Lukas 13 - Sura Magali Nuntu Ngkatuwu

Salaa pai kapari 13:1-5

¹ Ri tempo setu jelamo bara sangkuja mbaʼa tau mampetumbuka i Yesu bambari pampepate i mPilatu waʼa nto Galilea sindara mpaʼombasi panyomba ri Pue Ala.

² Madonge bambari setu ndatoʼo i Yesu ri tau seʼe, “Ndisarumaka to Galilea anu mate ndapepate setu inceʼemo anu meruu ngkabangke salaanya painaka to Galilea anu ntaninya?

³ Da ndipaincani banya kojo ewanceʼe! Paikanya Kutoʼoka komi, ndipakadago, ane bareʼe ndiponcosoi ndaya salaami, pura-pura komi daʼewanceʼe seʼe da kamatemi.

⁴ Bara ndisarumaka woʼu sampuyu pai uayu tau mate napere banua toaya ri Siloa, tau seʼemo anu bangke mpodago salaanya pai naka pura-pura tau anu lau ri lipu Yerusale?

⁵ Da ndipaincani banya kojo ewanceʼe! Paikanya sangkani woʼu Kutoʼoka komi ane bareʼe ndiponcosoi ndaya waʼa ncalaami, pura-pura komi da mate ewa kamate ntau seʼe.”

Nuntu mporapa kaju ara anu bareʼe mowua 13:6-9

⁶ Roo setu ndapau woʼu i Yesu nuntu mporapa ndatoʼo, “Reʼe sambaʼa tau mampotumpu kaju ara ri bonde anggoronya. Ri anu sandeme njoʼumo siʼa mampepali wua ngkaju setu, paikanya mau saogu bereʼe narata.

⁷ Mewali natoʼoka topojaga bondenya, ‘Pedongeka, jatatogo ntaʼumo seʼi kamaʼi-maʼiku da mampupu wua ngkaju ara seʼi, pai bereʼe liu-liu reʼe mau tesaogu. Moruana towomo kaju setu! Podo mampapurasi ngkabongo boko ntana ri bonde seʼi!’

⁸ Paikanya mesono topojaga bonde setu, ‘Pue, ane madago ndipapaliupa santaʼu seʼi da kupomanggi tana ri puʼunya, da kudikaka pupuki.

⁹ Bara da mowua yau taʼu simaʼi. Paikanya ane bareʼe mowua, ndipekitowomo.’ ”

I Yesu mampakaʼosa weʼa bungku ri eo Umapo 13:10-17

¹⁰ Ri anu saeo kono ri eo Umapo i Yesu mompatuntu ri banua mpekakai.

¹¹ Ri raya banua mpekakai setu lau sambaʼa weʼa anu sampuyu pai uayu ntaʼumo kajuʼanya naparini inosa majaʼa. Gori ngkasae kajuʼanya bungkumo bareʼemo madago mompayoa.

¹² Butu ndakita i Yesu, meboo Sira ndatoʼoka weʼa setu, “Ee weʼa, osamo juʼamu.”

¹³ Ndadonco i Yesu weʼa setu, liu-liu mayoamo pekakorenya; naundemo i Pue Ala.

¹⁴ Majaʼa raya ntadulako banua mpekakai setu, ua pampakaʼosa i Yesu tau majuʼa ri eo Umapo, inceʼe pai napantoʼoka waʼa ntau, “Aono ndeme da potetala; ndikamaʼimo ri waʼa eo setu da ndapampakaʼosa, pai neʼe ri eo Umapo!”

¹⁵ Mesono i Yesu, “Komi seʼi waʼa ntau toponggoli-nggoli! Umapo pura-pura tau mampapesuwu japi pai kalidenya ungka ri raya bonconya nakeni ri sambalikunya napapanginu.

¹⁶ Mewali ireʼi seʼi reʼe sambaʼa weʼa muli i Burahima, sampuyu pai uayu ntaʼumo kasaenya napampungu i Majaʼa. Ara bareʼe madago pungunya ndalede ri eo Umapo?”

¹⁷ Madonge pesono i Yesu setu, maʼai kojo kaea mata ntau setu; paikanya tau sondo pura-pura mawongko rayanya mangkita waʼa tanda ngkuasa anu ndapowia i Yesu.

Nuntu mporapa wuku nambo 13:18-19

¹⁸ Ndapeoasi i Yesu, “Ewambeʼi katedikanaka poparenta i mPue Ala? Pai nunjaa anu madago da Kupasiwiaka?

¹⁹ Katedikanakanya ewa wuku nambo saogu tuwu ri raya bondenya. Wuku nambo setu mewali puʼu ngkaju, painaka waʼa ntonci mampowia seanya ri raʼanya.”

Nuntu mporapa ragi 13:20-21

²⁰ Sangkani woʼu i Yesu mompeoasi ndatoʼo, “Ane i Pue Ala moparenta daʼewa nunjaa da ndapasintolioka katedikanakanya?

²¹ Katedikanakanya ewa ragi anu natima mbeʼa sambaʼa nepa natato pai tarigu opompuyu literi rantani mewoke pura-pura.”

Boboka anu kopi-kopi 13:22-30

²² Ri pelinja i Yesu da ndeku ri Yerusale, Sira mompaguru ri pura-pura kota pai lipu anu ndapelempo.

²³ Reʼe sambaʼa tau mompeoasi ri Sira, “Pue, bara podo sakodi tau anu da ndasorepaka?” Mesono i Yesu, ndatoʼo,

²⁴ “Pompari-mparimo mesua ri boboka anu kopi-kopi. Maka neʼe nukalingani! Maria tau anu da rayanya mesua paikanya bareʼe naleʼo.

²⁵ Ri tempo tumpu banua membangu madampo wombo, komi njau mekakore ri sambalikunya pai da mantadengkosi dampo mbombo seʼi da meboo-boo nditoʼo, ‘Pue, ndilokaka kami dampo mbombo!’ Da mesono tumpu banua, ‘Bareʼe kuincani bara ungka ri mbeʼi komi!’

²⁶ Da mesono woʼu komi, ‘Kami anu roomo molimbu mangkoni pai manginu sangkani-ngkani pai Komi, Komi woʼu roomo mompaguru ri jaya-jaya ri kota mami!’

²⁷ Paikanya da mesono Sira ndatoʼo, ‘Bareʼe Kuincani bara ungka ri mbeʼi kamaʼimi. Ndipalai ungka ireʼi, waʼa ntau anu majaʼa powiami!’

²⁸ Ri tempo setu da ndikita i Burahima, i Saki pai i Yako sangkani pai waʼa nabi da mosusa ri Lino Dawoʼu mPue Ala, komi pura-pura da mapari ndiepe motumangi, maka komi da ndairi ri sambalikunya!

²⁹ Waʼa ntau da tepasambaka ungka ri pebetea pai kasoyoa, pai ungka ri payompo yangi mpotimali-mali, tau seʼe da mosusa ri kawongko-wongko ndaya ri Lino Dawoʼu mPue Ala.

³⁰ Monco Kutoʼoka komi, reʼe tau anu teripuri da mewali tesindiu pai tau anu tesindiu da mewali teripuri.”

Merata puru ndaya i Yesu mangkita kota Yerusale 13:31-35

³¹ Ri tempo setu seʼe reʼe bara tesangkuja to Parisi jela mantoʼoka i Yesu, “Palaimo ungka ireʼi! Palaimo lawa-lawa, maka i Herode mampepali siko da napepate.”

³² Mesono i Yesu, “Palaimo petumbuka tau anu bereʼe yowenya setu, ‘Saeo seʼi pai raneo Yaku mairi kuasa anu majaʼa pai mampakaʼosa tau majuʼa, paikanya karemenya Yaku da mamparoo tetala-Ku.’

³³ Mau ewanceʼe da Kupaliu pelinja-Ku saeo seʼi, raneo pai karemenya, maka bareʼe sintempo nabi da ndapepate ri sambaliku ngkota Yerusale.

³⁴ Oo, Yerusale! Yerusale! Waʼa nabi nupepate! Waʼa ncuro mPue Ala nuwunu mbatu rantani mate! Bara sangkuja ngkanimo da raya-Ku mampasingkandomu waʼa ntaumu ewa indo manu mantumodosi ananya, ri ara mpaninya, paikanya bareʼe nupokono!

³⁵ Inceʼe puʼunya i Pue Ala bareʼemo ndapokono sangkani-ngkani pai komi. Da nupaincani montepuʼu wawaseʼi bareʼemo da nukita Yaku rantani nutoʼo, ‘Ndadoncomo Sira anu rata ri toʼo i mPue.’ ”