-32

¹¹ Ndatoʼo woʼu i Yesu, “Reʼemo sambaʼa papa anu mampotumpu radua ana tuama.

¹² Njoʼumo anu tuaʼi merapi ri papanya natoʼo, ‘Papa ndiwaikamo yaku tilaku ri waʼa mpanta anu ndipareʼeka kami.’ Ungka lairia natila radua mpapanya aga-aga anu napareʼe, nepa nawaika tilanya sambaʼa pai sambaʼa.

¹³ Bara sangkuja ndeme ungka ri potila panta setu, napobalumo i ntuaʼi pura-pura anunya nepa malai ri tana ntau anu lawa. Njairiamo napabolontanaka doinya podo mangkoni pai yore tetalanya.

¹⁴ Butu puramo doinya, mewalimo oro bangke ri tana setu rantani siʼa kaasi-asimo.

¹⁵ Njoʼumo siʼa mangkoni gaji ri tau koreʼe ri lipu setu, tetalanya maroo-roo ri bonde mampakoni mbawu.

¹⁶ Nakeni ngkaoro ngkomponya teasaoyo da rayanyamo da mangkoni pangkoni waʼa mbawu setu. Mau ewancetumo kaoronya bereʼe tau anu mawaika siʼa pangkoni.

¹⁷ Ungka lairia naendo ndayamo natoʼo, ‘Waʼa ntau anu motetala ri banua mpapaku gana-gana pangkoninya, yaku ireʼi pindongo da mate yoga!

¹⁸ Da kumalai mewalili ri banua mpapaku, da kutoʼoka papaku: Papa, masalaamo kojo yaku ri Pue Ala pai ri komi papaku.

¹⁹ Bareʼemo singkana yaku da ndipeboo anami. Ndipapewalimo yaku ewa tau anu mangkoni gaji ri komi.’

²⁰ Malaimo siʼa mewalili ri papanya. Ntongo lawa-lawapa siʼa nakitamo mpapanya. Merata kojo puru ndaya mpapanya mangkita, liu-liu natomu, nasokowaka, naeki.

²¹ Natoʼo ananggodi setu ri papanya, ‘Papa, masalaamo kojo yaku ri Pue Ala pai ri komi papaku. Bareʼemo singkana yaku da ndipeboo anami papa.’

²² Paikanya napeboo mpapanya waʼa ntoporiokanya natoʼoka, ‘Nditima maliga-liga rengko anu madolidi, ndipaporengkoka anaku seʼi, ndipatakaka sinci ri karamanya, pai ndipasuncuka talupa ri witinya.

²³ Ane roomo nditima ana japi anu maboko ndiroro. Kita da mangkoni ri kawongko ndaya,

²⁴ maka anaku anu matemo seʼi tuwumo muni, siʼa tetajimo, seʼi ndarata muni,’ montepuʼumo tau seʼe mosusa.

²⁵ Sindara setu ananya anu tukaka ntongo njaupa ri bonde. Ri pewalilinya, jabutu mosumo ri banua nadongemo kadoro ntau moende pai mongayu.

²⁶ Napeboo sambaʼa toporiokonya napeoasi, ‘Nunjaa anu mewali ri banua?’

²⁷ Natoʼo ntoporioko setu, ‘Tuaʼimi jela muni! Ndapokau mpapami kami maroro japi anu mangura pai maboko, maka ndarata muni anaa madago-dago!’

²⁸ Maʼai kojo kajaʼa ndaya ana anu tukaka painaka bareʼemo napokono mesua ri banua. Mesuwu papanya madadu, nakanarasi da napampokono mesua ri banua.

²⁹ Paikanya natoʼo, ‘Motaʼu-taʼumo yaku santongo mate mampotetalaka komi, bereʼe kupangaewa songkami. Pai bereʼe bara nunjaa-njaa ndiwaika yaku! Sako sambaʼa mbula bepareʼe anu ndiwaika yaku da kuroro mosusa pai waʼa baleku!

³⁰ Anami setu roomo mampapurasi aga-agami pai weʼa anu bareʼe tumoro, paikanya butu mewalili ndiroroka japi mangura anu maboko!’

³¹ Mesono papanya natoʼo, ‘Anaku, siko lawi bareʼe malai-lai ungka ri soriku, pura-pura anuku lawi siko tumpunya.

³² Paikanya da tapokawongko pai da taposusaka tuaʼimu seʼi, maka tuaʼimu seʼi tatoʼo matemo seʼi tuwu muni, tatoʼo tetajimo seʼi tarata muni.’ ”